ଜୟପୁର,୧।୬: ଜଣେ ନକଲି ଆଇପିଏସ୍ ଅଫିସରଙ୍କୁ ଏସଓଜି ଗିରଫ କରିଛି। ନକଲି ଆଇପିଏସ୍ ହୋଇ ଲୋକଙ୍କ ଲୁଟୁଥିବା ଅଭୟ ମୀଣା ଦ୍ୱାଦଶ ଫେଲ ହୋଇଥିଲେ ମଧ୍ୟ ଦିଲ୍ଲୀ ଆଇଆଇଟିରୁ ବିଟେକ୍ ପାଶ୍ କରିଥିବା ଦର୍ଶାଇଥିଲେ। ସବାଇମାଧୋପୁରର ପିଲୋନ୍ଦା ଗାଁରେ ବାସ କରୁଥିବା ଅଭୟ ସ୍ଥାନୀୟ ପ୍ରତାପନଗରୀ ଥାନା ଅଞ୍ଚଳରେ ଏକ ଫ୍ଲାଟ୍ରେ ଭଡ଼ାରେ ରହୁଥିଲେ। ତାଙ୍କ ସହିତ ଉତ୍ତରାଖଣ୍ଡର ଜଣେ ଯୁବତୀ ଲିଭ୍ଇନ୍ରେ ମଧ୍ୟ ରହୁଥିବା ଏସଓଜି ଆଡିଶନାଲ୍ ଏସ୍ପି କରନ ଶର୍ମା ସୂଚନା ଦେଇଛନ୍ତି। ଅଭୟଙ୍କ ବିଷୟରେ ଏକ ଫୋନ୍ କଲ୍ ମାଧ୍ୟମରେ ସୂଚନା ପାଇ ୩ଟି ଯାଞ୍ଚ୍ ଦଳ ଗଠନ କରାଯାଇଥିଲା। ପ୍ରଥମ ଦଳ ସ୍ବରାଷ୍ଟ୍ର ବିଭାଗରେ ତାଙ୍କର ଚାକିରି ତଥ୍ୟ ଖୋଜିଥିବାବେଳେ ଦ୍ୱିତୀୟ ଦଳ ସୋସିଆଲ୍ ମିଡିଆ ଆକାଉଣ୍ଟ୍ ଯାଞ୍ଚ୍ କରିଥିଲା। ସେହିପରି ତୃତୀୟ ଦଳ ଅଭୟଙ୍କର ସମସ୍ତ କାର୍ଯ୍ୟ ଉପରେ ନଜର ରଖିଥିଲା। ଅଭୟଙ୍କ ପାଖରୁ ନକଲି ପରିଚୟ ପତ୍ର ସମେତ ଅନେକ ନକଲି କାଗଜପତ୍ର ଜବତ ହୋଇଛି। ତାଙ୍କର ପ୍ରଥମ ପୋଷ୍ଟିଂ ସିଆଇଡି-ସିବି ଏସ୍ପି ଭାବେ ହୋଇଥିବା ସେ ଲୋକଙ୍କୁ କହୁଥିଲେ। ସେ ରାଜସ୍ଥାନ, ହରିୟାଣା, ପଞ୍ଜାବ, ଚଣ୍ଡିଗଡ଼, ଦିଲ୍ଲୀ, ମୁମ୍ବାଇ ଆଦି ସ୍ଥାନ ଟୁର୍ କରି ବଡ଼ ବଡ଼ ପାର୍ଟିରେ ଯୋଗଦେଉଥିବା ଜଣାପଡ଼ିଛି। ସୋସିଆଲ୍ ମିଡ଼ିଆରେ ଅନେକ ପୋଲି ଅଫିସର ତାଙ୍କ ସହିତ ବନ୍ଧୁତା କରିଥିବା ଜଣାପଡ଼ିଛି।
