ଗୟା, ୨୮ା୮(ପି.ଟି.): ବିହାରର ଗୟା ଜିଲାରେ ଜଣେ ନାବାଳିକାଙ୍କୁ କେତେକ ଯୁବକ ଗାଡ଼ିରେ ଜୋରଜବରଦସ୍ତ ଉଠାଇନେଇ ଗଣବଳାତ୍କାର କରିବା ପରେ ପଞ୍ଚାୟତର ନିର୍ଦ୍ଦେଶ କ୍ରମେ ଉକ୍ତ ପୀଡ଼ିତାଙ୍କୁ ଲଣ୍ଡା କରି ଗାଁ ଦାଣ୍ଡରେ ବୁଲାଇବା ଘଟଣା ସମସ୍ତଙ୍କୁ ସ୍ତବ୍ଧ କରିଛି। ୬ ଯୁବକ ସ୍ଥାନୀୟ ପଞ୍ଚାୟତ ଛାତ ଉପରେ ନାବାଳିକାଟିକୁ ବେହୋସ୍ କଲା ପର୍ଯ୍ୟନ୍ତ ବଳାତ୍କାର କରିଥିବା ପୋଲିସ କହିଛି। ଜଣେ ଗାଁ ଲୋକ ଏହା ଦେଖି ଖବର ଦେବାରୁ ନାବାଳିକାକୁ ଉଦ୍ଧାର କରାଯାଇଥିଲା। ହେଲେ କେତେକ ପ୍ରଭାବଶାଳୀ ବ୍ୟକ୍ତିଙ୍କ ପ୍ରରୋଚନାରେ ପଞ୍ଚାୟତ ବୈଠକରେ ପୀଡ଼ିତାଙ୍କୁ ସହଯୋଗ କରିବା ପରିବର୍ତ୍ତେ ତାଙ୍କୁ ଲଣ୍ଡା କରାଯାଇ ଗାଁ ଦାଣ୍ଡରେ ବୁଲାଯାଇଥିଲା।
ଘଟଣାଟି ଗତ ୧୪ ତାରିଖରେ ଘଟିଥିବାବେଳେ ସୋମବାର ଏନେଇ ମହିଳା ଥାନାରେ ମାମଲା ରୁଜୁ କରାଯାଇଥିଲା। ପୀଡ଼ିତା ଓ ତାଙ୍କ ମା ଏନେଇ ବରିଷ୍ଠ ପୋଲିସ ଅଧିକାରhୀଭ୍କୁ ଜଣାଇଥିଲେ। ଏହି ଘଟଣାରେ ପୋଲିସ ୬ ଜଣଙ୍କୁ ଅଟକ ରଖି ପଚରାଉଚରା କରୁଥିବା ଜଣାପଡ଼ିଛି। ପୀଡ଼ିତାଙ୍କୁ ଦଣ୍ଡାଦେଶ ଦେଇଥିବା ୫ ପଞ୍ଚାୟତ ପ୍ରତିନିଧୀଙ୍କ ବିରୋଧରେ ପୋକ୍ସୋ ଆଇନ ଲାଗିଥିବା ଜଣାପଡ଼ିଛି। ବଳାତ୍କାର କରିଥିବା ଅଭିଯୁକ୍ତ ଦେବଲାଲ୍ ଯାଦବଙ୍କୁ ପୀଡ଼ିତା ଚିହ୍ନଟ କରିବା ପରେ ଗିରଫ କରାଯାଇଛି। ଅନ୍ୟମାନେ ଫେରାର ଥିବାବେଳେ ପୋଲିସ ଅନୁସନ୍ଧାନ ଜାରି ରହିଥିବା ମୋହନପୁର ପୋଲିସଷ୍ଟେଶନ ଇନ୍ଚାର୍ଜ ରବିଭୂଷଣ ପ୍ରକାଶ କରିଛନ୍ତି।
