ଦୋକାନ ଖୋଲିବାକୁ ଅନୁମତି ଦେଲା ପ୍ରଶାସନ: ଦ୍ୱନ୍ଦ୍ୱରେ ସେଲୁନ୍‌ ଦୋକାନୀ
8:05 amMay 5, 2020 / 21

ବାରିପଦା ଅଫିସ, ୫ା୫- ଗ୍ରୀନ ଜୋନ୍‌ରେ ଥିବା ମୟୂରଭଞ୍ଜ ଜିଲାରେ ଅଣ ଅତ୍ୟାବଶ୍ୟକୀୟ ଦୋକାନ ଖୋଲିବାକୁ ପ୍ରଶାସନ ଅନୁମତି ଦେଇଛି। ସକାଳ ୭ଟାରୁ ଅପରାହ୍ନ ୨ଟା ଯାଏ ଏହି ଦୋକାନ ସବୁ ଖୋଲା ଯିବାକୁ ଥିବା ବେଳେ ଅତ୍ୟାବଶ୍ୟକ ସାମଗ୍ରୀ ଦୋକାନ ସବୁ ସମୟରେ ଖୋଲାଯିବ ବୋଲି ଜିଲା ପ୍ରଶାସନ ନିର୍ଦ୍ଦେଶନାମା ଜାରି କରିଛି। ରାଜ୍ୟ ସରକାର ଗ୍ରୀନ ଜୋନ୍‌ରେ ସେଲୁନ ଓ ସ୍ପା ଖୋଲିବା ପାଇଁ ଅନୁମତି ଦେଇଥିବା ବେଳେ ମୟୂରଭଞ୍ଜ ଜିଲାରେ ଏହି ଦୋକାନ ଖୋଲିବ କି ନାହିଁ ପ୍ରଶାସନ ସ୍ପଷ୍ଟ କରି ନାହିଁ। ଏନେଇ ସେଲୁନ ମାଲିକମାନେ ଦ୍ୱନ୍ଦରେ ପଡ଼ିଛନ୍ତି। ସୋମବାର କିଛି ସେଲୁନ ଖୋଲାଯାଇଥିବା ବେଳେ ପୋଲିସ ଏହାକୁ ବନ୍ଦ କରି ଦେଇଥିଲା। ପୋଲିସ କର୍ମଚାରୀମାନେ ସେଲୁନ ଖୋଲାଯାଇପାରିବ ନାହିଁ ବୋଲି କହି ବିଭିନ୍ନ ସ୍ଥାନରେ ବନ୍ଦ କରି ଦେଇଥିଲେ। ଏହାକୁ ନେଇ ଦ୍ୱନ୍ଦ୍ୱ ଦେଖା ଦେଇଥିବାରୁ ସେଲୁନ ମାଲିକମାନେ ଅନିଶ୍ଚିତତାରେ ରହୁଛନ୍ତି। ପ୍ରଶାସନ ପକ୍ଷରୁ ଜାରି ହୋଇଥିବା ନିର୍ଦ୍ଦେଶାନାମା ଆସନ୍ତା ୧୭ ତାରିଖ ପର୍ଯ୍ୟନ୍ତ ଜିଲାରେ କାର୍ଯ୍ୟକାରୀ ହେବ। ବିନା ପରିମିଟ୍‌ରେ ଆନ୍ତଃରାଜ୍ୟ ବସ୍‌ ଚଳାଚଳ ଏବଂ ଶିକ୍ଷାନୁଷ୍ଠାନ ବନ୍ଦ ରହିବ। ଅନ୍‌ଲାଇନରେ ଶିକ୍ଷା ଦାନ କରାଯିବ। ଗ୍ରୀନ ଜୋନ୍‌ରେ ଯାହା କଟକଣା ରହିଛି ତାହାକୁ ପାଳନ କରାଯିବ ବୋଲି ନିର୍ଦ୍ଦେଶାନାମାରେ ଉଲ୍ଲେଖ କରାଯାଇଛି। ସମସ୍ତ ଦୋକାନ ଖୋଲାଯିବା ପାଇଁ ନିୟମ ଥିବା ବେଳେ ସାମଜିକ ଦୂରତ୍ୱକୁ ପାଳନ କରିବା ପାଇଁ ନିର୍ଦ୍ଦେଶ ରହିଛି। ଦୋକାନର କର୍ମଚାରୀମାନେ ମାସ୍କ ପିନ୍ଧିବା ବାଧ୍ୟତାମୂଳକ କରାଯାଇଛି। ଗ୍ରସେରି ଦୋକାନ, ମିଲକ ବୁଥ୍‌, ମେଡ଼ିସିନ ଦୋକାନ ବ୍ୟତୀତ ଅନ୍ୟ ସବୁ ଦୋକାନ ସକାଳ ୭ଟାରୁ ଅପରାହ୍ନ ୨ଟା ପର୍ଯ୍ୟନ୍ତ ଖୋଲାରହିବ। ସକାଳ ୭ଟାରୁ ସନ୍ଧ୍ୟା ୭ଟା ପର୍ଯ୍ୟନ୍ତ ଲୋକମାନେ ବିଭିନ୍ନ ସାମଗ୍ରୀ ପାଇଁ ଯାଇପାରିବେ। ସନ୍ଧ୍ୟା ୭ଟା ପରେ ଯଦି କୌଣସି ବ୍ୟକ୍ତି ଅନାବଶ୍ୟକ ଭାବେ ବୁଲାବୁଲି କରୁଥିବା ନଜରକୁ ଆସିବ ତାହେଲେ ତାଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ୬୫ ବର୍ଷରୁ ଉର୍ଦ୍ଧ୍ୱ ବ୍ୟକ୍ତି, ଗର୍ଭବତୀ ମହିଳା ଏବଂ ୧୦ ବର୍ଷରୁ କମ୍‌ ଶିଶୁମାନେ ଘରେ ରହିବା ପାଇଁ କୁହାଯାଇଛି। ଉଲ୍ଲେଖଯୋଗ୍ୟ ଯେ, ଜିଲାରେ କରୋନା ସନ୍ଦେହରେ ୧୮୧୮ ଜଣଙ୍କ ସ୍ବାବ୍‌ ପରୀକ୍ଷା ପାଇଁ ପଠାଯାଇଥିବା ବେଳେ ସେଥିରୁ ୧୬୯୨ ଜଣଙ୍କ ରିପୋର୍ଟ ନେଗେଟିଭ୍‌ ଆସିଥିବା ବେଳେ ୧୨୬ଟି ରିପୋର୍ଟ ଅପେକ୍ଷାରେ ରହିଛି।