ସମ୍ବଲପୁର,୮ା୬(ବ୍ୟୁରୋ): ସମ୍ବଲପୁର ରେଙ୍ଗାଲି ତଲାବିରା କୋଇଲାଖଣି ୧ ଓ ୨ରେ ଲାଗି ରହିଥିବା ବିବାଦର ସମାଧାନର ବାଟ ଫିଟୁନାହିଁ । କମ୍ପାନୀ କୋଇଲା ଉତ୍ତୋଳନ କାମ ଆରମ୍ଭ କରିଥିବା ବେଳେ ବିସ୍ଥାପିତ ଓ ଅଞ୍ଚଳବାସୀ ଏହାକୁ ବିରୋଧ ଜାରି ରଖିଛନ୍ତି। ଏହି ସମସ୍ୟାର ସମାଧାନ ପାଇଁ ସୋମବାର ଉପଜିଲାପାଳଙ୍କ ଅଫିସ ପରିସରରେ ଉପଜିଲାପାଳ ଅନିରୁଦ୍ଧ ପ୍ରଧାନଙ୍କ ଅଧ୍ୟକ୍ଷତାରେ ତ୍ରିପାକ୍ଷିକ ବୈଠକ ଅନୁଷ୍ଠିତ ହୋଇଥିଲା। ଏହି ବୈଠକରେ ରେଙ୍ଗାଲି ବିଧାୟକ ନାଉରୀ ନାଏକ, ଏନଏଲସି ଓ ଆଦାନୀ କମ୍ପାନୀ ଅଧିକାରୀମାନେ ଉପସ୍ଥିତ ରହି ନିଯୁକ୍ତି, କ୍ଷତିପୂରଣ, ସିଏସ୍ଆର ଅନୁଦାନ ଉପରେ ଆଲୋଚନା କରିଥିଲେ । ଆଲୋଚନା ପରେ କମ୍ପାନୀ ପକ୍ଷରୁ କୁହାଯାଇଥିଲା ଯେ, କୋଇଲା ଉତ୍ତୋଳନ ଅନୁସାରେ ଧୀରେ ଧୀରେ ନିଯୁକ୍ତି ବଢିବ । କ୍ଷତିଗ୍ରସ୍ତ ଓ ପ୍ରଭାବିତ ଅଞ୍ଚଲରେ ସିଏସ୍ଆର ଅନୁଦାନ ଖର୍ଚ୍ଚ କରାଯିବ। ସ୍ଥାନୀୟ ଜନ ପ୍ରତିନିଧି ଓ ପ୍ରଶାସନର ଅନୁମୋଦନ କ୍ରମେ ପ୍ରକଳ୍ପ ହାତକୁ ନିଆଯିବ। ସରକାରୀ ନିୟମ ଅନୁସାରେ ଜମି ଓ ଘର କ୍ଷତିପୂରଣ ପ୍ରଦାନ କରାଯିବ ବୋଲି ବୈଠକରେ ସ୍ଥିର ହୋଇଥିଲା। ଏହି ସମସ୍ତ କାର୍ଯ୍ୟ ତଦାରଖ ଓ ପରିଚାଳନା କରିବା ପାଇଁ ଏକ କୋର୍ କମିଟି ଗଠନ କରାଯାଇଥିଲା। ସେଥିରେ ଉପଜିଲାପାଳ, ତହସିଲଦାର, ସ୍ଥାନୀୟ ବିଧାୟକ ଓ ସରପଞ୍ଚ ସଦସ୍ୟ ରହିବେ। ସେମାନେ ବିଭିନ୍ନ ସମସ୍ୟା ଓ ଅଞ୍ଚଳର ବିକାଶ ଉପରେ ଆଲୋଚନା ପାଇଁ ପ୍ରତି ମାସର ଦ୍ୱିତୀୟ ମଙ୍ଗଳବାର ଉପଜିଲାପାଳଙ୍କ ଅଫିସ ପରିସରରେ ବୈଠକ କରିବେ ବୋଲି ସ୍ଥିର ହୋଇଥିଲା। କମ୍ପାନୀ ପକ୍ଷରୁ ଦକ୍ଷତା ବିକାଶ ଓ ଡ୍ରାଇଭିଙ୍ଗ ଟ୍ରେନିଂ ସେଣ୍ଟର ଖୋଲିବ । ତାଲିମ ଦେଇ ଶିକ୍ଷାଗତ ଯୋଗ୍ୟତା ଅନୁସାରେ କମ୍ପାନୀ ଚାକିରୀ ଓ ରୋଜଗାର ଯୋଗାଇ ଦେବ ବୋଲି ବୈଠକରେ ପ୍ରସ୍ତାବ ଗୃହୀତ ହୋଇଥିଲା । ଅନ୍ୟମାନଙ୍କ ମଧ୍ୟରେ ଡେପୁଟି କଲେକ୍ଟର ବିନୋଦ ବିହାରୀ ଦାସ, ରେଙ୍ଗାଲି ତହସିଲଦାର ସୁନୀଲ ମେହେର, ଖିଣ୍ଡା ସରପଞ୍ଚ ନୀଳବତୀ ଓରାମ, ଠେଲକୋଲି ଥାନାଧିକାରୀ ସୁରୁବାବୁ ଛତ୍ରିଆ, ଦୀପକ ପାଣ୍ଡେ, ପିତାମ୍ବର ବିଶ୍ୱାଳ ପ୍ରମୁଖ ଉପସ୍ଥିତ ଥିଲେ ।
