ପାଲଲହଡ଼ା, ୯ା୪(ଡି.ଏନ.ଏ.) କରୋନା ସଂକ୍ରମଣ ଭୟରେ ଲୋକେ ଘରୁ ବାହାରୁ ନ ଥିବାବେଳେ ପଶୁ ପକ୍ଷୀ ଓ ଅସହାୟଙ୍କ ପାଇଁ ଦେବଦୂତ ସାଜିଛନ୍ତି ଅନୁଗୋଳ ଜିଲା ପାଲଲହଡ଼ା ବ୍ଲକ ନିଜିଗଡ ପଞ୍ଚାୟତ ପୁରୁଣାଗଉଡ ସାହିର ଘନଶ୍ୟାମ ନାହାର। ଦୋକାନ ବଜାର, ହୋଟେଲ ଆଦି ବନ୍ଦ ଥିବାରୁ ଖାଇବାକୁ ପାଉ ନ ଥିବା ମାନସିକ ବିକାରଗ୍ରସ୍ତ, ଅସହାୟ, ବୁଲା ଗୋରୁ, କୁକୁର ଓ ରାସ୍ତାରୁ ଶସ୍ୟ ସଂଗ୍ରହ କରୁଥିବା ପକ୍ଷୀମାନଙ୍କୁ ସେ ଖାଦ୍ୟ ପ୍ରଦାନ କରୁଛନ୍ତି।
ନିଜିଗଡ ପଞ୍ଚାୟତ କାର୍ଯ୍ୟାଳୟରେ ଜଣେ ଚତୁର୍ଥ ଶ୍ରେଣୀ କର୍ମଚାରୀ ଭାବେ କାର୍ଯ୍ୟ କରନ୍ତି ଘନଶ୍ୟାମ। ପଞ୍ଚାୟତ ପକ୍ଷରୁ ଲୋକଙ୍କୁ ଜଳଯୋଗାଣ କାର୍ଯ୍ୟରେ ତାଙ୍କୁ ନିୟୋଜିତ କରାଯାଇଛି। ବିଭିନ୍ନ ସମୟରେ ସାମାଜିକ କାର୍ଯ୍ୟ କରି ସେ ଅଞ୍ଚଳରେ ପରିଚିତ ହୋଇଥିବା ବେଳେ ବର୍ତ୍ତମାନ ସ୍ଥିତିରେ ମଧ୍ୟ ସେହି କାମକୁ ଜାରି ରଖିବାରେ ସେ ସଫଳ ହୋଇଛନ୍ତି। ତାଙ୍କ କହିବା ଅନୁଯାୟୀ, ଏବେ ଲୋକେ ଘରୁ ବାହାରୁ ନ ଥିବାରୁ ଅନେକ ପଶୁପକ୍ଷୀଙ୍କୁ ଖାଦ୍ୟ ମିଳିପାରୁ ନାହିଁ। ସେହିପରି ମାନସିକ ବିକାରଗ୍ରସ୍ତ ଓ ଗରିବ ଶ୍ରେଣୀର ଲୋକେ ଅସହାୟ ଅବସ୍ଥାରେ ଦିନ କାଟୁଛନ୍ତି। ଗରିବ ତଥା ଶ୍ରମିକମାନଙ୍କ ପାଇଁ ପଞ୍ଚାୟତ ତରଫରୁ ରନ୍ଧା ଖାଦ୍ୟର ବ୍ୟବସ୍ଥା ହେଉଥିବାରୁ ସେଥିରୁ କିଛି ଖାଦ୍ୟ ଆଣି ଏବଂ ନିଜ ଉଦ୍ୟମରେ କିଛି ଯୋଗାଡ କରି ସହରରେ ବୁଲୁଥିବା କେତେଜଣ ମାନସିକ ବିକାରଗ୍ରସ୍ତଙ୍କ ସହ ବୁଲା କୁକୁର, ଗୋରୁ, ଷଣ୍ଢ, ପକ୍ଷୀଙ୍କୁ ଖାଇବାକୁ ଦେଉଛନ୍ତି। ଆଗକୁ ମଧ୍ୟ ଏହି କାର୍ଯ୍ୟ ଜାରି ରଖିବେ ବୋଲି ସେ ପ୍ରକାଶ କରିଛନ୍ତି। ଅନ୍ୟମାନେ ମଧ୍ୟ ଉଦାର ହୋଇ କିଛି ବଳକା ଖାଦ୍ୟ ଅସହାୟଙ୍କୁ ଦେବାକୁ କିମ୍ବା ବାହାରେ ରଖିବାକୁ ଘନଶ୍ୟାମ ପରାମର୍ଶ ଦେଇଛନ୍ତି।
