ମୁମ୍ବାଇ,୨୧।୫(ପି.ଟି.): ଦିନିକିଆ ଫର୍ମାଟ ଦୃଷ୍ଟିକୋଣରୁ ଭାରତୀୟ ଅଧିନାୟକ ବିରାଟ କୋହଲିଙ୍କ ଅପେକ୍ଷା କ୍ରିକେଟ ଆଇକନ ସଚିନ ତେନ୍ଦୁଲଙ୍କରଙ୍କୁ ପସନ୍ଦ କରିଛନ୍ତି ପୂର୍ବତନ କ୍ରିକେଟର ଗୌତମ ଗମ୍ଭୀର। ସଚିନ୍ଙ୍କ କ୍ୟାରିୟର ଦୀର୍ଘ। ଦିନିକିଆରେ ମଧ୍ୟ ଏକାଧିକ ନିୟମରେ ପରିବର୍ତ୍ତନ ହୋଇଛି। ଏସବୁ ଦୃଷ୍ଟିକୋଣରୁ ଦେଖିବାକୁ ଗଲେ ସଚିନ କୋହଲିଙ୍କ ଆଗରେ ରହିବେ ବୋଲି ଗମ୍ଭୀର କହିଛନ୍ତି।
୨୦୧୩ରେ ଅବସର ନେଇଥିବା ସଚିନ ୪୬୩ଟି ଦିନିକିଆ ଖେଳିଛନ୍ତି। ୪୯ଟି ଶତକ ହାସଲ କରିବା ସହ ସେ ୪୪.୮୩ ରନ ହାରରେ ସେ ୧୮, ୪୨୬ ରନ ସଂଗ୍ରହ କରିଛନ୍ତି। ଅପରକ୍ଷରେ କୋହଲି ୨୪୮ ଦିନିକିଆ ଖେଳି ୪୩ଟି ଶତକ ହାସଲ କରିବା ସହ ୫୯.୩୩ ରନହାରରେ ୧୧, ୮୬୭ ରନ ସଂଗ୍ରହ କରିଛନ୍ତି। ଗୋଟିଏ ଧଳା ବଲ୍ ଓ ଇନ୍ସାଇଡ୍ ସର୍କଲରେ ୫ ନୁହଁ ୪ ଫିଲ୍ଡର ନିୟମରେ ସଚିନ ଖେଳିଥିଲେ। ତେଣୁ ମୋ ସଚିନ ମୋର ପସନ୍ଦ ବୋଲି ସେ ସ୍ପଷ୍ଟ କରିଛନ୍ତି।
ଏବେ କିନ୍ତୁ ୨ଟି ଧଳା ବଲ୍ରେ ଓ ୩ଟି ପାଓ୍ବାର ପ୍ଲେ ସହିତ ଦିନିକିଆ ଖେଳାଯାଉଛି। ପ୍ରଥମ ପାଓ୍ବାର ପ୍ଲେ ୧ରୁ ୧୦ ଓଭର ମଧ୍ୟ ଲାଗୁ ହୋଇଥାଏ। ଏଥିରେ ୩୦ ୟାର୍ଡ ସର୍କଲ ବାହାରେ ୨ ଫିଲ୍ଡରଙ୍କୁ ଜଗିବାର ସୁଯୋଗ ଦିଆଯାଇଥାଏ। ସେହିପରି ଦ୍ୱିତୀୟ ପାଓ୍ବାରୀ ପ୍ଲେ ୧୦ରୁ ୪୦ ଓଭର ମଧ୍ୟରେ ନିଆଯାଇଥାଏ ଓ ଏଥିରେ ୪ ଫିଲ୍ଡରଙ୍କୁ ବାହାରେ ଫିଲ୍ଡିଂ କରିବାର ସୁଯୋଗ ଦିଆଯାଇଥାଏ। ସେହିପରି ତୃତୀୟ ତଥା ଅନ୍ତିମ ପାଓ୍ବାର ପ୍ଲେ ୪୦ରୁ ୫୦ ଓଭର ମଧ୍ୟରେ ଲାଗୁ କରିବାକୁ ହୋଇଥାଏ ଓ ଏଥିରେ ୫ ଫିଲ୍ଡରଙ୍କୁ ସର୍କଲ ବାହାରେ ଦାୟିତ୍ୱ ଦିଆଯାଇଥାଏ। ତେଣୁ ନିୟମରେ ଏହି ପରିବର୍ତ୍ତନ ବ୍ୟାଟ୍ସମ୍ୟାନଙ୍କୁ ସୁହାଉଛି। ତେବେ ବିରାଟ କୋହଲିଙ୍କ ପ୍ରଦର୍ଶନ ଦୃଷ୍ଟାନ୍ତମୂଳକ ହୋଇଛି ବୋଲି ସେ କହିଛନ୍ତି। ୨ଟି ନୂଆ ବଲ୍ରେ ରିଭର୍ସ ସୁଇଙ୍ଗ୍ ହେବ ନାହିଁ। ସ୍ପିନ୍ରଙ୍କୁ ମଧ୍ୟ ସେତେଟା ସହାୟତା ମିଳିବ ନାହିଁ। ପୁଣି ୫୦ ଓଭରରେ ୫ ଫିଲ୍ଡର ରହିବା ବ୍ୟାଟ୍ସମ୍ୟାନଙ୍କ ପାଇଁ ଅଧିକ ଅନୁକୂଳ ପରିସ୍ଥିତି ସୃଷ୍ଟି କରିଛି। ସଚିନଙ୍କ ସମୟରେ ଏକଦା ୨୩୦ରୁ ୨୪୦ ସ୍କୋର ବିଜୟ ପାଇଁ ଯଥେଷ୍ଟ ଥିଲା। ସେତେବେଳେ ଦିନିକିଆ କ୍ରିକେଟ ଭିନ୍ନ ଥିଲା ବୋଲି ଗମ୍ଭୀର କହିଛନ୍ତି।
