ଦିଗପହଣ୍ଡି,୧୮ା୧(ଡି.ଏନ୍.ଏ.)- ଦିଗପହଣ୍ଡି ବ୍ଲକ ଗୋକର୍ଣ୍ଣପୁର ଗ୍ରାମ ଦଳିତ ସାହିର ବହୁ ସଂଖ୍ୟକ ମହିଳାଙ୍କ ଠାରୁ ପ୍ରାୟ ୧୦ ଲକ୍ଷଟଙ୍କା ଠକେଇ ନେଇ ଥାନାରେ ଅଭିଯୋଗ ହୋଇଛି। ସାହିରେ ରହୁଥିବା ଜଣେ ଗୋରୁ ବ୍ୟବସାୟୀ ଓ ତାଙ୍କ ସ୍ତ୍ରୀ ବିଭିନ୍ନ ଉପାୟରେ ମହିଳାମାନଙ୍କୁ ପ୍ରଲୋଭିତ କରି ଟଙ୍କା ଠକି ନେବାପରେ ଗତ କିଛିଦିନ ହେଲା ଗ୍ରାମରୁ ଫେରାର ହୋଇଯାଇଛନ୍ତି। ଏନେଇ ଗ୍ରାମର ବହୁ ସଂଖ୍ୟକ ମହିଳା ଦିଗପହଣ୍ଡି ଥାନାରେ ବ୍ୟବସାୟୀ ଓ ତାଙ୍କ ସ୍ତ୍ରୀଙ୍କ ନଁାରେ ଏତଲା ଦେଇଛନ୍ତି। ପୋଲିସ ଘଟଣାର ତଦନ୍ତ ଚଳାଇଛି। କେତେକ ନିର୍ଦ୍ଦିଷ୍ଟ ଘରୋଇ ଅର୍ଥ ଲଗାଣକାରୀ ସଂସ୍ଥାରୁ ଋଣ କରାଇଦେବାର ପ୍ରତିଶ୍ରୁତି ଦେଇ ପରବର୍ତ୍ତୀ ସମୟରେ ବ୍ୟାଙ୍କକୁ ଡାକିନେଇ ବିଭିନ୍ନ ପର୍ଯ୍ୟାୟରେ କୌଶଳ କରି ମହିଳାମାନଙ୍କଠାରୁ ଏଭଳି ଠକେଇ କରାଯାଇଥିବା ପ୍ରାଥମିକ ତଦନ୍ତରୁ ପୋଲିସ ସୂଚନା ପାଇଛି। ନିୟମିତ ବ୍ୟବଧାନରେ ଘରୋଇ ଅର୍ଥ ଲଗାଣ ସଂସ୍ଥାର କର୍ମଚାରୀମାନେ ଋଣ ଆଦାୟ ପାଇଁ ଗାଁ କୁ ଆସୁଥିବାବେଳେ ଠକେଇର ଶିକାର ହୋଇଥିବା ମହିଳାମାନେ ଋଣ ପରିଶୋଧ କରି ନ ପାରି ସେମାନଙ୍କୁ ଲୁଚୁଥିବା ଜାଣିବାକୁ ମିଳିଛି। ଏପରିକି କିଛି ମହିଳା ସେମାନଙ୍କ ସ୍ବାମୀମାନଙ୍କୁ ନ ଜଣାଇ ଋଣ ଟଙ୍କା ଆଣି ଏବେ ଠକେଇର ଶିକାର ହୋଇଥିବାରୁ ଘରେ ଘରେ ଅଶାନ୍ତି ଲାଗିରହିଛି। ମହିଳାମାନଙ୍କ ସରଳତାର ସୁଯୋଗ ନେଇ ଠକ ଦମ୍ପତି ଗାଁରୁ ଚମ୍ପଟ ମାରିବା ଘଟଣା ଚର୍ଚ୍ଚାର ବିଷୟ ପାଲଟିଛି।
