ନଈକୁ ଡେଇଁ ମଧ୍ୟ ଖସି ପାରିଲେନି ଅପରାଧୀ
2:47 pmApril 18, 2020April 18, 2020 / 54

ଝାରସୁଗୁଡା ଅଫିସ,୧୮ା୪- ଝାରସୁଗୁଡା ପୋଲିସ ଚୋରି ଅଭିଯୋଗରେ ୨ ଜଣ ଅଭିଯୁକ୍ତଙ୍କୁ ଗିରଫ କରିଛି। ଏମାନେ ହେଲେ ଝାରସୁଗୁଡ଼ା ସହର ସିରିଆ ବଗିଚା ଅଞ୍ଚଳର ମନିଷ ମୋର୍ଯ୍ୟ ଏବଂ ଟିଙ୍କୁ ବିଶୋୟୀ। ପୋଲିସ ପିଛା କରିବାରୁ ମନିଷ ବ୍ରିଜ ଉପରୁ ନଦୀକୁ ଡେଇଁ ଖସି ଯିବାକୁ ଉଦ୍ୟମ କରିଥିଲେ। ହେଲେ ଗାଁ ଲୋକେ ତାଙ୍କୁ ଧରି ନେଇଥିଲେ। ଟିଙ୍କୁଙ୍କୁ ପୋଲିସ ଦୌଡି ଦୌଡି ଧରିଥିଲା। ସୂଚନାଯୋଗ୍ୟ, ଝାରସୁଗୁଡା ସହରର ବିଭିନ୍ନ ସ୍ଥାନରୁ ଗତ ୧୪ ତାରିଖ ରାତିରେ ଘରର କବାଟ ଓ ଝରକା ତାଡି ଚୋରି ହୋଇଥିଲା। ୧୫ ତାରିଖ ଏ ନେଇ ଅଭିଯୋଗ ହେବା ପରେ ପୋଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା। ତଦନ୍ତ ବେଳେ ଏକ ସିସି ଟିଭି ଫୁଟେଜ ପୋଲିସର ହସ୍ତଗତ ହୋଇଥିଲା। ଏଥରୁ ଅଭିଯୁକ୍ତଙ୍କୁ ଚିହ୍ନଟ କରିଥିଲା ପୋଲିସ। କୁତାବଗା ଗାଁରେ ସେମାନେ ଲୁଚିଥିବା ପୋଲିସକୁ ଖବର ମିଳିବା ପରେ ପୋଲିସ ଚଢ଼ାଉ କରିଥିଲା। ହେଲେ ପୋଲିସକୁ ଦେଖି ମନିଷ ଓ ଟିଙ୍କୁ ଦୌଡି ପଳାଇଥିଲେ। ମନିଷ ଇବ୍‌ ନଦୀ ବ୍ରିଜ ଉପରୁ ଡେଇଁ ପଡି ଖସିଯିବାକୁ ଉଦ୍ୟମ କରିଥିଲେ। ସ୍ଥାନୀୟ ଲୋକେ ରୁଣ୍ଡ ହୋଇଯାଇଥିଲେ। ପାଖ ଗାଁ ଲୋକେ କିନ୍ତୁ ଏହି ଖବର ପାଇ ଯାଇଥିଲେ। ଶେଷରେ ମରାକୁଟା ଗାଁ ଲୋକେ ମନିଷଙ୍କୁ ନଦୀ ଭିତରୁ ଧରି ପୋଲିସ ଜିମା ଦେଇଥିଲେ। ତେବେ ସେମାନଙ୍କ ନିକଟରୁ ପୋଲିସ ବିଭିନ୍ନ ସାମଗ୍ରୀ ଜବତ କରିଛି।