ମୁମ୍ବାଇ: ମଲ୍ଟି ଷ୍ଟାର ଓ ଡ୍ରାମାରେ ଭରପୂର ଥିବା ଫିଲ୍ମ ‘ତାନାଜି: ଦ ଅନସଙ୍ଗ ଓ୍ବାରିୟର’ର ଟ୍ରେଲର ରିଲିଜ୍ ହୋଇଛି। ଟ୍ରେଲରଟି ୩ ମିନିଟ୍ ୨୧ ସେକେଣ୍ଡର ହୋଇଥିବା ବେଳେ ଏହାକୁ ଦର୍ଶକ ବେଶ୍ ପସନ୍ଦ କରିଛନ୍ତି। ରିଲିଜ୍ ହେବାର କିଛି ଘଣ୍ଟା ମଧ୍ୟରେ ଏହାକୁ ଲକ୍ଷାଧିକ ଲୋକ ଦେଖିସାରିଲେଣି। ଓମ୍ ରାଉତଙ୍କ ନିର୍ଦ୍ଦେଶିତ ଏହି ଫିଲ୍ମରେ ଅଜୟ ଦେବଗନ, ସୈଫ ଅଲ୍ଲୀ ଖାଁ ଓ କାଜୋଲ ନଜର ଆସିବେ। ସବୁଠାରୁ ବଡ଼ କଥା ହେଲା ଏହି ଫିଲ୍ମ ଜରିଆରେ ଅଜୟ ସେଞ୍ଚୁରି ମାରିଛନ୍ତି। ଅର୍ଥାତ୍ ଏହା ତାଙ୍କ କ୍ୟାରିୟରର ୧୦୦ତମ ଫିଲ୍ମ। ଏହି ଫିଲ୍ମ ୧୭ତମ ଶତାବ୍ଦୀର ତାନାଜି ମାଲସୁରେଙ୍କ ଜୀବନୀ ଉପରେ ଆଧାରିତ ହୋଇଛି। ଏଥିରେ ତାନାଜି ଚରିତ୍ରରେ ଅଜୟ ଓ ସୈଫଙ୍କୁ ଉଦୟ ଭାନ ଚରିତ୍ରରେ ଦେଖିବାକୁ ମିଳିବ। ଏଥିରେ କାଜୋଲ ଅତିଥି କଳାକାର ଭାବେ ନଜର ଆସିବାକୁ ଥିବା ବେଳେ ଲମ୍ବା ସମୟ ପରେ ସିଲଭର ସ୍କ୍ରିନ୍ରେ ଅଜୟ ଓ କାଜୋଲଙ୍କୁ ଏକାଠି ଦେଖିପାରିବେ ଦର୍ଶକ। ଏହି ଫିଲ୍ମ ୨୦୨୦ ଜାନୁୟାରୀ ୧୦ରେ ପରଦାକୁ ଆସିବ।
