କଟକ ଅଫିସ,୨୨।୧- ଚଳିତ ରଣଜୀ ସିଜିନରେ ଓଡ଼ିଶା ଦଳ ୬ ମ୍ୟାଚ୍ ଖେଳିବା ପରେ ପ୍ରଥମ ପରାଜୟର ସମ୍ମୁଖୀନ ହୋଇଛି। ଟାଙ୍ଗୀସ୍ଥିତ ଡ୍ରିମ୍ସ ଗ୍ରାଉଣ୍ଡରେ ଅନୁଷ୍ଠିତ ଗ୍ରୁପ୍-ସି’ର ଏକ ମ୍ୟାଚ୍ରେ ଓଡ଼ିଶା ୪ ଉଇକେଟରେ ଜମ୍ମୁ କଶ୍ମୀରଠାରୁ ପରାସ୍ତ ହୋଇଛି। ଅଲ୍ରାଉଣ୍ଡ ପ୍ରଦର୍ଶନ କରିଥିବା ଜମ୍ମୁ କଶ୍ମୀରର ଆକ୍ୱିବ ନବିଙ୍କୁ ମ୍ୟାନ ଅଫ୍ ଦି ମ୍ୟାଚ୍ ଭାବେ ପୁରସ୍କୃତ କରାଯାଇଥିଲା। ବିଜୟ ସହ ଭ୍ରମଣକାରୀ ଜମ୍ମୁ କଶ୍ମୀରକୁ ୬ ପଏଣ୍ଟ ମିଳିଛି। ୬ଟି ମ୍ୟାଚ୍ରୁ ୩୨ପଏଣ୍ଟ ସଂଗ୍ରହ କରି ଜମ୍ମୁ କଶ୍ମୀର ଏହି ଗ୍ରୁପ୍ରେ ଟେବୁଲର ଶୀର୍ଷ ସ୍ଥାନକୁ ଉଠିଛି। ପୂର୍ବରୁ ଶୀର୍ଷରେ ଥିବା ଓଡ଼ିଶା ୬ ମ୍ୟାଚ୍ରୁ ୪ ବିଜୟ ଏବଂ ଗୋଟିଏ ଲେଖାଏ ପରାଜୟ ଓ ଡ୍ର ସହ ୨୮ ପଏଣ୍ଟ ସଂଗ୍ରହ କରି ଦ୍ୱିତୀୟ ସ୍ଥାନକୁ ଖସିଛି। ଆସନ୍ତା ୨୭ରୁ ଭୁବନେଶ୍ୱରର କିଟ୍ ଗ୍ରାଉଣ୍ଡରେ ଆସାମ ବିପକ୍ଷରେ ପରବର୍ତ୍ତୀ ମ୍ୟାଚ୍ ଖେଳିବ ଓଡ଼ିଶା।
ପ୍ରଥମ ଇନିଂସ ୧୬୧ରନରେ ସୀମିତ ରହିବାପରେ ଭ୍ରମଣକାରୀ ଜମ୍ମୁ କଶ୍ମୀର ଦଳ ୧୨୪ ରନରେ ଅଲ୍ଆଉଟ ହୋଇଥିଲା। ୩୭ ରନରେ ଆଗୁଆ ଥିବା ଘରୋଇ ଓଡ଼ିଶା ଦଳ ସୋମବାର ୨ୟ ଦିବସ ଷ୍ଟମ୍ପ୍ସ ଅପସାରଣ ସୁଦ୍ଧା ଦ୍ୱିତୀୟ ଇନିଂସରେ ୭ ଉଇକେଟ ବିନିମୟରେ ୧୩୬ ରନ କରିଥିଲା। ତେବେ ମଙ୍ଗଳବାର ସକାଳେ ଓଡ଼ିଶା ପୂର୍ବଦିନର ଅସମାପ୍ତ ୨ୟ ଇନିଂସ ସ୍କୋରରେ ଆଉ ୩୦ ରନ ଯୋଗ କରି ୧୬୬ ରନରେ ସୀମିତ ରହିଥିଲା। ରାଜେଶ ଧୂପର ୧୩, ରାଜେଶ ମହାନ୍ତି ୯ ଓ ସୂର୍ଯ୍ୟକାନ୍ତ ପ୍ରଧାନ ୧୩ ରନ କରି ଆଉଟ୍ ହୋଇଥିଲେ। ଉମର ନାଜିର ଏହି ୩ ବ୍ୟାଟ୍ସମ୍ୟାନଙ୍କୁ ଆଉଟ୍ କରିବା ସହ ୫ ଉଇକେଟ୍ ସଫଳତା ପାଇଥିଲେ। ବସନ୍ତ ମହାନ୍ତି ୫ ରନରେ ଅପରାଜିତ ରହିଥିଲେ। ଫଳରେ ଜମ୍ମୁ କଶ୍ମୀର ସମ୍ମୁଖରେ ଓଡ଼ିଶା ୨୦୪ ରନର ବିଜୟ ଲକ୍ଷ୍ୟ ଧାର୍ଯ୍ୟ କରିଥିଲା। ଜବାବରେ ଭ୍ରମଣକାରୀ ଦଳ ୩୯ ରନରେ ଅହମ୍ମଦ ବନ୍ଦେ (୫ ରନ) ଓ ଶୁଭମ ଖଜୁରିଆ (୯ରନ) ଉଇକେଟ ହରାଇଥିଲା। କିନ୍ତୁ ଅନ୍ୟତମ ଓପନର ସୂର୍ଯ୍ୟାଂଶ ରାଇନା ଓ ଶୁଭମ ପୁନ୍ଦିର ୩ୟ ଉଇକେଟ୍ ଯୋଡ଼ିରେ ଗୁରୁତ୍ୱପୂର୍ଣ୍ଣ ୭୭ ରନ ଭାଗୀଦାରି ସୃଷ୍ଟି କରି ଦଳ ପାଇଁ ବିଜୟ ଆଶା ଦୃଢ଼ୀଭୂତ କରିଥିଲେ। ଶୁଭମଙ୍କୁ ୪୫ ରନରେ ଆଉଟ କରି ଦେବବ୍ରତ ପ୍ରଧାନ ଓଡ଼ିଶା ପାଇଁ ଏକ ବଡ଼ ବ୍ରେକଥ୍ରୁ ଦେଇଥିଲେ। ଏହାପରେ ଦେବବ୍ରତ ଅଧିନାୟକ ପରେଭେଜ ରସୁଲ (୧୫) ଓ ଉଇକେଟକିପର ଫାଜିଲ ରସିଦ (୧)ଙ୍କୁ କ୍ଲିନ ବୋଲ୍ଡ କରିବା ସହ ଧୌର୍ଯ୍ୟପୂର୍ଣ୍ଣ ଅର୍ଦ୍ଧଶତକ ଖେଳିଥିବା ସୂର୍ଯ୍ୟାଂଶ (୬୯ ବଲ୍, ୧୫୧ ବଲ)ଙ୍କୁ ଆଉଟ୍ କରିଥିଲେ। ଫଳରେ ଜମ୍ମୁ କଶ୍ମୀର ୧୬୩ ରନରେ ୬ଟି ଉଇକେଟ ହରାଇବା ଯୋଗୁ ମ୍ୟାଚ୍ରେ ଓଡ଼ିଶା ପାଇଁ ପୁନର୍ବାର ବିଜୟ ଆଶା ସଞ୍ଚାର ହୋଇଥିଲା। ତେବେ ଅସମାପ୍ତ ୭ମ ଉଇକେଟରେ ଅବଦୁଲ ସାମଦ (୩୦ ରନ) ଓ ଆକ୍ବୁବ ନବି (୨୬ରନ) ୪୨ରନ ସଂଗ୍ରହ କରି ଭ୍ରମଣକାରୀ ଦଳକୁ ରୋମାଞ୍ଚକ ବିଜୟ ଭେଟି ଦେଇଥିଲେ। ଓଡ଼ିଶା ପକ୍ଷରୁ ଦେବବ୍ରତଙ୍କୁ ୪ ଏବଂ ରାଜେଶ ମହାନ୍ତି ଓ ସୂର୍ଯ୍ୟକାନ୍ତ ପ୍ରଧାନ ଗୋଟିଏ ଲେଖାଏ ଉଇକେଟ ନେଇଥିଲେ। ୪୮ ରନରେ ୪ଟି ଉଇକେଟ ଅକ୍ତିଆର କରି ପ୍ରଥମ ଶ୍ରେଣୀ କ୍ରିକେଟରେ ଦେବବ୍ରତ ନିଜର ଶ୍ରେଷ୍ଠ ପ୍ରଦର୍ଶନ କରିଛନ୍ତି।
