ନୂଆଦିଲ୍ଲୀ,୧୭।୨: ଦିଲ୍ଲୀରେ ତୃତୀୟଥର ସରକାର ଗଠନ କରିବା ପରେ ଆମ ଆଦ୍ମୀ ପାର୍ଟି (ଏଏପି)ର ମୁଖ୍ୟ ଅରବିନ୍ଦ କେଜରିଓ୍ବାଲ ସୋମବାର ମୁଖ୍ୟମନ୍ତ୍ରୀ ଭାବେ କାର୍ଯ୍ୟଭାର ସମ୍ଭାଳିଛନ୍ତି। ଏଥିସହ ଉପମୁଖ୍ୟମନ୍ତ୍ରୀ ମନୀଷ ସିସୋଡିଆଙ୍କ ସମେତ ୫ କ୍ୟାବିନେଟ ମନ୍ତ୍ରୀ ମଧ୍ୟ ଦିଲ୍ଲୀ ସଚିବାଳୟରେ ପହଞ୍ଚି ନିଜର ଦାୟିତ୍ୱ ଗ୍ରହଣ କରିଥିଲେ। ମନ୍ତ୍ରୀମାନେ ନିଜର ଶହେ ଦିନର ଏଜେଣ୍ଡା ପାଇଁ ରୋଡ ମ୍ୟାପ ପ୍ରସ୍ତୁତ କରିଥିଲେ। ଏହାପରେ ମୁଖ୍ୟମନ୍ତ୍ରୀ କେଜରିଓ୍ବାଲ ନିଜ କ୍ୟାବିନେଟର ବିଭାଗ ବଣ୍ଟନ କରିଥିଲେ। ୩ଟି ବିଭାଗରେ ମନ୍ତ୍ରୀମାନଙ୍କର ଅଦଳ ବଦଳ ହୋଇଥିବା ବେଳେ ଅନ୍ୟ ମନ୍ତ୍ରୀଙ୍କ ନିକଟରେ ପୁରୁଣା ମନ୍ତ୍ରଣାଳୟ ବଳବତ୍ତର ରହିଛି। ସୂଚନା ମୁତାବକ କେଜରିଓ୍ବାଲ ନିଜ ପାଖରେ କୌଣସି ବିଭାଗ ରଖି ନ ଥିବା ବେଳେ ଦିଲ୍ଲୀ ଜଳ ବୋର୍ଡ ମନ୍ତ୍ରଣାଳୟ ସତେନ୍ଦ୍ର ଜୈନଙ୍କୁ ଦିଆଯାଇଛି। ସେହିପରି କୈଳାଶ ଗେହଲଟଙ୍କ ସ୍ଥାନରେ ଗୋପାଳ ରାୟଙ୍କୁ ପରିବେଶ ମନ୍ତ୍ରଣାଳୟର ଦାୟିତ୍ୱ ଦିଆଯାଇଛି। ପୂର୍ବରୁ ମହିଳା ଏବଂ ବାଳ ବିକାଶ ମନ୍ତ୍ରଣାଳୟ ମନୀଷ ସିସୋଡିଆଙ୍କ ପାଖରେ ରହିଥିବା ବେଳେ ଚଳିତ ବର୍ଷ ଏହି ବିଭାଗ ରାଜେନ୍ଦ୍ର ପାଲ ଗୌତମଙ୍କ ପାଖକୁ ଯାଇଥିବା ସୂଚନା ମିଳିଛି।
