ସମ୍ଭଲ, ୪।୨: ଉତ୍ତର ପ୍ରଦେଶର ସମ୍ଭଲରେ ଏକ ନିଆରା ବିବାହ ଦେଖିବାକୁ ମିଳିଛି। ଚନ୍ଦୌସିର ଜଣେ ବ୍ୟକ୍ତି ପରିବହନ ବିଭାଗରେ କାମ କରୁଥିବା ବେଳେ ସେ ତାଙ୍କ ପୁଅର ବିବାହ ନିଆରା ଢଙ୍ଗରେ କରିଛନ୍ତି। ଏଥିରେ ବର ତ୍ରିରଙ୍ଗାର ତିନି ରଙ୍ଗରେ ତିଆରି ପଗଡି ପିନ୍ଧିଥିବା ବେଳେ କନ୍ୟାକୁ ଏହି ତ୍ରିରଙ୍ଗା ରଙ୍ଗରେ ତିଆରି କରାଯାଇଥିବା ଏକ ମାଳା ପିନ୍ଧାଇଥିଲେ। କେବଳ ସେତିକି ନୁହେଁ ଜନସଂଖ୍ୟା ନିୟନ୍ତ୍ରଣକୁ ଆଇନରେ ପରିଣତ କରିବାକୁ ଏକ ଫ୍ଲେକ୍ସ ତିଆରି କରି ବିବାହ ମଣ୍ଡପ ନିକଟରେ ଲଗାଯାଇଥିବା ଦେଖାଯାଇଛି। ଦେଶର ଜନସଂଖ୍ୟା ଆସନ୍ତା ୨ ବର୍ଷ ମଧ୍ୟରେ ୧୫୦ କୋଟି ଅତିକ୍ରମ କରିବାକୁ ବସିଥିବାରୁ ସେ ଏପରି କରିଥିବା କହିଛନ୍ତି। ଏମିତିକି ମଣ୍ଡପକୁ ମଧ୍ୟ ତ୍ରିରଙ୍ଗାର ତିନି ରଙ୍ଗରେ ସଜାଯାଇଥିଲା। ଆହୁରି ମଧ୍ୟ ବିବାହ ସମୟରେ ଦେଶଭକ୍ତି ଗୀତ ଶୁଣିବାକୁ ମିଳିଥିଲା। ଚନ୍ଦୌସିର ପରିବହନ ବିଭାଗରେ କାମ କରୁଥିବା ଅନିଲ ମିଶ୍ରଙ୍କ ପୁଅ ମୋହିତ ମିଶ୍ରଙ୍କ ବିବାହରେ ଏଭଳି ଦୃଶ୍ୟ ଦେଖିବାକୁ ମିଳିଥିଲା। ମୋହିତ ମିଶ୍ର ସୋମବାର ସୋନମ ପାଠକଙ୍କୁ ବିବାହ କହିଛନ୍ତି।
ସୂଚନାଯୋଗ୍ୟ, ଏହି ବିବାହରେ ଯେଉଁ ନିମନ୍ତ୍ରଣ ପତ୍ର ବଣ୍ଟାଯାଇଥିଲା ସେଥିରେ ହିନ୍ଦୀରେ ଗୋଟିଏ ଲାଇନ୍ ଲେଖି ସିଏଏ ଓ ଏନ୍ଆର୍ସିକୁ ସମର୍ଥନ ଜଣାଇ କିଛି ବାର୍ତ୍ତା ମଧ୍ୟ ଦିଆଯାଇଥିଲା। ତେବେ ଦେଶରେ ସିଏଏ ଓ ଏନ୍ଆର୍ସିକୁ ବିରୋଧ କରି ହିଂସା ଭଳି ପରିସ୍ଥିତି ଉପୁଜିବା ଓ ଅନେକ ଗାଡି ମୋଟର ପୋଡି ଦେବା ଭଳି ଘଟଣା ଅନିଲଙ୍କୁ ଆଦୌ ଭଲ ଲାଗି ନ ଥିଲା। ସେଥିପାଇଁ ସେ ନିଜ ପୁଅଙ୍କ ବିବାହ କାର୍ଡରେ ସିଏଏ ଓ ଏନ୍ଆର୍ସିକୁ ସମର୍ଥନ ଜଣାଇବା ସହ ଏହାର ବାସ୍ତବିକତା ସମ୍ପର୍କରେ ସୂଚନା ଦେଇଥିଲେ। ଏବେ ସେ ତାଙ୍କ ପୁଅର ବିବାହକୁ ରାଷ୍ଟ୍ର ଉଦ୍ଦେଶ୍ୟରେ ସମର୍ପିତ କରିଥିବା କୁହନ୍ତି।
