ଆଡିଲେଡ, ୧।୧୨(ଏଏଫ୍ପି)- ଆଡିଲେଡ ଓଭାଲ ଗ୍ରାଉଣ୍ଡରେ ଚାଲିଥିବା ଅଷ୍ଟ୍ରେଲିଆ ବିପକ୍ଷ ଦିବାରାତ୍ର ଭିତ୍ତିକ ଦ୍ୱିତୀୟ ଟେଷ୍ଟ ମ୍ୟାଚ୍ରେ ଭ୍ରମଣକାରୀ ପାକିସ୍ତାନ ଇନିଂସ ପରାଜୟ ଏଡାଇବା ପାଇଁ ସଂଘର୍ଷ ଜାରି ରଖିଛି। ଟସ୍ ଜିତି ଅଷ୍ଟ୍ରେଲିଆ ପ୍ରଥମ ଇନିଂସରେ ୧୨୭ ଓଭରରେ ୩ ଉଇକେଟ ହରାଇ ୫୮୯ ରନ ସଂଗ୍ରହ କରି ଇନିଂସ ଘୋଷଣା କରିଥିଲା। ଜବାବରେ ପ୍ରଥମ ଇନିଂସ ଆରମ୍ଭ କରି ପାକିସ୍ତାନ ବାବର ଆଜାମ ୯୭ ଓ ୟାସିର ଶାହାଙ୍କ ୧୧୩ ରନର ଶତକୀୟ ପାଳି ବଳରେ ୯୪.୪ ଓଭରରେ ୩୦୨ ରନ କରି ଅଲଆଉଟ ହୋଇଥିଲା। ଫଳରେ ପ୍ରଥମ ଇନିଂସରେ ପାକିସ୍ତାନ ୨୮୭ ରନ ପଛରେ ପଡିଥିଲା। ଏହାପରେ ପାକିସ୍ତାନକୁ ଅଷ୍ଟ୍ରେଲିଆ ଫଲୋଅନ ଦେଇଥିଲା।
ଫଲୋଅନ ହେବା ପରେ ଦ୍ୱିତୀୟ ଇନିଂସ ଆରମ୍ଭ କରି ପାକିସ୍ତାନ ତୃତୀୟ ଦିବସ ଖେଳ ଶେଷ ସୁଦ୍ଧା ବିପର୍ଯ୍ୟୟର ସମ୍ମୁଖୀନ ହୋଇ ୧୬.୫ ଓଭରରେ ୩ ଉଇକେଟ ହରାଇ ୩୯ ରନ ସଂଗ୍ରହ କରିଛି। ବର୍ଷା ଯୋଗୁ ଅବଶ୍ୟ ଖେଳ କିଛି ସମୟ ବାଧା ପ୍ରାପ୍ତ ହୋଇଥିଲା। ମ୍ୟାଚ୍ ଆଉ ୨ ଦିନ ବାକିଥିବା ବେଳେ ପାକିସ୍ତାନ ୭ ଉଇକେଟ ହାତରେ ରଖି ଇନିଂସ ପରାଜୟ ଏଡାଇବା ପାଇଁ ଆହୁରି ୨୪୮ ରନ ଆବଶ୍ୟକ କରୁଛି। ଷ୍ଟମ୍ପ ଅପସାରଣ ବେଳକୁ ଓପନର ଶାନ ମାସୁଦ ୧୪ ଓ ଆସାଦ ସାଫିକ୍ ୮ ରନ କରି ଅପରାଜିତ ରହିଛନ୍ତି। ଓପନର ଇମାମ-ଉଲ ହକ୍ ଖାତା ଖୋଲିବା ପୂର୍ବରୁ ଜୋସ ହାଜେଲଉଡଙ୍କ ଦ୍ୱାରା ଏଲ୍ବିଡବ୍ଲ୍ୟ ହୋଇ ପ୍ରଥମେ ଆଉଟ ହୋଇଥିଲେ। ଏହାପରେ ଅଧିନାୟକ ଅଝାର ଅଲି ୯ ରନ କରି ମିଚେଲ ଷ୍ଟାର୍କଙ୍କ ବଲ୍ରେ ଷ୍ଟିଭେନ୍ ସ୍ମିଥ୍ଙ୍କୁ କ୍ୟାଚ୍ ଦେଇ ଆଉଟ ହୋଇଥିଲେ। ପ୍ରଥମ ଇନିଂସରେ ଲଢୁଆ ପାଳି ଖେଳିଥିବା ବାବର ଆଜମ ୮ ରନ କରି ଉଇକେଟକିପର ଟିମ୍ ପେନ୍ଙ୍କୁ କ୍ୟାଚ୍ ଦେଇ ହାଜେଲଉଡଙ୍କ ଦ୍ୱିତୀୟ ଶିକାର ହୋଇଥିଲେ। ବୋଲିଂରେ ଅଷ୍ଟ୍ରେଲିଆ ତରଫରୁ ହାଜେଲଉଡ ୨ ଓ ଷ୍ଟାର୍କ ଗୋଟିଏ ଉଇକେଟ ଅକ୍ତିଆର କରିଥିଲେ।
ଅସମାପ୍ତ ପ୍ରଥମ ଇନିଂସ ସ୍କୋର ୯୬/୬ରୁ ଖେଳ ଆରମ୍ଭ କରି ପାକିସ୍ତାନ ଅଲଆଉଟ ହୋଇଥିଲା। ଓଭରନାଇଟ୍ ବ୍ୟାଟ୍ସମ୍ୟାନ ବାବର ଆଜମ ୪୩ ରନରୁ ଖେଳ ଆରମ୍ଭ କରି ୯୭ ରନକରି ଆଉଟ ହେବା ସହ ଶତକ ହାସଲରୁ ବଞ୍ଚିତ ହୋଇଥିଲେ। ସେହିପରି ୟାସିର ଶାହା ୪ ରନରୁ ଖେଳ ଆରମ୍ଭ କରି ୧୧୩ ରନର ଶତକୀୟ ପାଳି ଖେଳି ଅନ୍ତିମ ବ୍ୟାଟ୍ସମ୍ୟାନ ଭାବେ ଆଉଟ ହୋଇଥିଲେ। ଶାହିନ ଶାହ ଆଫ୍ରିଦି ଖାତା ଖେଳିବା ପୂର୍ବରୁ ଆଉଟ ହୋଇଥିଲେ। ମହମ୍ମଦ ଆବାସ ୨୯ ରନ କରି ଆଉଟ ହୋଇଥିବା ବେଳେ ମହମ୍ମଦ ମୁସା ୧୨ ରନ କରି ଅପରାଜିତ ରହିଥିଲେ। ବୋଲିଂରେ ଅଷ୍ଟ୍ରେଲିଆ ପକ୍ଷରୁ ମିଚେଲ ଷ୍ଟାର୍କ ସର୍ବାଧିକ ୬, ପ୍ୟାଟ କୁମିନ୍ସ ୩, ହାଜେଲଉଡ ଗୋଟିଏ ଉଇକେଟ ହାସଲ କରିଥିଲେ।
ସଂକ୍ଷିପ୍ତି ସ୍କୋର:
ଅଷ୍ଟ୍ରେଲିଆ ପ୍ରଥମ ଇନିଂସ- ୧୨୭ ଓଭରରେ ୫୮୯/୩ (ଇନିଂସ ଘୋଷଣା)।
ପାକିସ୍ତାନ ପ୍ରଥମ ଇନିଂସ- ୯୪.୪ ଓଭରରେ ୩୦୨ ଅଲଆଉଟ
(ୟାସିର ଶାହ- ୧୧୩, ବାବର ଆଜମ- ୯୭, ଆବାସ- ୨୯, ମିଚେଲ ଷ୍ଟାର୍କ- ୬/୬୬, ପ୍ୟାଟ କୁମିନ୍ସ- ୩/୮୩)।
ପାକିସ୍ତାନ ଦ୍ୱିତୀୟ ଇନିଂସ- ୧୬.୫ ଓଭରରେ ୩୯/୩ (ଫଲୋଅନ୍)
(ଶାନ୍ ମାସୁଦ- ୧୪*, ହାଜେଲଉଡ- ୨/୧୫)।
