ପୁରୀ ଅଫିସ,୨୮।୫: ଜୁନ୍ ୨୩ରେ ରଥଯାତ୍ରା। ଏଥିପାଇଁ ରଥଖଳାରେ ମହାପ୍ରଭୁଙ୍କ ତିନିରଥ ନିର୍ମାଣ କାମ ଆଗେଇ ଚାଲିଛି। ବୁଧବାର ପାଶଦଣ୍ଡାରେ କୁଡୁକା ଲାଗି ହୋଇ ପାର୍ଶ୍ୱ ମୁହଁାଟ ଲାଗିଛି। ଏହାପରେ ପାର୍ଶ୍ୱ ମୁହଁାଟ ଉପରେ ଗୁଜ ଏବଂ ଜଳଯନ୍ତ୍ର (ପାର୍ଶ୍ୱ ଦେବଦେବୀଙ୍କ ଆସ୍ଥାନ) ଲାଗିଛି। ଏଥିରେ ନିରାଡ଼ି ଖଞ୍ଜା ବାକି ରହିଛି। ସେହିପରି ରଥଖଳାରେ ଧୂଳିଦଣ୍ଡାର ଚଉପଟ କରାଯାଉଛି। ପ୍ରତି ରଥରେ ଦୁଇଟି ଲେଖାଏ ୨୦ ଫୁଟିଆ ଧୂଳିଦଣ୍ଡା ଲାଗିଥାଏ। ମହାପ୍ରଭୁ ରଥରେ ବିଜେ ହେବାପରେ ରୁନ୍ଧା ହେବା ପାଇଁ ପଛ ପାର୍ଶ୍ୱରେ ପ୍ରଭା ଦେହରେ ଏହାକୁ ଯୋଡ଼ା ଯାଇଥାଏ। ପ୍ରତିରଥରେ ଲାଗୁଥିବା ୫ଟି ଲେଖାଏ ଜଗତପୃଷ୍ଠ ଶେଣୀର ଚଉପଟ ଶେଷ ହୋଇଛି। ରୂପକାର ସେବକଙ୍କ ଦ୍ୱାରା ସମସ୍ତ ଗୁଜରେ ସିଂହବିରାଳ ରୂପ ଖୋଦେଇ ଏବଂ ପଲିସ୍ କାମ ଶେଷ ହୋଇଛି। ମଙ୍ଗଳବାରଠାରୁ ଆରମ୍ଭ ହୋଇଥିବା ନାଟଗୋଡ଼ରେ ରାହୁ ମୂର୍ତ୍ତି ଅଙ୍କାଯାଇ ତାହାକୁ ଖୋଦେଇ କରାଯାଉଛି। ଦୋଳବେଦୀଠାରେ ନନ୍ଦିଘୋଷ ରଥର ଗୋଲାଗୟଳ ଚିରଟ କାର୍ଯ୍ୟ କରତି ସେବକଙ୍କ ଦ୍ୱାରା ଶେଷ ହୋଇଛି। ଗୁରୁବାର ଏହାର ଚଉପଟ କାମ ଆରମ୍ଭ ହେବ ବୋଲି ଜଣାପଡ଼ିଛି। ସେହିପରି ଦୋଳବେଦୀ ପରିସର ଅସ୍ଥାୟୀ କମାର ଶାଳରେ ଓଝା ସେବକମାନେ ଆବଶ୍ୟକ ଦଣ୍ଡା କଣ୍ଟା, ଗୟଳ କଣ୍ଟା, ଯୋଖା ଏବଂ ଗୋଡ଼ିଛାଲ କଣ୍ଟା ତିଆରି କାମ ଜାରି ରଖିଛନ୍ତି। ସକାଳେ ରଥଖଳାରେ କାମ ଆରମ୍ଭ ପୂର୍ବରୁ ରଥ ନିର୍ମାଣରେ ସମ୍ପୃକ୍ତ ସେବକମାନଙ୍କ ଥର୍ମାଲ ସ୍କ୍ରିନିଂ କରାଯାଇଥିଲା। ସମସ୍ତ ସେବକ ସୁସ୍ଥ ଥିବା ଜଣାପଡିଛି।
