ଯାଜପୁର ଅଫିସ,୨୦।୮- ଯାଜପୁର ଜିଲାର ସର୍ବାଧିକ ସରକାରୀ ରାଜସ୍ବ ଆଦାୟ ହେଉଥିବା ଧର୍ମଶାଳା ପଞ୍ଚାୟତ ସମିତି (ବ୍ଲକ)ରେ ବ୍ୟାପକ ଦୁର୍ନୀତିର ଗନ୍ଧ ବାରି ହୋଇଛି। ଏହି ବ୍ଲକରେ ବିଭିନ୍ନ ଉନ୍ନୟନ କାର୍ଯ୍ୟରେ ହେରାଫେରି ଯୋଗୁ ୨୦ଲକ୍ଷ ୯୩ ହଜାର ୭୮୮ ଟଙ୍କା ଅସୁଲି କରିବାକୁ ଅଡିଟ ଟିମ୍ ନିର୍ଦ୍ଦେଶ ଦେଇଛି। ଖାଲି ସେତିକି ନୁହେଁ, ୧କୋଟି ୬୨ଲକ୍ଷ ୮୦ହଜାର ଟଙ୍କା ଦେଣନେଣ ଉପରେ ଅଡିଟ ଟିମ୍ ଆପତ୍ତି ଉଠାଇଛି। ଏହାବାଦ୍ ଧର୍ମଶାଳା ବ୍ଲକରେ ଚାଲିଥିବା ବିଭିନ୍ନ ଜନହିତକର ଯୋଜନାରେ ଆବଶ୍ୟକ ରେକର୍ଡ ବ୍ୟବହାର ନ କରି ଅଡିଟ ଟିମ୍କୁ ଭୁଆଁ ବୁଲାଇବାକୁ ଉଦ୍ୟମ କରାଯାଇଛି। ବିଡମ୍ବନା ଯେ, ବହୁ ଗୁରୁତ୍ୱପୂର୍ଣ୍ଣ ୧୩ଟି ରେକର୍ଡ/ରେଜିଷ୍ଟର ବ୍ୟବହାର ହୋଇ ନ ଥିବାବେଳେ ୮ଟି ରେକର୍ଡ/ରେଜିଷ୍ଟର ଅଡିଟ ଟିମ୍ ସମ୍ମୁଖରେ ଦାଖଲ ହୋଇପାରି ନାହିଁ। ଏଥିଯୋଗୁ ଖର୍ଚ୍ଚ ନିୟନ୍ତ୍ରଣ କ୍ରିୟା ଠିକ୍ଭାବେ ହୋଇପାରି ନ ଥିବା ଅଡିଟ ରିପୋର୍ଟର ୩.୨ ପାରାରେ ଦର୍ଶାଯାଇଛି। ଅଞ୍ଚଳର ବିକାଶରେ ଗୁରୁତ୍ୱପୂର୍ଣ୍ଣ ଭୂମିକା ନେଉଥିବା ବିଧାନସଭା ସଦସ୍ୟ ଆଞ୍ଚଳିକ ଉନ୍ନୟନ ପାଣ୍ଠି (ଏମ୍ଏଲ୍ଏ ଲ୍ୟାଡ)ର ବିନିଯୋଗରେ ବ୍ୟାପକ ଅନିୟମିତତା ହୋଇଥିବା ଅଡିଟରେ ଧରାପଡିଛି। ଅଡିଟ ଟିମ୍ ବିଭିନ୍ନ ଉନ୍ନୟନମୂଳକ କାର୍ଯ୍ୟର ଖର୍ଚ୍ଚ ଉପରେ ପ୍ରଶ୍ନ କରିଥିବାବେଳେ ଜିଲା ପ୍ରଶାସନ ଓ ସ୍ଥାନୀୟ ଲୋକ ପ୍ରତିନିଧି ନିରବ ରହି ଏଭଳି ଅନିୟମିତତାକୁ ପରୋକ୍ଷରେ ସହଯୋଗ କରୁଥିବା ମନେହେଉଛି ା
୪୩ଟି ଗ୍ରାମ ପଞ୍ଚାୟତକୁ ନେଇ ଧର୍ମଶାଳା ବ୍ଲକ ଗଠିତ ହୋଇଛି ା ପ୍ରତିବର୍ଷ ପରି ୨୦୧୭-୧୮ ଆର୍ଥିକ ବର୍ଷର ଆୟବ୍ୟୟ ଉପରେ ଲୋକାଲ ଫଣ୍ଡ ଅଡିଟ ହୋଇଥିଲା। ଜିଲା ଅଡିଟ ଅଫିସରଙ୍କ ନିକଟରେ ଗତ ୨୯ା୫ା୨୦୧୯ରେ ଦାଖଲ ହୋଇଥିବା ୯୩ ପୃଷ୍ଠା ବିଶିଷ୍ଟ ଅଡିଟ ରିପୋର୍ଟରେ ବିଭିନ୍ନ ଯୋଜନାରେ ଅଯଥା ଖର୍ଚ୍ଚ ସମେତ ଆବଶ୍ୟକ ରେକର୍ଡ ପତ୍ର ଦାଖଲ ହୋଇପାରି ନ ଥିବା ଦର୍ଶାଯାଇଛି ା ଏଥିରେ ମଷ୍ଟରରୋଲ, କମ୍ପ୍ଲିଶନ ସାର୍ଟିଫିକେଟ, ଏମ୍ବି, ଷ୍ଟକବୁକ, ଲଗବୁକ, ଚେକ ଆଣ୍ଡ ଡ୍ରାଫ୍ଟ ରିସିଭ ରେଜିଷ୍ଟର, ଷ୍ଟେସନେରୀ ଆକାଉଣ୍ଟସ, ପାସବୁକ ଆଦି ୧୮ଟି ରେକର୍ଡ ଯାଞ୍ଚ ହୋଇଥିଲା। କିନ୍ତୁ ଅଡିଟ ସମ୍ରେ ଆଡମିନିଷ୍ଟ୍ରେଟିଭ ଆପ୍ରୁଭାଲ ରେଜିଷ୍ଟର ସମେତ ଏଗ୍ରିମେଣ୍ଟ, ଟେଣ୍ଡର ଅର୍ଡର, କଣ୍ଟ୍ରାକ୍ଟର ଦ୍ୱାରା ଦାଖଲ ହେଉଥିବା ଫର୍ମ ଫାଇଲ, ରେଭିନ୍ୟୁ ରେଜିଷ୍ଟର, ଲୋନ ରେଜିଷ୍ଟର ପ୍ରଭୃତି ୧୩ଟି ରେକର୍ଡପତ୍ର ବ୍ୟବହାର ହୋଇନାହିଁ। ଏହାବାଦ ଏଷ୍ଟିମେଟ ରେଜିଷ୍ଟର ସମେତ ଡିପୋଜିଟ ଲେଜର, ଆଉଟଷ୍ଟାଣ୍ଡିଂ ଆଡଭାନ୍ସ, ଆଡଭାନ୍ସ ରେଜିଷ୍ଟର, ପରମାନେଣ୍ଟ ଆଡଭାନ୍ସ କେଶବୁକ, ସପ୍ଲାଇ ଗାର୍ଡ ଫାଇଲ, ଅର୍ଡରବୁକ ଓ ଗ୍ରାଣ୍ଟ-ଇନ-ଏଡ ରେଜିଷ୍ଟର/ରେକର୍ଡ ଦାଖଲ ହୋଇପାରି ନ ଥିଲା। ଫଳରେ ମହାମତ୍ାଗାନ୍ଧୀ ଜାତୀୟ ଗ୍ରାମୀଣ କର୍ମନିଯୁକ୍ତି ଆଇନ, ଜିଜିୱାଇ, ତ୍ରୟୋଦଶ ଅର୍ଥ କମିଶନ, ସିସିରୋଡ, ବିପିଜିୱାଇ, ଚତୁର୍ଦ୍ଦଶ ଅର୍ଥ କମିଶନ, ଅଙ୍ଗନଓ୍ବାଡି ଆଦି ଯୋଜନାର ସଫଳ ଭାବେ ଅଡିଟ ହୋଇପାରି ନାହିଁ ା ସିକ୍ୟୁରିଟି ଡିପୋଜିଟ ଲେଜର ବ୍ୟବହାର ହୋଇ ନ ଥିବାରୁ ସିକ୍ୟୁରିଟି ଡିପୋଜିଟ ଫେରାଇବା ଏବଂ ଡବଲ ପେମେଣ୍ଟ ସଂକ୍ରାନ୍ତରେ ରିପୋର୍ଟ ପ୍ରସ୍ତୁତ ହୋଇପାରି ନାହିଁ ା ଇନଭେଷ୍ଟମେଣ୍ଟ ରେଜିଷ୍ଟର ବ୍ୟବହାର ହୋଇ ନ ଥିବାରୁ ବାସ୍ତବ ଇନଭେଷ୍ଟମେଣ୍ଟ, ପୂର୍ଣ୍ଣ ବିକାଶର ତାରିଖ, ସୁଧ ଆଦି ସଂକ୍ରାନ୍ତରେ ଜାଣିବା କଷ୍ଟକର ହୋଇଥିଲା। ପ୍ରପର୍ଟି ରେଜିଷ୍ଟର ବ୍ୟବହାର ହୋଇ ନ ଥିବାରୁ ବ୍ଲକର ଜମି, ପୋଖରୀ, ମାର୍କେଟ କମ୍ପ୍ଲେକ୍ସ ପ୍ରଭୃତିରୁ ହେଉଥିବା ରାଜସ୍ବ ସମ୍ପର୍କରେ ଠିକ ତଥ୍ୟ ମିଳିପାରି ନାହିଁ। ଏହାବାଦ ବାର୍ଷିକ ହିସାବ ପ୍ରସ୍ତୁତ ନ ହେବା, ଆୟ ବ୍ୟୟର ହିସାବ ଠିକ ନ ରଖିବା ଯୋଗୁ ସରକାରୀ ଅର୍ଥର ହେରାଫେରି ହୋଇଥିବା ସନ୍ଦେହ କରିଛି ଅଡିଟ ଟିମ୍ ା ଅଡିଟ ବର୍ଷ ତଥା ୨୦୧୭-୧୮ରେ ପୂର୍ବବର୍ଷର ବକୈୟା ସହ ଅନୁଦାନକୁ ମିଶାଇ ୩୯କୋଟି ୮୮ଲକ୍ଷ ୮୭ହଜାର ୪୯୨ ଟଙ୍କା ମହଜୁଦ ଥିଲା। ତେବେ ସେହି ବର୍ଷ ୧୮କୋଟି ୬୩ଲକ୍ଷ ୭୭ହଜାର ୫୭୩ ଟଙ୍କା ଖର୍ଚ୍ଚ ହୋଇଥିଲା। ଓଡ଼ିଶା ଜେନେରାଲ ଫାଇନାନ୍ସିଆଲ ରୁଲସ୍ ଅନୁସାରେ ଖର୍ଚ୍ଚ ହୋଇପାରି ନ ଥିବା ଅନୁଦାନକୁ ଫେରାଇ ଦେବା କଥା କିମ୍ବା ସରକାରୀ ଅନୁମତି ନେଇ ପରବର୍ତ୍ତି ବର୍ଷରେ ତାକୁ ଖର୍ଚ୍ଚ କରିବାର ନିୟମ ରହିଛି। କିନ୍ତୁ ଏହିସବୁ ନିୟମକୁ କେହି ପାଳନ କରିନାହାନ୍ତି କିମ୍ବା ଅନୁଦାନ ଅର୍ଥ ଫେରସ୍ତ ହୋଇନାହିଁ। ଅନୁଦାନର ମାତ୍ର ୩୯.୩୧ ପ୍ରତିଶତ ଖର୍ଚ୍ଚ ହୋଇଥିଲେ ହେଁ କୌଣସି ଯାଞ୍ଚ ବିନା ପରବର୍ତ୍ତୀ ଅନୁଦାନ ଆବଣ୍ଟିତ ହୋଇଛି। ଏ ସଂକ୍ରାନ୍ତରେ ଧର୍ମଶାଳା ବିଡିଓ ହେମନ୍ତ କୁମାର ସ୍ବାଇଁଙ୍କୁ ପଚାରିବାରୁ, ସେ ନୂତନଭାବେ ଯୋଗ ଦେଇଛନ୍ତି ଏବଂ ରିପୋର୍ଟ ଦେଖିଲା ପରେ ଯାହା କହିହେବ ବୋଲି ପ୍ରକାଶ କରିଛନ୍ତି। ତେବେ ଅଡିଟ ରିପୋର୍ଟରେ ବ୍ୟାପକ ଅନିୟମିତତା ଓ ହେରାଫେରି ହୋଇଥିବା ଟଙ୍କାକୁ ରିକଭରି କରିବା ପାଇଁ ନିର୍ଦ୍ଦେଶ ହୋଇଥିଲେ ହେଁ ୩ମାସ ପରେ ବି ଏଯାବତ୍ କୌଣସି ପଦକ୍ଷେପ ଗ୍ରହଣ କରା ନ ଯିବା ପ୍ରଶ୍ନବାଚୀ ସୃଷ୍ଟି କରିଛି।
