ଭୁବନେଶ୍ୱର, ୨୨।୯(କ୍ରୀଡ଼ା ପ୍ରତିନିଧି)-
ବ୍ୟାଙ୍କକ୍ଠାରେ ଶନିବାର ଶେଷ ହୋଇଥିବା ଥାଇଲାଣ୍ଡ ଅନ୍ତର୍ଜାତୀୟ ପାରା ବ୍ୟାଡ୍ମିଣ୍ଟନ ଟୁର୍ନାମେଣ୍ଟରେ ଓଡ଼ିଶାର ପ୍ରମୋଦ ୨ଟି ରୌପ୍ୟ ପଦକ ପାଇଛନ୍ତି। ସିଙ୍ଗଲ୍ସ ଫାଇନାଲରେ ସେ ଅନ୍ୟତମ ଭାରତୀୟ ଖେଳାଳି ତଥା ତାଙ୍କ ଡବଲ୍ସ ପାର୍ଟନର ମନୋଜ ସରକାରଙ୍କ ବିପକ୍ଷ ମ୍ୟାଚ ଅଧାରୁ ଓହରି ଯାଇଥିଲେ। ପାଦରେ ଆଘାତ ଯୋଗୁ ସେ ୯-୧୧ରେ ପଛୁଆ ଥିବାବେଳେ ରିଟାୟର୍ଡ ହେବାକୁ ପସନ୍ଦ କରିଥିଲେ। ପୂର୍ବରୁ ଅନୁଷ୍ଠିତ ଡବଲ୍ସ ଫାଇନାଲରେ ପ୍ରମୋଦ-ମନୋଜ ଯୋଡ଼ି ଥାଇଲାଣ୍ଡର ମଙ୍ଗ୍ଖୋନ୍ ବୁନ୍ସୁନ ଏବଂ ସିରିପଙ୍ଗ ଟିମାରୋମ୍ ଯୋଡ଼ିଙ୍କଠାରୁ ୧୬-୨୧, ୨୧-୮, ୧୪-୨୧ ପଏଣ୍ଟରେ ପରାସ୍ତ ହୋଇଥିଲେ। ”ଆହତ ସମସ୍ୟା ଯୋଗୁ ମୁଁ ରିସ୍କ ନେବାକୁ ଚାହିଁଲିନାହିଁ। ତେଣୁ ମନୋଜଙ୍କ ବିପକ୍ଷ ସିଙ୍ଗଲ୍ସ ଫାଇନାଲ ଅଧାରୁ ଓହରି ଯାଇଥିଲି। ତେଣୁ ରୌପ୍ୟ ପଦକ ପାଇ ମନରେ ଦୁଃଖ ନାହିଁ। ୩ ଦିନପରେ ଚାଇନା ଅନ୍ତର୍ଜାତୀୟ ପାରା ବ୍ୟାଡ୍ମିଣ୍ଟନ ଆରମ୍ଭ ହେବ। ତେଣୁ ବିଶ୍ରାମ ନେଇ ଚଳିତମାସ ୨୪ରୁ ୨୯ ପର୍ଯ୍ୟନ୍ତ ହେବାକୁଥିବା ଏହି ପ୍ରତିଯୋଗିତାରେ ଭଲ ପ୍ରଦର୍ଶନ କରିବାକୁ ଆଶା ରଖିଛି“ ବୋଲି ପ୍ରମୋଦ ପ୍ରକାଶ କରିଛନ୍ତି। ପ୍ରମୋଦ ଏଠାରେ ରୌପ୍ୟ ପଦକରେ ସନ୍ତୁଷ୍ଟ ହୋଇଥିଲେ ହେଁ ଟୋକିଓ ଅଲିମ୍ପିକ୍ସ ଆଶା ଉଜ୍ଜୀବିତ ରହିଛି। କାରଣ ନିକଟ ଅତୀତରେ ଅନୁଷ୍ଠିତ ଅନ୍ତର୍ଜାତୀୟ ମ୍ୟାଚ ଗୁଡ଼ିକରେ ଭଲ ପ୍ରଦର୍ଶନ କରିଥିବାରୁ ତାଙ୍କର ପଏଣ୍ଟ ସଂଖ୍ୟା ୫୫୩୦ରେ ପହଞ୍ଚତ୍ଛି। ଯାହାକି ଅନ୍ୟ ପ୍ରତିଯୋଗୀଙ୍କଠାରୁ ସର୍ବାଧିକ। ଡାନିଏଲ ବେଥେଲ ୫୪୧୦, ମନୋଜ ସରକାର ୨୫୭୦, ଦାଇଶୁକେ ଫୁଜିହାରା ୨୪୮୦, ଉକୁନ ରୁକେଣ୍ଡି ୨୨୧୦ ଓ ବିକ୍ରମ କୁମାର ୧୪୭୦ ପଏଣ୍ଟ ସହିତ ଯଥାକ୍ରମେ ୨ୟରୁ ୬ଷ୍ଠ ସ୍ଥାନରେ ରହିଛନ୍ତି।
