କାମାକ୍ଷାନଗର, ୨୨।୬(ଡି.ଏନ.ଏ.) ଢେଙ୍କାନାଳ ଜିଲା କାମାକ୍ଷାନଗର ଉପଖଣ୍ଡ ଅଞ୍ଚଳରେ ଆତଙ୍କରାଜ ସୃଷ୍ଟି କରିଥିବା ଏକ ରାଜପଥ ଲୁଟେରା ଗ୍ୟାଙ୍ଗର ୪ ସଦସ୍ୟ ପୋଲିସ ହାତରେ ଧରାପଡ଼ିଛନ୍ତି। ସେମାନେ ହେଲେ କାମାକ୍ଷାନଗର ଜିନେଇଲୋ ଗ୍ରାମର ସଞ୍ଜୟ ସ୍ବାଇଁ ଓରଫ୍ ସିଲୁ, ଅନୁଗୋଳ ଜିଲା ନିଶା ଥାନା ରାମଡିହ ଗ୍ରାମର ସୁଶାନ୍ତ ନାୟକ ଓରଫ୍ ବ୍ରଜ, ଅନୁଗୋଳ ଥାନା ମଝିକା ଗ୍ରାମର ସୁନୀଲ ନାୟକ ଓରଫ୍ ଟୁବୁଲ ଏବଂ ବଅଁରପାଳ ଥାନା ପୁଷ୍ପପଙ୍ଗି ଗ୍ରାମର ଅନିରୁଦ୍ଧ ନାଏକ ଓରଫ୍ ମୂଷା। ସେମାନଙ୍କ ନିକଟରୁ ବାଇକ୍, ପିସ୍ତଲ, ଜୀବନ୍ତ ଗୁଳି, ୯ଟି ମୋବାଇଲ, କଟୁରି, ନଗଦ ୧୦ ହଜାର ଟଙ୍କା, ଏଟିଏମ୍ କାର୍ଡ, ବ୍ୟାଙ୍କ ପାସ୍ବୁକ୍ ଏବଂ ୩ଟି ନମ୍ବର ପ୍ଲେଟ୍ ଜବତ କରାଯାଇଛି। ଅଭିଯୁକ୍ତଙ୍କ ନାମରେ ବିଭିନ୍ନ ଥାନାରେ ବହୁ ସଙ୍ଗିନ ମାମଲା ରହିଛି। ଏହି ଗ୍ୟାଙ୍ଗର କଳା କାରନାମା ସମ୍ପର୍କରେ ରବିବାର ଏସ୍ଡିପିଓ ସୁପ୍ରସନ୍ନ ମଲ୍ଲିକ ଏକ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି।
୨୦୨୦ ଜୁନ୍ ୧ରେ ପଣ୍ଡୁଆ ଅଞ୍ଚଳର ଏକ ପେଟ୍ରୋଲ ପମ୍ପ ମାଲିକଙ୍କ ନିକଟରୁ ଲକ୍ଷାଧିକ ଟଙ୍କା ଲୁଟ୍ ହୋଇଥିଲା। ଦୁଇଜଣ ଯୁବକ ଏକ କଳା ପଲ୍ସରରେ ଆସି ମାରଣାସ୍ତ୍ର ଦେଖାଇ ଟଙ୍କା ବ୍ୟାଗ୍ ଲୁଟି ନେଇଥିଲେ। ଏ ନେଇ ନଂ. ୭୩/୨୦, ଦଫା ୩୯୨, ୫୦୬ ଓ ୨୫ ଆର୍ମସ୍ ଆକ୍ଟରେ ମାମଲା ରୁଜୁ କରାଯାଇଥିଲା। ଏହି ଘଟଣାର ଖୋଳତାଡ଼ ବେଳେ ସମ୍ପୃକ୍ତ ରାଜପଥ ଲୁଟେରାଙ୍କ ସମ୍ପର୍କରେ ପୋଲିସକୁ ବହୁ ଗୁରୁତ୍ୱପୂର୍ଣ୍ଣ ସୂଚନା ମିଳିଥିଲା। ତଦନ୍ତରୁ ଜଣାପଡ଼ିଛି ସେମାନଙ୍କ ନାମରେ କାମାକ୍ଷାନଗର ଥାନାରେ ୩,ଭୁବନ ଥାନାରେ ୨, କଙ୍କଡ଼ାହାଡ଼ ଥାନାରେ ୧, ଢେଙ୍କାନାଳ ସଦର ଥାନାରେ ୧, ଯାଜପୁର ଜିଲା ସୁକିନ୍ଦା ଥାନାରେ ୨ ମାମଲା ସମେତ ଅନୁଗୋଳ ଜିଲାର ବିଭିନ୍ନ ଥାନାରେ ୮ କେସ୍ ରହିଛି। ଅଭିଯୁକ୍ତମାନେ ଅର୍ଥଲଗାଣକାରୀ ସଂସ୍ଥାର ଅଧିକାରୀ, ଗ୍ରାହକ ସେବା କେନ୍ଦ୍ର ଏବଂ ବ୍ୟାଙ୍କରୁ ଟଙ୍କା ଉଠାଇ ଘରକୁ ଯାଉଥିବା ଲୋକଙ୍କୁ ଟାର୍ଗେଟ କରୁଥିଲେ। ସଞ୍ଜୟ ଲୁଟ୍ର ବ୍ଲୁପ୍ରିଣ୍ଟ ପ୍ରସ୍ତୁତ କରୁଥିଲେ। ପରେ ସମସ୍ତେ ଯୋଜନାବଦ୍ଧ ଭାବେ ଲୁଟ୍, ଛନ୍ତାଇ କରୁଥିବା ଏସ୍ଡିପିଓ ସୂଚନା ଦେଇଛନ୍ତି। ଖବରଦାତା ସମ୍ମିଳନୀରେ କାମାକ୍ଷାନଗର ଥାନାଧିକାରୀ ଅଭିନବ ଡଳୁଆ, ତୁମୁସିଙ୍ଗା ଥାନାଧିକାରୀ ଆନନ୍ଦ ଡୁଙ୍ଗ୍ଡୁଙ୍ଗ୍, ପଣ୍ଡୁଆ ଫାଣ୍ଡି ଅଧିକାରୀ ଶ୍ୱତପଦ୍ମା ବିଶ୍ୱାଳ ପ୍ରମୁଖ ଉପସ୍ଥିତ ଥିଲେ।
