ବ୍ରହ୍ମପୁର ଅଫିସ,୧୮ା୩ – ବ୍ରହ୍ମପୁର ବିଶ୍ୱବିଦ୍ୟାଳୟ ଭଞ୍ଜବିହାରରେ ଏକ ଏମ୍ପ୍ଲୟମେଣ୍ଟ ଏକ୍ସଚେଞ୍ଜ ରହିଛି। ଦକ୍ଷିଣ ଓଡିଶାର ୧୦ ଜିଲା ଯଥା ଗଞ୍ଜାମ, ନବରଙ୍ଗପୁର, କଳାହାଣ୍ଡି, ଗଜପତି, କନ୍ଧମାଳ,ବୌଦ୍ଧ, ନୂଆପଡା, କୋରାପୁଟ,ମାଲକାନଗିରି ଏବଂ ରାୟଗଡା । ଏହି ସବୁ ଜିଲାର ଯେଉଁ ସବୁ ଯୁବତୀଯୁବକମାନେ ସ୍ନାତକ ପାଠପଢା ସାରିଥିବେ ସେମାନେ ଏହି କେନ୍ଦ୍ରରେ ନାମ ପଞ୍ଜୀକରଣ କରିଥାନ୍ତି । ଏହା ହେଉଛି ଦକ୍ଷିଣ ଓଡିଶାର ଏକମାତ୍ର ନାମ ପଞ୍ଜୀକରଣ କେନ୍ଦ୍ର। ଶହ ଶହ କି.ମି. ଅତିକ୍ରମ କରି ଚାକିରି ଆଶାରେ ଯୁବତୀ ଯୁବକମାନେ ଟଙ୍କା ଖର୍ଚ୍ଚ କରି ନାମ ପଞ୍ଜୀକରଣ କରିବା ପାଇଁ ଆସନ୍ତି । କିନ୍ତୁ ସରକାରଙ୍କ ପକ୍ଷରୁ ଖୋଲାଯାଇଥିବା ଏହି କେନ୍ଦ୍ର ଅବସ୍ଥା କହିଲେ ନ ସରେ। ଏହା ଛୁଟି ଦିନ ବ୍ୟତୀତ ସବୁବେଳେ କାର୍ଯ୍ୟକରିବା କଥା। କିନ୍ତୁ ଏହି କେନ୍ଦ୍ର ସପ୍ତାହକୁ ୩ ଦିନ ଯଥା ସୋମବାର,ବୁଧବାର ଓ ଶୁକ୍ରବାର କାର୍ଯ୍ୟ କରୁଛି। ଅନେକ ସମୟରେ ବନ୍ଦ ରହୁଥିବାରୁ ପଞ୍ଜୀକରଣ କରିବା ପାଇଁ ଆସୁଥୁବା ଯୁବତୀ ଯୁବକମାନେ ନିରାଶରେ ଫେରୁଛନ୍ତି। ବିଶ୍ୱବିଦ୍ୟାଳୟ କର୍ତ୍ତୃପକ୍ଷ ଯୋଗାଇ ଦେଇଥିବା ଏହି କୋଠା କେତେବେଳେ କେଉଁ ମୁହୂର୍ତ୍ତରେ ଭୁଶୁଡ଼ି ପଡ଼ିବ ତାହା କହି ହେଉ ନାହିଁ। ଏହି କେନ୍ଦ୍ରରେ କାର୍ଯ୍ୟ କରୁଥିବା ଜଣେ ଅଧିକାରୀଙ୍କୁ ପଚାରିବାରୁ ଆମ ପାଖରେ ବର୍ତ୍ତମାନ କର୍ମଚାରୀଙ୍କର ଅଭାବ ରହିଛି। ଫଳରେ ଆମକୁ ଦିନେ ଛାଡି ଦିନେ ଆସିବାକୁ ପଡୁଛି । ଏହି ବିଷୟରେ ଆମେ ଉଚ୍ଚ କର୍ତ୍ତୃପକ୍ଷଙ୍କୁ ଅବଗତ କରିଥିଲୁ, ସେ କିଛି ଶୁଣୁ ନ ଥିବା କହିଛନ୍ତି । ଆମେ ବ୍ରହ୍ମପୁର ଆଞ୍ଚଳିକ କାର୍ଯ୍ୟାଳୟରେ କାମ ସାରି ଆସିବାକୁ ପଡୁଛି ।
ଏହି କେନ୍ଦ୍ରରେ ଆଗରୁ ୨୦୧୨ରେ ୩ ଜଣ କର୍ମଚାରୀ ଥିଲେ । ସେମାନେ ଅବସର ନେବାପରେ ସରକାର ଆଉ ନୂତନ ନିଯୁକ୍ତି ଦେଇନାହାନ୍ତି । ଆମେ ଦୁଇଟି କେନ୍ଦ୍ର ବୁଝିବା ଦ୍ୱାରା ବହୁତ କଷ୍ଟ ହେଉଛି। ଦିନକୁ ପ୍ରାୟ ୩୫ରୁ ଊର୍ଦ୍ଧ୍ୱ ଯୁବତୀ, ଯୁବକ ନାମ ପଞ୍ଜୀକରଣ କରିବା ପାଇଁ ଆସିଥାନ୍ତି। ଏହି କେନ୍ଦ୍ରରେ ଯୁବତୀ ଯୁବକମାନଙ୍କୁ କର୍ମନିଯୁକ୍ତି ପ୍ରଶିକ୍ଷଣଠାରୁ ଆରମ୍ଭ କରି ବିଭିନ୍ନ ପ୍ରତିଯୋଗିତାମୂଳକ ବହିପତ୍ର ଯୋଗାଇ ଦିଆଯାଉଥିଲା । ଏବେ ଏହି ସବୁ ବନ୍ଦ ରହିଛି । ଏ ସମ୍ପର୍କରେ ବ୍ରହ୍ମପୁରରେ ଥିବା ଉପ ମହାନିର୍ଦ୍ଦେଶକ ରାବଣ ମୂର୍ତ୍ତି କିଲାନଙ୍କ ସହ ଯୋଗାଯୋଗ କରିବାରୁ ସେ କହିଲେ ସେଠି କୌଣସି କର୍ମଚାରୀଙ୍କୁ ସରକାର ନିଯୁକ୍ତି ଦେଇନାହାନ୍ତି । ସେ କେନ୍ଦ୍ର ବନ୍ଦ ହୋଇଯିବା କଥା, ଯେହେତୁ ଏତେ ଦୂରରୁ ପିଲାମାନେ ଆସୁଛନ୍ତି ସମାନଙ୍କର ଅସୁବିଧା ନ ହେବା ପାଇଁ ଆମ କର୍ମଚାରୀଙ୍କୁ ପଠାଉଛୁ। କୋଠା ମରାମତି ପାଇଁ ବିଶ୍ୱବିଦ୍ୟାଳୟର କୁଳସଚିବଙ୍କୁ ଭେଟି ବାରମ୍ବାର ଜଣାଇଲେ ମଧ୍ୟ ସେ କୌଣସି ପଦକ୍ଷେପ ନେଉ ନାହାନ୍ତି। ଯେହେତୁ ଏହି କୋଠା ବିଶ୍ୱବିଦ୍ୟାଳୟ ଆମକୁ ଦେଇଛି । ସେ ଏହାର ମରାମତି କରିବା କଥା, କିନ୍ତୁ ସେମାନେ ଆମ କଥା ଶୁଣୁନାହାନ୍ତି । କୋଠା ମରାମତି ପାଇଁ ବିଶ୍ୱବିଦ୍ୟାଳୟର କୁଳସଚିବ ରଞ୍ଜନ କୁମାର ବିଶ୍ୱାଳଙ୍କୁ ପଚାରିବାରୁ ସେ ଏହାକୁ ଏଡାଇବା ସହିତ, ସେଠାକୁ କୌଣସି ପିଲା ଆସୁନାହାନ୍ତି। ଯାହା ଭଲ ହେବ ଆମେ ତାହା କରିବୁ ବୋଲି କହିଥିଲେ।
