ଅନୁଗୋଳ ଅଫିସ, ୬।୧୧-ଅନୁଗୋଳ ଜିଲାପାଳ ତଥା ଅନୁଗୋଳ-ତାଳଚେର-ମେରାମଣ୍ଡଳୀ ଉନ୍ନୟନ କର୍ତ୍ତୃପକ୍ଷ(ତାମଡା)ର ଉପାଧ୍ୟକ୍ଷ ମନୋଜ କୁମାର ମହାନ୍ତି ମଙ୍ଗଳବାର ଅପରାହ୍ନରେ ଅଚାନକ ତାମଡା କାର୍ଯ୍ୟାଳୟ ପରିଦର୍ଶନରେ ଯାଇଥିଲେ। ତେବେ କାର୍ଯ୍ୟାଳୟରେ ଅଧାରୁ ଅଧିକ କର୍ମଚାରୀ ଅନୁପସ୍ଥିତ ଥିବା ଦେଖି ଜିଲାପାଳ ବିରକ୍ତି ପ୍ରକାଶ କରିଥିଲେ। ଏପରି କି ତାମଡା ସଚିବ ବଇତୁରା ଦୀପଙ୍କୁ ଡାକି ସମ୍ପୃକ୍ତ କର୍ମଚାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ନିର୍ଦ୍ଦେଶ ଦେଇଥିଲେ। ଏଥିସହ ଅନୁପସ୍ଥିତି ପାଇଁ କାରଣ ଦର୍ଶାଅ ନୋଟିସ୍ ମଧ୍ୟ ଜାରି କରିଥିବା ସୂଚନା ମିଳିଛି।
ଅପରାହ୍ନ ୪ଟାରୁ ସାଢ଼େ ୪ଟା ମଧ୍ୟରେ ଜିଲାପାଳ ହଠାତ୍ ତାମଡା କାର୍ଯ୍ୟାଳୟରେ ପହଞ୍ଚିଥିଲେ। ଏହି ସମୟରେ ମାତ୍ର ୩ ଜଣ ୪ର୍ଥ ଶ୍ରେଣୀ କର୍ମଚାରୀଙ୍କ ସହ ଅନ୍ୟ ୫ ଜଣ କାର୍ଯ୍ୟାଳୟରେ ଉପସ୍ଥିତ ଥିଲେ। ଜିଲାପାଳ କର୍ମଚାରୀଙ୍କ ଉପସ୍ଥାନ ଖାତା ସହ କ୍ୟାଶ ବୁକ୍ ଯାଞ୍ଚ କରିଥିଲେ। ସେହିପରି ଜିଲା କାର୍ଯ୍ୟାଳୟରେ ଥିବା ଡେପୁଟି କଲେକ୍ଟର ତଥା ତାମଡାର ଅତିରିକ୍ତ ଦାୟିତ୍ୱରେ ଥିବା ବଇତୁରା ଦୀପଙ୍କୁ ମଧ୍ୟ ଡକାଇଥିଲେ। କର୍ମଚାରୀମାନେ କାର୍ଯ୍ୟାଳୟକୁ କେତେବେଳେ ଆସୁଛନ୍ତି, କେତେବେଳେ ଯାଉଛନ୍ତି ତାହାର ହିସାବ ମାଗିଥିଲେ। ଅନୁପସ୍ଥିତ ରହୁଥିବା କର୍ମଚାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ନିର୍ଦ୍ଦେଶ ଦେଇଥିଲେ। ଏଥିସହ ତାମଡା କାର୍ଯ୍ୟାଳୟକୁ ଆସୁଥିବା ଦଲାଲ୍ଙ୍କ ବିରୋଧରେ ଥାନାରେ ମାମଲା ରୁଜୁ କରିବାକୁ ମଧ୍ୟ ସେ ନିର୍ଦ୍ଦେଶ ଦେଇଥିଲେ। ପ୍ଲାନିଂ ବିଭାଗର କେତେଜଣ କର୍ମଚାରୀ ଘରେ କାର୍ଯ୍ୟାଳୟ ଖୋଲିଥିବା ଶୁଣିବା ପରେ ସେଠାରେ ଚଢ଼ାଉ କରିବାକୁ ନିର୍ଦ୍ଦେଶ ଦେଇଥିଲେ। ଅନ୍ୟପକ୍ଷରେ ସ୍ଥାୟୀ ସଚିବ ନ ଥିବାରୁ ଡାମଡାରେ ମନଇଚ୍ଛା ଶାସନ ଚାଲିଥିବା ଚର୍ଚ୍ଚା ହେଉଛି।
