ବରଗଡ ଅଫିସ,୨୦।୧୧: ଚଳିତ ଖରିଫ ଧାନ ସଂଗ୍ରହ ପ୍ରକ୍ରିୟାରେ ରାଜ୍ୟ ସରକାର ଟୋକନ ବ୍ୟବସ୍ଥାକୁ ବାଧ୍ୟତାମୂଳକ କରିଛନ୍ତି। ସରକାରଙ୍କ ଏହି ବ୍ୟବସ୍ଥାକୁ ଚାଷୀମାନେ ଦୃଢ ବିରୋଧ କରିଛନ୍ତି। ଫଳରେ ଗତ ୧୫ ତାରିଖରୁ ମଣ୍ତି ଖୋଲିଥିଲେ ସୁଦ୍ଧା ଧାନ କିଣାବିକା ଅଚଳ ହୋଇ ପଡିଛି। ଟୋକନ ବ୍ୟବସ୍ଥାକୁ ବିରୋଧ କରି ସୋମବାରଠାରୁ ଚାଷୀମାନେ ବରଗଡ ଜିଲାର ଅତାବିରା, ଭେଡେନ, ବରଗଡ ଅଞ୍ଚଳରେ ତାଲା ପକାଇ ବିଭିନ୍ନ ସରକାରୀ ଅଫିସକୁ ଅଚଳ କରି ଦେଇଥିବାବେଳେ ବୁଧବାର ଅତାବିରାରେ ୧୨ ଘଣ୍ଟିଆ ବନ୍ଦ ପାଳନ କରାଯାଉଛି। ଏଥିପାଇଁ ସକାଳୁ ଅତାବିରା ଅଞ୍ଚଳରେ ଦୋକାନ ବଜାର ବନ୍ଦ ରହିଛି। ସେହିପରି ବନ୍ଦ ପାଳନରେ ସ୍ଥାନୀୟ ସରକାରୀ, ବେସରକାରୀ ଅଫିସକୁ ମଧ୍ୟ ସାମିଲ କରାଯାଇଥିବାବେଳେ ଯାନବାହାନ ଚଳାଚଳ ସ୍ବାଭାବିକ ରହିଛି। ସନ୍ଧ୍ୟା ୬ଟା ପର୍ଯ୍ୟନ୍ତ ବନ୍ଦ ପାଳନ ଜାରି ରହିବ ବୋଲି ଚାଷୀନେତାମାନେ କହିଛନ୍ତି। ଆଇନ ଶୃଙ୍ଖଳା ପରିସ୍ଥିତିକୁ ଦୃଷ୍ଟିରେ ରଖି ବିଭିନ୍ନ ସ୍ଥାନରେ ପୋଲିସ ମୁତୟନ ରହିଥିବା ପରିଲକ୍ଷିତ ହୋଇଛି।
