ନୟାଗଡ଼ ଅଫିସ,୬।୧୧-ନୟାଗଡ଼ ଜିଲା ଓଡ଼ଗାଁ ପୋଲିସ ଜଣେ ନାବାଳକଙ୍କୁ ସାବାଳକ ଦର୍ଶାଇ ଜେଲ୍କୁ ପଠାଇଛନ୍ତି। ସମ୍ପୃକ୍ତ ନାବାଳକ ୩ ମାସ ହେଲାଣି ନୟାଗଡ଼ ଖୁଣ୍ଟୁବନ୍ଧସ୍ଥିତ ଉପକାରାଗାରରେ ରହି ଆସୁଛନ୍ତି।
ଯେ, ଓଡ଼ଗାଁ ଥାନା ବନ୍ଧସାହି ଗ୍ରାମର ଜଣେ ୧୭ ବର୍ଷୀୟ ନାବାଳକଙ୍କୁ ଗତ ଅଗଷ୍ଟ ୨୫ ତାରିଖରେ ଓଡ଼ଗାଁ ପୋଲିସ ଏକ ଚୋରି ମାମଲାରେ ଗିରଫ କରିଥିଲା। ତାଙ୍କୁ କୋର୍ଟଚାଲାଣ ପରେ ଜେଲକୁ ପଠାଇ ଦିଆଯାଇଥିଲା। ଫଳରେ ନାବାଳକ ଜଣଙ୍କ ୩ ମାସ ହେଲାଣି ଉପକାରାଗାରରେ ରହି ଆସୁଛନ୍ତି। ଜିଲା କିଶୋର ନ୍ୟାୟ ପରିଷଦର ସଦସ୍ୟ କିଶୋର ଚନ୍ଦ୍ର ମହାପାତ୍ର କିଛିଦିନ ତଳେ ଉପକାରାଗାରକୁ ପରିଦର୍ଶନରେ ଯାଇଥିବାବେଳେ ନାବାଳକ ଜଣଙ୍କ ଜେଲ୍ରେ ରହି ଆସୁଥିବା ଜାଣିବାକୁ ପାଇଥିଲେ। ପରେ ତାଙ୍କ ପରିବାର ସହିତ ଏ ନେଇ ଆଲୋଚନା କରିବାରୁ ନାବାଳକଙ୍କ ମାଆ ସେ ପଢ଼ିଥିବା ବିଦ୍ୟାଳୟରୁ ସାଟିର୍ଫିକେଟ ଆଣି ଦେଖାଇଥିଲେ। ନାବାଳକଙ୍କ ଜନ୍ମ ୫ ଫେବୃୟାରୀ ୨୦୦୨ ଦର୍ଶାଯାଇଛି। ନାବାଳକଙ୍କୁ ୧୭ ବର୍ଷ ହୋଇଥିବାରୁ କିଶୋର ନ୍ୟାୟ ପରିଷଦ ଓଡ଼ଗାଁ ଜେଏମ୍ଏଫସି କୋର୍ଟଙ୍କୁ ଏହାର ତଦନ୍ତ କରିବାକୁ ଅନୁରୋଧ କରିଛନ୍ତି। ଜଣେ ନାବାଳକଙ୍କୁ ଓଡ଼ଗାଁ ପୋଲିସ କିପରି ଭାବେ ସାବାଳକ ଦେଖାଇ ଜେଲ୍କୁ ପଠାଇଲା ତାହାକୁ ନେଇ ପୋଲିସର କାର୍ଯ୍ୟଦକ୍ଷତା ପ୍ରତି ଅଙ୍ଗୁଳି ନିର୍ଦ୍ଦେଶ ହେଉଛି। ଏକ ଚୋରି ମାମଲାରେ ନାବାଳକଙ୍କୁ ଘରୁ ପୋଲିସ ଉଠାଇ ଆଣିଥିଲା। ଏ ନେଇ ନାବାଳକଙ୍କ ମାଆ ପ୍ରତିବାଦ କରିଥିଲେ ମଧ୍ୟ ପୋଲିସ ଶୁଣି ନ ଥିଲା। ଏପରିକି ନାବାଳକଙ୍କ ମାଆ ପାଟି ଖୋଲିଲେ ତାଙ୍କୁ ଜେଲ୍ ପଠାଇବାକୁ ମଧ୍ୟ ପୋଲିସ ଧମକ ଦେଇଥିଲା। ଜିଲା କିଶୋର ନ୍ୟାୟ ପରିଷଦର ସଦସ୍ୟ କିଶୋର ଚନ୍ଦ୍ର ମହାପାତ୍ର କୁହନ୍ତି ସମ୍ପୃକ୍ତ ନାବାଳକଙ୍କ ବିଷୟରେ ଜାଣିବା ପରେ ଆମେ ଓଡ଼ଗାଁ ଜେଏମ୍ଏଫସି କୋର୍ଟଙ୍କୁ ଏହାର ତଦନ୍ତ କରିବାକୁ ଅନୁରୋଧ କରିଛୁ। ଅନ୍ୟପକ୍ଷେ ତଦନ୍ତ ସମୟରେ ଭାରପ୍ରାପ୍ତ ଥାନା ଅଧିକାରୀ ଆଧାର କାର୍ଡରୁ ପିଲାର ବୟସ ୨୦ ବର୍ଷ ହୋଇଥିବାରୁ ତାଙ୍କୁ ଗିରଫ କରି ଜେଲ୍କୁ ପଠାଯାଇଥିବା ନେଇ ଜଣେ ପୋଲିସ କର୍ମଚାରୀ ପ୍ରକାଶ କରିଛନ୍ତି। ଯଦି ନାବାଳକ ଜଣଙ୍କ ଅଭିଯୁକ୍ତ ତାହାହେଲେ ତାଙ୍କୁ ସୁଧାର ଗୃହକୁ ନ ପଠାଇ କିପରି ଭାବେ ପୋଲିସ ତାଙ୍କୁ ଜେଲ୍ ପଠାଇଲା ତାହା ଏବେ ଚର୍ଚ୍ଚାର ବିଷୟ ପାଲଟିଛି। ନାବାଳକଙ୍କୁ ଉପଯୁକ୍ତ ନ୍ୟାୟ ପାଇଁ ତାଙ୍କ ମାଆ ଦାବି କରିଛନ୍ତି।
