ଆରଡ଼ି,୨୯।୭(ଡି.ଏନ୍.ଏ.): ଭଦ୍ରକ ଜିଲା ଆରଡ଼ିର ପ୍ରସିଦ୍ଧ ବାବା ଆଖଣ୍ଡଳମଣିଙ୍କଠାରେ ଶ୍ରାବଣ ମାସର ୨ୟ ସୋମବାରରେ ଲକ୍ଷାଧିକ କାଉଡ଼ିଆ ଜଳଲାଗି କରିଥିବା ଜଣାପଡ଼ିଛି। ସୀମିତ ସ୍ଥାନରେ ଏତେ ସଂଖ୍ୟକ କାଉଡ଼ିଆଙ୍କ ଉପସ୍ଥିତି ଜିଲା ପ୍ରଶାସନ, ପୋଲିସ ତଥା ମନ୍ଦିର ପ୍ରଶାସନର ମୁଣ୍ଡବ୍ୟଥାର କାରଣ ହୋଇଥିଲା । ଭିଡ଼ ନିୟନ୍ତ୍ରଣ ପାଇଁ ପୋଲିସ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଥିଲା। ଭିଡ଼କୁ ଲକ୍ଷ୍ୟ କରି ରବିବାର ଅପରାହ୍ନ ୪ଟାରୁ କାଉଡ଼ିିଆମାନେ ଶ୍ରାବଣୀ ମହାଦେବଙ୍କ ମସ୍ତକରେ ଜଳଲାଗି କରିଥିଲେ । ପ୍ରାୟ ୭୦୦ ମିଟର ଦୂରରୁ କାଉଡ଼ିିଆମାନେ ଲମ୍ବା ଲାଇନ୍ରେ ଆସି ପାଣି ଢାଳିଥିଲେ । କେତେକ କାଉଡ଼ିଆ ଶୃଙ୍ଖଳା ରକ୍ଷା ନ କରି ବ୍ୟାରିକେଟ୍ ଭାଙ୍ଗିଥିବା ଦେଖିବାକୁ ମିଳିଥିଲା। ରବିବାର ରାତି ୩ଟା ଏବଂ ସୋମବାର ପୂର୍ବାହ୍ନରେ କେତେକ କାଉଡ଼ିଆ ଅପ୍ରୀତିକର ପରିସ୍ଥିତି ସୃଷ୍ଟି କରିଥିଲେ। ସୋମବାର ଅପରାହ୍ନ ପର୍ଯ୍ୟନ୍ତ ଏହି ଜଳଲାଗି ପ୍ରକ୍ରିୟା ଚାଲୁ ରହିବାର ସମ୍ଭାବନା ଥିବା ମନ୍ଦିର ପ୍ରଶାସନ ପକ୍ଷରୁ ସୂଚନା ମିଳିଛି।
