ରେମୁଣା,୨୯।୭(ଡି.ଏନ.ଏ.)-ବାଲେଶ୍ୱର ଜିଲା ରେମୁଣା ଶିଳ୍ପାଞ୍ଚଳ ଥାନା ଅଧୀନ ୧୬ନମ୍ବର ଜାତୀୟ ରାଜପଥର ବାମପଦା ଛକରେ ବାରମ୍ବାର ଦୁର୍ଘଟଣା ଘଟି ଏକ ଡେଥ ଜୋନ୍ରେ ପରିଣତ ହୋଇଛି। ପୂର୍ବତନ ବିଧାୟକ ଗୋବିନ୍ଦ ଚନ୍ଦ୍ର ଦାସଙ୍କ ନେତୃତ୍ୱରେ ବାମପଦା ସୁରକ୍ଷା ମଞ୍ଚ ପକ୍ଷରୁ ଏଠାରେ ଏକ ପୋଲ ନିର୍ମାଣ ଲାଗି କେନ୍ଦ୍ରମନ୍ତ୍ରୀ ପ୍ରତାପ ଚନ୍ଦ୍ର ଷଡ଼ଙ୍ଗୀଙ୍କ ନିକଟରେ ଦାବି କରାଯାଇଛି। ଜାତୀୟ ରାଜପଥକୁ ଭାଗ କରୁଥିବା ଲେଭଲକ୍ରସିଂ ସ୍ଥାନରେ ପୋଲ ନିର୍ମାଣ କରାଗଲେ ସ୍ଥାନୀୟ ଲୋକ, ରେମୁଣାବାସୀ ତଥା ଯାତାୟାତ କରୁଥିବା ଲୋକେ ଉପକୃତ ହୁଅନ୍ତେ ବୋଲି ଦାବି କରାଯାଇଛି।
ଶେରଗଡରୁ ଶାଳବଣି ପର୍ଯ୍ୟନ୍ତ ଜାତୀୟ ରାଜପଥର ଦୁଇ ପାଶ୍ୱର୍ର୍ ରାସ୍ତା ଅସୁରକ୍ଷିତ ହୋଇପଡ଼ିଛି। ରାସ୍ତା ସାରା ଖାଲ ଖମା ହୋଇଯାଇଥିବାରୁ ତାହା ଉପରେ ଯାତାୟାତ ବିପଦ ଜନକ ହୋଇପଡ଼ିଛି ା ରାଜପଥ ସଂଲଗ୍ନ ଅଞ୍ଚଳରେ ୧୦ ଏକର ପରିମିତ ସ୍ଥାନରେ ଏକ ସୁନ୍ଦର ପାର୍କ ନିର୍ମାଣ ପାଇଁ ମଧ୍ୟ ପ୍ରସ୍ତାବ ଦିଆଯାଇଛି ା ରାଜପଥ ପ୍ରାଧିକରଣ ବିଭାଗର ଆଞ୍ଚଳିକ ଉନ୍ନୟନ କାର୍ଯ୍ୟକ୍ରମରେ ତାହା କରାଯିବାକୁ ମନ୍ତ୍ରୀଙ୍କୁ ଅନୁରୋଧ କରାଯାଇଛି। ଫଳରେ ରାଜସ୍ବ ବୃଦ୍ଧି ସାଙ୍ଗକୁ ନିଯୁକ୍ତି ସୁଯୋଗ ମଧ୍ୟ ବୃଦ୍ଧି ପାଆନ୍ତା। ରେମୁଣା ଗୋଲେଇ ଅଞ୍ଚଳରେ ରାତ୍ରିକାଳୀନ ଯାତାୟାତ କରୁଥିବା ଲୋକଙ୍କ ପାଇଁ ଜାତୀୟ ରାଜପଥ ଉପରକୁ ଉଠିବା ଲାଗି ବ୍ୟବସ୍ଥା କରାଯିବା ଓ ରେମୁଣା ଗୋଲେଇ ନିକଟରେ ଲୋକଙ୍କ ଭିଡକୁ ଦୃଷ୍ଟିରେ ରଖି ଏକ ଶୌଚାଳୟ ନିର୍ମାଣ ପାଇଁ ମଧ୍ୟ ଦାବି ଉପସ୍ଥାପନ କରାଯାଇଛି। ଗୁରୁବାର ଓଡ଼ଶା ଭବନରେ କେନ୍ଦ୍ରମନ୍ତ୍ରୀ ପ୍ରତାପ ଷଡ଼ଙ୍ଗୀଙ୍କ ଅସ୍ଥାୟୀ କାର୍ଯ୍ୟାଳୟରେ ଭେଟି ତାଙ୍କୁ ଏହି ଦାବିପତ୍ର ପ୍ରଦାନ କରାଯାଇଛି ା ପୂର୍ବତନ ବିଧାୟକ ଦାସଙ୍କ ସହିତ ବାମପଦା ସୁରକ୍ଷା ମଞ୍ଚ ସଭାପତି ବିଶ୍ୱଜିତ୍ ଘୋଷ, ଭାଜପା ରାଜ୍ୟ ସମ୍ପାଦକ ଶୋଭନା ମହାନ୍ତି ଏବଂ ବରିଷ୍ଠ ନେତା ପର୍ଶୁରାମ ପରିଡ଼ା ଉପସ୍ଥିତ ଥିଲେ।
