ପୁଣେ,୧୧।୧୨- ଟୋକିଓ ଅଲିମ୍ପିକ୍ସ ପାଇଁ ଆଉ ମାତ୍ର ୭ ମାସ ବାକି ରହିଥିବାବେଳେ ଭାରତୀୟ ଦଳର ପଦକ ଆଶାକୁ ଶକ୍ତ ଝଟ୍କା ଲାଗିଛି। ଶୁଟର ରବି କୁମାର ଓ ବକ୍ସର ସୁମିତ୍ ସାଙ୍ଗଓ୍ବାନ ଡୋପ ଟେଷ୍ଟରେ ଫେଲ ହୋଇଛନ୍ତି। ଏହା ସଭିଙ୍କୁ ଚକିତ କରିଦେଇଛି। କାରଣ ଦୁଇ କ୍ରୀଡ଼ାରେ ପ୍ରାୟ ଡୋପ ନିୟମ ଭଙ୍ଗ କରିବା ଦେଖା ଯାଏନାହିଁ। ୨୯ ବର୍ଷୀୟ ରବି କୁମାର ଦେଶ ପାଇଁ ବିଶ୍ୱକପ୍, ରାଜ୍ୟଗୋଷ୍ଠୀ କ୍ରୀଡ଼ା ଭଳି ବହୁ ଅନ୍ତର୍ଜାତୀୟ ଇଭେଣ୍ଟରେ ପଦକ ଜିତି ସାରିଛନ୍ତି। ନାଡା ଅନୁଯାୟୀ, ଦିଲ୍ଲୀଠାରେ ଗତ ଜୁନ୍ରେ ଅନୁଷ୍ଠିତ କୁମାର ସୁରେନ୍ଦର ସିଂ ସ୍ମାରକୀ ପ୍ରତିଯୋଗିତା ବେଳେ ତାଙ୍କ ଟେଷ୍ଟ କରାଯାଇଥିଲା। ତାଙ୍କ ନମୁନାରେ ପ୍ରୋପ୍ରାନୋଲୋଲ ନାମକ ନିଷିଦ୍ଧ ଔଷଧ ମିଳିଛି। ଅଲିମ୍ପିଆନ ସୁମିତ୍ (୯୧ କିଗ୍ରା)ଙ୍କ ନମୁନାରେ ଏସିଟାଜୋଲାମାଇଡ୍ ନାମକ ଔଷଧ ମିଳିଛି, ଯାହା ଓ୍ବାଡା ପକ୍ଷରୁ ଜାରି ନିଷିଦ୍ଧ ଔଷଧ ତାଲିକାରେ ରହିଛି। ୨୬ ବର୍ଷୀୟ ବକ୍ସର ୨୦୧୭ ଏସିଆନ ଚାମ୍ପିୟନଶିପରେ ରୌପ୍ୟ ଓ ବିଶ୍ୱ ଚାମ୍ପିୟନଶିପ୍ର କ୍ୱାର୍ଟର ଫାଇନାଲରେ ସ୍ଥାନ ପାଇଥିଲେ। ଗତ ଦୁଇ ସପ୍ତାହ ମଧ୍ୟରେ ଦ୍ୱିତୀୟ ବକ୍ସର ଭାବେ ସେ ଡୋପ୍ ଟେଷ୍ଟରେ ବିଫଳ ହୋଇଛନ୍ତି। ତାଙ୍କ ପୂର୍ବରୁ ମହିଳା ବକ୍ସର ନିରଜ (୫୭ କେଜି) ଡୋପ୍ରେ ବିଫଳ ହୋଇ ବାସନ୍ଦ ହୋଇଥିଲେ। ଶୁଟର ରବି କହିଛନ୍ତି, ମୁଁ ମ୍ୟୁନିକ ବିଶ୍ୱକପ୍ରୁ ଫେରିବା ପରେ ମାଇଗ୍ରେନ କାରଣରୁ ମୋର ପ୍ରବଳ ମୁଣ୍ଡବିନ୍ଧା ହେଉଥିଲା। ଏ ସମସ୍ୟା ମୋ ଭଉଣୀର ମଧ୍ୟ ରହିଛି। ମୋ ପରିବାର ଲୋକେ ଡାକ୍ତରଙ୍କୁ ଘରକୁ ଆଣିଥିଲେ। ମୁଁ ତାଙ୍କୁ ଶୁଟର ବୋଲି କହିଥିଲି। ତାଙ୍କ ପରାମର୍ଶ କ୍ରମେ ମେଡିସିନ ଗ୍ରହଣ କରିଥିଲି। ଅନ୍ୟପକ୍ଷରେ ୨୦୧୨ ଅଲିମ୍ପିକ୍ସରେ ଭାରତ ପାଇଁ ପ୍ରତିନିଧିତ୍ୱ କରିଥିବା ସାଙ୍ଗଓ୍ବାନ ଏବେ ଆଖିରେ ଲାଗିଥିବା ଆହତ ସମସ୍ୟାରୁ ମୁକୁଳିବାକୁ ଚେଷ୍ଟା କରୁଛନ୍ତି। ଏଥିନେଇ ଫିଜିସିଆନଙ୍କ ପରାମର୍ଶରେ ମେଡିସିନ ନେଉଛନ୍ତି। ଉକ୍ତ ମେଡିସିନଗୁଡ଼ିକ ମଧ୍ୟରୁ ଗୋଟିଏରେ ଏସିଟାଜୋଲାମାଇଡ୍ ଥିଲା। ଏଣୁ ଟୋକିଓ ଅଲିମ୍ପିକ୍ କ୍ୱାଲିଫାୟର୍ସ ପାଇଁ ଚୟନ ପ୍ରକ୍ରିୟାରେ ଭାଗ ନେବାର ଖୁବ୍ କମ୍ ସୁଯୋଗ ରହିଛି।
