ରସୁଲପୁର, ୧୮।୫ (ଡି.ଏନ୍.ଏ): ଯାଜପୁର ଜିଲା ରସୁଲପୁର ବ୍ଲକ ଅଧୀନ ପ୍ରଥମାଖଣ୍ଡି ପଞ୍ଚାୟତ ଗୋପାଳପୁର ଗାଁର ଝିଅ ଦୂତୀ ଚାନ୍ଦ ଏବେ ଜଣେ ପ୍ରତିଷ୍ଠିତ ଅନ୍ତର୍ଜାତୀୟ ଆଥ୍ଲେଟ। ରାଜ୍ୟ ଓ ଦେଶ ପାଇଁ ସେ ଅନେକ ଗୌରବ ଆଣି ଦେଇଛନ୍ତି। ଲଗାତର ଭାବରେ ସେ ଭଲ ପ୍ରଦର୍ଶନ କରିଆସୁଛନ୍ତି। ତାଙ୍କ ପ୍ରତି ଉଭୟ ରାଜ୍ୟ ଓ କେନ୍ଦ୍ର ସରକାରଙ୍କର ଅକୁଣ୍ଠ ସାହାଯ୍ୟ ଓ ସହଯୋଗ ରହିଛି। ଜାତୀୟ କ୍ରୀଡ଼ା ପୁରସ୍କାର ଅର୍ଜୁନ ପୁରସ୍କାର ପାଇଁ ସେ ହକ୍ଦାର ମନେ ହେଉଥିଲେ ମଧ୍ୟ ତାଙ୍କୁ ଏପର୍ଯ୍ୟନ୍ତ ଏହି ସମ୍ମାନ ମିଳି ନ ଥିବାରୁ ଦୂତୀଙ୍କ ମା ଅଖଜୀ ଚାନ୍ଦ ଆଶ୍ଚର୍ଯ୍ୟ ପ୍ରକଟ କରିଛନ୍ତି। ତାଙ୍କ ଝିଅକୁ ଏହି ପୁରସ୍କାର ମିଳିଲେ ସେ ଭବିଷ୍ୟତରେ ଆହୁରି ଭଲ ପ୍ରଦର୍ଶନ କରିବା ଲାଗି ପ୍ରେରଣା ପାଇବେ ବୋଲି ଏକ ଭିଡିଓ ବାର୍ତ୍ତା ଜରିଆରେ ସେ ସରକାରଙ୍କୁ ନିବେଦନ କରିଛନ୍ତି। ଦୂତୀଙ୍କୁ ଏ ବିଷୟରେ ପଚରାଯିବାରେ ତାଙ୍କ ମା’ ପୁରସ୍କାର ପାଇଁ ନିବେଦନ କରିଥିବା ସମ୍ପର୍କରେ ସେ ଅବଗତ ନୁହଁନ୍ତି ବୋଲି କହିଛନ୍ତି। ତେବେ ସେ କହିଥିଲେ ୨୦୧୮-୧୯ କ୍ରୀଡ଼ା ବର୍ଷରେ ଏହି ପୁରସ୍କାର ପାଇଁ ତାଙ୍କ ନାଁ ଓଡ଼ିଶା ପକ୍ଷରୁ ସୁପାରିସ କରାଯାଇଥିଲା। ମାତ୍ର ବିଳମ୍ବରେ ପଠାଯାଇଥିବାରୁ ତାହା କମିଟି ଦ୍ୱାରା ଗ୍ରହଣୀୟ ହୋଇପାରିଲା ନାହିଁ । ଚଳିତଥର ତାଙ୍କୁ ଏହି ପୁରସ୍କାର ମିଳିବ ବୋଲି ସେ ଆଶାବାଦୀ ଅଛନ୍ତି। ଏହା ସମ୍ଭବ ହେଲେ ସେ ଆହୁରି ଉନ୍ନତ ପ୍ରଦର୍ଶନ କରିବା ଦିଗରେ ଏହା ତାଙ୍କୁ ପ୍ରୋତ୍ସାହିତ କରିବ ବୋଲି ସେ କହିଛନ୍ତି।
