ବିଜେପୁର, ୨।୧୨(ଡି.ଏନ୍.ଏ.)- ଆଏଜ୍କେ ଶହେ ଦଶ ବଛର୍ ତଲେ ବରଗଡ଼ ଜିଲା ବିଜେପୁର ଥାନା ଥାପନା ହେଇଥିଲା। ଏଛେନ୍ ଶହେ ଦଶ ଖଁଡ ରାଜସ୍ବ ଗାଁ ସଂଗେ ବନିହାଁପାଲି, ଟିକରା ଗାଁର ଲୋକ ଇ ଥାନା ଉପ୍ରେ ନିରଭର କରୁଛନ୍। ବିଜେପୁର ଏନ୍ଏସି ସମେତ ୨୩ ଖଁଡ ପଁଚେତ୍ର ଦେଢ଼ ଲାଖ୍ନୁ ଅଏତ୍କା ଲୋକ୍ ରହୁଛନ୍। ସବୁ ଗାଁଗଁଡ଼ାରେ ଶିଅଁାତି ରକ୍ଷା କରବାରେ ଇ ଥାନାର ଦେନ୍ କେତନିକେତେ। ଦିନୁ ଦିନ୍କେ ଲୋକ୍ ବଢ଼ତେଲ ଯାଉଛନ୍, ସେ କଁଟେ ଥାନାର କରମ୍ଚାରୀ ବି ବଢ଼ୁଛନ୍। ହେଲେ ଦୁଖର କଥା ବ୍ରିଟିଶ୍ ଅମଲୁ ବନା ହେଇଥିବା ଥାନା କୁଠା ଆଏଜତକ୍ ନାଇଁ ବଦଲିବାର। କୁଠା ଆଗରୁ ଯେତ୍କି ଆର ଯେନ୍ତା ଥିଲା ସେନ୍ତା ନ ରହିଛେ। ଏନ୍ତାଥି କୁଠା ଅଭାବୁ ଥାନାର କାମ୍କାଯ୍ରେ ବଡ଼ଭାରି ଅସ୍ବିଧା ହେଉଥିବାର ଅଭିଯୋଗ ହେଉଛେ।
ମିଲିଥିବାର ସୂଚନା ହିସାବେ ବିଜେପୁର ଥାନାରେ ଝନେ ଇନ୍ସପେକ୍ଟର, ଦୁଇଝନ୍ ସବ୍ ଇନ୍ସପେକ୍ଟର, ତିନଝନ୍ ସହକାରୀ ସବ୍ଇନ୍ସପେକ୍ଟର, ସାତଝନ୍ କନଷ୍ଟେବଲ, କୁଡେଝନ୍ ହୋମଗାର୍ଡ କାମ କରୁଛନ୍। ହେଲେ ବଡ଼ାଦୁଖର କଥା ଥାନାରେ କୁଲ୍ ଦୁଇଟା ନ ବଖରା ରହିଛେ। ଇଆଡ଼େ ରାଏଜ୍ ସରକାର କାଯ୍କାରୀ କରିଥିବାର ୫ଟି ଅନ୍ସାରେ ଥାନାକେ କାମ୍କାଯ୍ରେ ଆସୁଥିବାର ଲୁକ୍କୁ ଭଲଭାବେ ବସବା ଉଠ୍ବାକେ ଠାନ୍ଟିକେ ଦେବାର ନିର୍ଦେଶ ରହିଛେ। ଯେନ୍ଠାନେ ତଦଁତ୍କାରୀ ଅଧ୍କାରୀ ବସବାର ଜାଗାଠାନ୍ ଅଭାବ ରହିଛେ ସେଠାନେ ଲୁକ୍କର କାଏଁ ହାଲ୍ ହେଉଥିବା ଇଥ୍ରୁ ବୁଝାପଡ଼ୁଛେ। ଏନ୍ତାଥି ତଦଁତ୍କାରୀ ଅଧ୍କାରୀ କେତେବେଲେ କେନ୍ ଗଛ୍ତଲେ ତ ଆରକେତେବେଲେ କେନ୍ କୁଠାଥି ବସି କାମ୍କାଯ୍ କରୁଥିବାର ଦେଖ୍ବାକେ ମିଲୁଛେ। ସେନ୍ତା ବିଜେପୁର ଥାନାରେ ଅଧ୍କାରୀ, କରମ୍ଚାରୀକଁର ରହିବାର ଲାଗି କୁଲ ଦୁଇଟା ନ ସରକାରୀ ଘର ରହିଛେ। ବାକି ସବୁ ପୁରନା ଘର ଧସ୍କି ବିଦ୍ରି ଯାଇଛେ। ଏନ୍ତାଥି ଅନେକ୍ ଅଧ୍କାରୀ କରମ୍ଚାରୀ ବାହାରେ ଘର ଭଡ଼ାନେଇ ରହୁଛନ୍। ଇ ଦିଗେ ରାଏଜ୍ ସରକାର ଦୁରୁଷ୍ଟି ଦେଇ ଥାନାର ନବକଲେବର କରବାକେ ଜନସାଧାରନରେ ଦାବି ହେଉଛେ। ଇ ସମସିଆ ବାବ୍ଦେ ଥାନୀଅ ବିଧାୟିକା ରୀତା ସାହୁକୁଁ ପଚରାଲାରୁ ସମସିଆ ବାବ୍ଦେ ମୋର ପାସେ ଖବର ନାଇଁଥାଇ, ଆପନକରନୁ ଜାନବାକେ ପାଏଲି। ନିହାତି ଭାବେ ସମସିଆର ସମାଧାନ କରାଯିବା ବଲି ସେ କହିଥିଲେ। ସେନ୍ତା ବିଜେପୁର ଥାନା ଅଧ୍କାରୀ ରାଜେନ୍ଦ୍ର ସିଆଲକୁଁ ପଚରାଲାରୁ ଥାନାରେ କୁଠା ସମସିଆ, ଅଧ୍କାରୀ, କରମ୍ଚାରୀକଁର ରହିବାର ଲାଗି ସରକାରୀ ଘରର ଅଭାବ୍ ବାବ୍ଦେ ଉପର ଅଧ୍କାରୀକୁଁ ଜନେଇଥିବାର ସେ କହିଛନ୍।