ନୂଆଦିଲ୍ଲୀ,୨୭।୪: ଚଳିତ ବର୍ଷ ଅକ୍ଷୟ ତୃତୀୟା ସୁନାଗହଣା କରାବାରକୁ ସମ୍ପୂର୍ଣ୍ଣ କ୍ଷତିଗ୍ରସ୍ତ କରିଛି। କରୋନା ପାଇଁ ସାରା ଦେଶରେ ଘୋଷଣା ହୋଇଥିବା ଲକ୍ଡାଉନ ଯୋଗୁ ଷ୍ଟୋର ବନ୍ଦ ରହିଥିବା ବେଳେ ଲୋକମାନେ ଘରେ ରହିବା ଫଳରେ ସୁନା କାରବାରରେ ଏଭଳି ସ୍ଥିତି ଦେଖାଯାଇଛି। ଗତବର୍ଷ ତୁଳନାରେ ଚଳିତବର୍ଷ କାରବାର ପୂରା ଠପ୍ ହୋଇଯାଇଛି। ଲକ୍ଡାଉନ ଉଠିଲେ କାରବାର କିଛିଟା ହେବ ବୋଲି ଜୁଏଲର୍ସ ଆଶା ରଖିଥିଲେ। ମାତ୍ର ଏହା ବଢିବା ଯୋଗୁ ଆଶା ଆଶାରେ ରହିଗଲା। କେବଳ ଡିଜିଟାଲ ପ୍ଲାଟ୍ଫର୍ମରେ ସୁନା ଗହଣା ବିକ୍ରି ହୋଇଥିବା ଅଲ୍ ଇଣ୍ଡିଆ ଜେମସ୍ ଆଣ୍ଡ ଜୁଏଲେରି ଡୋମେଷ୍ଟିକ କାଉନସିଲ ଅଧ୍ୟକ୍ଷ ଅନନ୍ତ ପଦ୍ମନାଭନ କହିଛନ୍ତି। ଗତ ବର୍ଷ ଅକ୍ଷୟ ତୃତୀୟା ତୁଳନାରେ ଚଳିତ ବର୍ଷ ବିକ୍ରି ୯୭ରୁ ୯୮ % ଖସିଛି ବୋଲି ସେ ମତବ୍ୟକ୍ତ କରିଛନ୍ତି। ଚଳିତ ବର୍ଷ ଅନ୍ଲାଇନରେ ବିକ୍ରି ନେଇ ଜୁଏଲର୍ସ ଲକିଙ୍ଗ ଅଫ୍ ପ୍ରାଇସ, ଗୋଲ୍ଡ ଓନରଶିପ ସାର୍ଟିଫିକେଟ ଭଳି ଅନ୍ୟ ଆକର୍ଷଣୀୟ ଅଫର ଦେଇଥିଲେ। ଲକ୍ଡାଉନ ଉଠିବା ପରେ ଏଗୁଡିକର ଡେଲିଭରି ମିଳିବ। ଜୁନ୍ ଆଡକୁ ସୁନା କାରବାର ଟ୍ରାକ୍କୁ ଫେରିବ । ସେହିଭଳି ଦୀପାବଳିରେ ଚାହିଦା ଫେରିବା ଆଶା କରାଯାଉଛି ବୋଲି ପଦ୍ମନାଭନ ମତ ଦେଇଛନ୍ତି। ଚଳିତ ବର୍ଷ ଅକ୍ଷୟ ତୃତୀୟା ବିକ୍ରିକୁ ନିୟମିତ ବିକ୍ରି ସହ ତୁଳନା କରାଯାଇ ନ ପାରେ ବୋଲି କଲ୍ୟାଣ ଜୁଏଲର୍ସ ଅଧ୍ୟକ୍ଷ ଟି.ଏସ୍.କଲ୍ୟାଣ ରମଣ କହିଛନ୍ତି। ଚ୍ୟାଲେଞ୍ଜିଂ ସମୟରେ ବିକ୍ରିରେ କିଛି ନୂତନତ୍ୱ ଆଣିଥିବା ସେନ୍କୋ ଗୋଲ୍ଡ ଆଣ୍ଡ ଡାଇମଣ୍ଡସର କାର୍ଯ୍ୟନିର୍ବାହୀ ନିର୍ଦ୍ଦେଶକ ଶୁଭଙ୍କର ସେନ କହିଛନ୍ତି।
