ନୂଆଦିଲ୍ଲୀ,୨୦ା୬(ପି.ଟି.): ଦେଶରେ ଭିନ୍ନ ଭିନ୍ନ ସମୟରେ ନିର୍ବାଚନ ହେଉଥିବାରୁ ଆର୍ଥିକ ଓ ପ୍ରଶାସନିକ ବୋଝ ବଢ଼ୁଛି। ଏହାକୁ ଏଡ଼ାଇବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପୂର୍ବରୁ ଏକକାଳୀନ ନିର୍ବାଚନ ପାଇଁ ପ୍ରସ୍ତାବ ଦେଇଥିବାବେଳେ ବୁଧବାର ଏସଂକ୍ରାନ୍ତରେ ସହମତି ଲାଗି ଏକ ସର୍ବଦଳୀୟ ବୈଠକ ଡାକିଥିଲେ। ଏଥିରେ କଂଗ୍ରେସ ସମେତ ୭ ବିରୋଧୀ ଦଳ ଯୋଗଦେଇନାହାନ୍ତି। ଏପରି କି ଭାଜପା ନେତୃତ୍ୱାଧୀନ ଏନ୍ଡିଏର ଅଂଶୀଦାର ଶିବସେନା ମଧ୍ୟ ବୈଠକକୁ ବର୍ଜନ କରିଛି।
ସଭା ହେଉ କି ରାଜ୍ୟ ସଭାରେ ଯେଉଁ ଦଳର ଜଣେ ବି ଏମ୍ପି ଅଛନ୍ତି, ସେପରି ସବୁ ଦଳର ଅଧ୍ୟକ୍ଷଙ୍କୁ ‘ଗୋଟିଏ ଦେଶ ଏକ ନିର୍ବାଚନ’ ଲାଗି ଆଲୋଚନା ସକାଶେ ପ୍ରଧାନମନ୍ତ୍ରୀ ମୋଦି ଡାକିଥିଲେ। ପାର୍ଲାମେଣ୍ଟର ଲାଇବ୍ରେରୀ ବିଲ୍ଡିଂରେ ଅନୁଷ୍ଠିତ ସର୍ବଦଳୀୟ ବୈଠକରେ ମମତା ବାନାର୍ଜୀଙ୍କ ତୃଣମୂଳ କଂଗ୍ରେସ (ଟିଏମ୍ସି), ମାୟାବତୀଙ୍କ ବହୁଜନ ସମାଜ ପାର୍ଟି (ବିଏସ୍ପି), ଅଖିଳେଶ ଯାଦବଙ୍କ ସମାଜବାଦୀ ପାର୍ଟି (ଏସ୍ପି), ଏମ୍.କେ. ଷ୍ଟାଲିନ୍ଙ୍କ ନେତୃତ୍ୱାଧୀନ ଡିଏମ୍କେ, ଏନ୍. ଚନ୍ଦ୍ରାବାବୁ ନାଇଡୁଙ୍କ ତେଲୁଗୁ ଦେଶମ୍ ପାର୍ଟି (ଟିଡିପି) ଏବଂ ଲାଲୁ ଯାଦବଙ୍କ ରାଷ୍ଟ୍ରୀୟ ଜନତା ଦଳ (ଆର୍ଜେଡି)ର କୌଣସି ନେତା ଯୋଗଦେଇ ନ ଥିଲେ। ବାମଦଳଗୁଡ଼ିକ ଏଥିରେ ଯୋଗଦେଇଥିବାବେଳେ ଉକ୍ତ ପ୍ରସ୍ତାବକୁ ବିରୋଧ କରିଥିଲେ। ସିପିଆଇଏମ୍ ସାଧାରଣ ସମ୍ପାଦକ ସୀତାରାମ ୟେଚୁରୀ କହିଥିଲେ, ଲୋକ ସଭା ଓ ରାଜ୍ୟ ବିଧାନସଭାଗୁଡ଼ିକ ପାଇଁ ଏକସଙ୍ଗେ ନିର୍ବାଚନ କରାଇବା ହେଉଛି ମୌଳିକଭାବେ ସଂଘୀୟ ବ୍ୟବସ୍ଥା ତଥା ସମ୍ବିଧାନ ବିରୋଧୀ ଏବଂ ଅଗଣତାନ୍ତ୍ରିକ। ସେହିପରି ସିପିଆଇର ଡି. ରାଜା ମଧ୍ୟ ଏହାକୁ ବିରୋଧ କରିଥିଲେ। କଂଗ୍ରେସ ଏହି ପ୍ରସଙ୍ଗରେ ଅନ୍ୟ ବିରୋଧୀ ଦଳଗୁଡ଼ିକ ସହ ପରାମର୍ଶ କରିବା ପରେ ବୈଠକରୁ ଦୂରେଇ ରହିବାକୁ ନିଷ୍ପତ୍ତି ନେଇଥିଲା। ସେହିପରି ଇଲେକ୍ଟ୍ରୋନିକ୍ସ ଭୋଟିଂ ମେଶିନ୍ (ଇଭିଏମ୍) ପ୍ରସଙ୍ଗରେ ସର୍ବଦଳୀୟ ବୈଠକ ଡକାଯାଇଥିଲେ, ସେଥିରେ ଯୋଗଦେଇଥାନ୍ତେ ବୋଲି ବିଏସ୍ପି ସୁପ୍ରିମୋ ମାୟାବତୀ ଟୁଇଟ୍ କରିଛନ୍ତି। ଆମ୍ ଆଦ୍ମୀ ପାର୍ଟି (ଏଏପି) ଆବାହକ ଅରବିନ୍ଦ କେଜ୍ରିଓ୍ବାଲ ଏବଂ ତେଲେଙ୍ଗାନା ରାଷ୍ଟ୍ର ସମିତି (ଟିଆର୍ଏସ୍) ଅଧ୍ୟକ୍ଷ କେ. ଚନ୍ଦ୍ରଶେଖର ରାଓ (କେସିଆର୍) ଏଥିରେ ଯୋଗଦେଇ ନ ଥିବାବେଳେ ତାଙ୍କ ଦଳରୁ ପ୍ରତିନିଧି ପଠାଯାଇଥିବା ଜଣାପଡ଼ିଛି। ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ବୈଠକରେ ଯୋଗଦେବା ଲାଗି ନିମନ୍ତ୍ରଣକୁ ପ୍ରତ୍ୟାଖ୍ୟାନ କରିଥିଲେ। ଏହାସହ ଏହି ପ୍ରସଙ୍ଗରେ ବିଚାରବିମର୍ଶ ପାଇଁ କେନ୍ଦ୍ର ସରକାର ଶ୍ୱେତପତ୍ର ଜାରି କରନ୍ତୁ ବୋଲି ସେ ଦାବି କରିଥିଲେ। ୟୁପିଏର ଅଂଶୀଦାର ଦଳଗୁଡ଼ିକ ମଙ୍ଗଳବାର ସନ୍ଧ୍ୟାରେ ପାର୍ଲାମେଣ୍ଟରେ ଏକ ବୈଠକ କରି ଏହି ପ୍ରସଙ୍ଗରେ ଆଲୋଚନା କରିଥିଲେ। ଚୂଡ଼ାନ୍ତ ନିଷ୍ପତ୍ତି ନେବା ପୂର୍ବରୁ ସମଭାବାପନ୍ନ ଦଳଗୁଡ଼ିକ ସହ ଆଲୋଚନା କରିବାକୁ ସହମତ ହୋଇଥିଲେ।
କେନ୍ଦ୍ରମନ୍ତ୍ରୀ ରାଜନାଥ ସିଂ, ଅମିତ୍ ଶାହ, ନୀତିନ ଗଡ଼କରୀ, ପ୍ରହ୍ଲାଦ ଜୋଷୀ, ଭାଜପା କାର୍ଯ୍ୟକାରୀ ଅଧ୍ୟକ୍ଷ ଜେ.ପି. ନଡ୍ଡା ଯୋଗଦେଇଥିବାବେଳେ ଶିବସେନାକୁ ବାଦ୍ଦେଲେ ଏନ୍ଡିଏର ଅନ୍ୟ ଅଂଶୀଦାର ଦଳଗୁଡ଼ିକ ସାମିଲ ହୋଇଥିଲେ।
