ପୁରୁଷୋତ୍ତମପୁର,୨୯।୨(ଡି.ଏନ୍.ଏ.): ଗଞ୍ଜାମ ଜିଲାର ପ୍ରସିଦ୍ଧ ଶକ୍ତିପୀଠ ଇଷ୍ଟଦେବୀ ମା’ ତାରାତାରିଣୀ ମନ୍ଦିର ଟ୍ରଷ୍ଟ ବୋର୍ଡ ବୈଠକ ଶନିବାର ମନ୍ଦିର ପରିସରରେ ଅନୁଷ୍ଠିତ ହୋଇଯାଇଛି। ବୋର୍ଡ ପରିଚାଳନା ପରିଷଦର ଟ୍ରଷ୍ଟି ତଥା ଅତିରିକ୍ତ ଜିଲାପାଳ କବୀନ୍ଦ୍ର ସାହୁଙ୍କ ପୌରୋହିତ୍ୟରେ ଅନୁଷ୍ଠିତ ବୈଠକରେ ମାର୍ଚ୍ଚ ୧୦, ୧୭, ୨୪, ୩୧ ଓ ଅପ୍ରେଲ ମାସ ୭ ତାରିଖରେ ମା’ଙ୍କ ମଙ୍ଗଳବାର ଯାତ୍ରା କିଭଳି ପରିଚାଳନା କରାଯିବ, କେଉଁ ବାବଦରେ କେତେ ଖର୍ଚ୍ଚ ହେବ ସେ ନେଇ ଏକ ବଜେଟ ପ୍ରସ୍ତୁତ ହୋଇଥିଲା। ଏହାସହ ସ୍ବତନ୍ତ୍ର ଦର୍ଶନ ଓ ବସ୍ ସେବା ବାବଦରେ ଆଦାୟ ହେଉଥିବା ରାଜସ୍ବକୁ ମନ୍ଦିର ଉନ୍ନୟନ ପରିଷଦ ବଦଳରେ ଟ୍ରଷ୍ଟ ବୋର୍ଡ ଆକାଉଣ୍ଟରେ ଜମା ହେବ ବୋଲି ନିଷ୍ପତ୍ତି ନିଆଯାଇଛି। ଦର୍ଶନ ଟିକେଟ ବ୍ୟବସ୍ଥାକୁ ଜିଲାପାଳ ଉଚ୍ଛେଦ ଲାଗି ପଦକ୍ଷେପ ନେଇଥିବାରୁ ମନ୍ଦିରର ରାଜସ୍ବ କମିଯାଉଥିବା ହେତୁ ବିକଳ୍ପ ବ୍ୟବସ୍ଥା ଲାଗି ଆଲୋଚନା ହୋଇଛି।
