ନୂଆଦିଲ୍ଲୀ,୨୫ା୩(ପି.ଟି.): ଘାତକ କରୋନା ସଂକ୍ରମଣକୁ ରୋକିବା ପାଇଁ ଦେଶରେ ନୈରାଶ୍ୟବାଦ ଓ ନକାରାମତ୍କତାର ମୁକାବିଲା ଜରୁରୀ। ଗୁଜବ ପ୍ରସାର ନ ହେବା ଦିଗରେ ମଧ୍ୟ ଗଣମାଧ୍ୟମ ବିଶେଷ ଦୃଷ୍ଟି ଦେବା ଆବଶ୍ୟକ ବୋଲି ମଙ୍ଗଳବାର ବରିଷ୍ଠ ଖବରଦାତାମାନଙ୍କୁ ପରାମର୍ଶ ଦେଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ବର୍ତ୍ତମାନ ସମୟରେ ଲୋକଙ୍କୁ ସଚେତନ କରିବାରେ ପ୍ରିଣ୍ଟ ଗଣମାଧ୍ୟମର ଭୂମିକାକୁ ସେ ପ୍ରଶଂସା କରିଛନ୍ତି। ଏହି ଭିଡିଓ କନ୍ଫରେନ୍ସିଂ କାର୍ଯ୍ୟକ୍ରମରେ ଓଡ଼ିଶାାରୁ ‘ଧରିତ୍ରୀ’ ଓ ‘ଓଡ଼ିଶା ପୋଷ୍ଟ’ ସମ୍ପାଦକ ତଥାଗତ ସତପଥୀ ଏବଂ ‘ସମ୍ବାଦ’ ସମ୍ପାଦକ ସୌମ୍ୟରଞ୍ଜନ ପଟ୍ଟନାୟକ ଭାଗନେଇଥିଲେ।
ନୂଆଦିଲ୍ଲୀରୁ ଭିଡିଓ କନ୍ଫରେନ୍ସି ଜରିଆରେ ମୁଦ୍ରଣ ଗଣମାଧ୍ୟମ ସହିତ ଜଡ଼ିତ ବିଭିନ୍ନ ରାଜ୍ୟର ବରିଷ୍ଠ ଖବରଦାତାମାନଙ୍କ ସହ ଭାବ ବିନିମୟ କରିଛନ୍ତି। ପ୍ରଧାନମନ୍ତ୍ରୀ କହିଛନ୍ତି, କୋଭିଡ୍-୧୯ର ପ୍ରଭାବ ହ୍ରାସ ପାଇଁ ସରକାର ପ୍ରତିଶ୍ରୁତିବଦ୍ଧ ବୋଲି ନାଗରିକମାନଙ୍କୁ ଆଶ୍ୱସ୍ତ କରିବା ଦରକାର। ଜାତୀୟ ନିରାପତ୍ତାର ସୁରକ୍ଷା ଲାଗି ସାମାଜିକ ଏକତା ବୃଦ୍ଧି କରିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଆଲୋଚନା ବେଳେ ମୋଦି ଗଣମାଧ୍ୟମକୁ ସରକାର ଓ ଲୋକଙ୍କ ମଧ୍ୟରେ ସେତୁ ଭଳି କାର୍ଯ୍ୟ କରିବା ସହ ଜାତୀୟ ତଥା ଆଞ୍ଚଳିକ ସ୍ତରରେ ନିରନ୍ତର ଫିଡ୍ବ୍ୟାକ୍ ଦେବା ପାଇଁ ପରାମର୍ଶ ଦେଇଛନ୍ତି। ଏହି ଅବସରରେ ପ୍ରଧାନମନ୍ତ୍ରୀ ସାମାଜିକ ଦୂରତ୍ୱର ମହତ୍ତ୍ୱକୁ ଗୁରୁତ୍ୱ ଦେଇ ସଚେତନା ସୃଷ୍ଟି, ରାଜ୍ୟଗୁଡ଼ିକ ପକ୍ଷରୁ କରାଯାଉଥିବା ଲକ୍ଡାଉନ୍ ନିଷ୍ପତ୍ତି ଉପରେ ଲୋକଙ୍କୁ ଅବଗତ କରାଇବା ପାଇଁ ଅନୁରୋଧ କରିଛନ୍ତି। ଏହାସହ ଖବରକାଗଜରେ କରୋନା ଭାଇରସ୍ର ବିସ୍ତାର ନେଇ ଅନ୍ତଜାତୀୟ ତଥ୍ୟକୁ ଅନ୍ତର୍ଭୁକ୍ତ ଏବଂ ଅନ୍ୟ ଦେଶଗୁଡ଼ିକର କେସ୍ ଷ୍ଟଡିଗୁଡ଼ିକର ଅବତାରଣା କରିବା ପାଇଁ ମୋଦି ଗୁରୁତ୍ୱାରୋପ କରିଛନ୍ତି ବୋଲି ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ (ପିଏମ୍ଓ) ପକ୍ଷରୁ ଜାରି ଏକ ବିବୃତିରେ କୁହାଯାଇଛି। ଏହି ଅବସରରେ ପ୍ରଧାନମନ୍ତ୍ରୀ ଯୋଗଦାନକାରୀମାନଙ୍କୁ ସେମାନଙ୍କ ଫିଡ୍ବ୍ୟାକ୍ ପାଇଁ ଧନ୍ୟବାଦ ଦେବା ସହ ବଞ୍ଚତ୍ତ ବର୍ଗର ଲୋକଙ୍କ ପ୍ରତି ସାମାଜିକ ଉତ୍ତରଦାୟିତ୍ୱ ତୁଲାଇବାକୁ ମଧ୍ୟ ସ୍ମରଣ କରାଇଛନ୍ତି। ଦେଶରେ କରୋନା ଭାଇରସ୍ ସଂକ୍ରମଣ ରୋକିବା ପାଇଁ ପ୍ରଧାନମନ୍ତ୍ରୀଙ୍କ ଏହି ପ୍ରଭାବଶାଳୀ ଭୂମିକାକୁ ପ୍ରିଣ୍ଟ ମିଡିଆର ଜର୍ନାଲିଷ୍ଟମାନେ ପ୍ରଶଂସା କରିଛନ୍ତି। ଦେଶର ୧୪ଟି ସ୍ଥାନରୁ ୧୧ଟି ଭାଷାରେ ପ୍ରକାଶିତ ଖବରକାଗଜର ୨୦ ଜଣ ଖବରଦାତା ପ୍ରଧାନମନ୍ତ୍ରୀଙ୍କ ସହ ଭାବବିନିମୟ କରିଥିଲେ।