ଦେବଗଡ଼,୧୭।୪(ସ୍ବ.ପ୍ର.)-ଦେବଗଡ ଜିଲା ତିଲେଇବଣି ବ୍ଲକ ପ୍ରଭାଶୁଣି ଗ୍ରାମ ନିକଟରେ ବୁଧବାର ଭୋର ଏକ ଦୁର୍ଘଟଣା ଘଟିଛି। ଟ୍ରକ୍ ଓ ଆମ୍ବୁଲାନ୍ସ ମଧ୍ୟରେ ମୁହାଁମୁହିଁ ଧକ୍କା ହୋଇଛି। ଫଳରେ ଜଣଙ୍କର ମୃତ୍ୟୁ ଘଟିଥିବାବେଳେ ୩ ଜଣ ଗୁରୁତର ଆହତ ହୋଇଛନ୍ତି। ମୃତକ ହେଲେ ଆମ୍ବୁଲାନ୍ସ ଡ୍ରାଇଭର ରଞ୍ଜିତ ପ୍ରଧାନ (୩୬)। ତାଙ୍କ ଘର ରେଢ଼ାଖୋଲରେ। ସେ ତିଲେଇବଣିରେ ଭଡ଼ାରେ ରହୁଥିଲେ। ଗୁରୁତରମାନେ ହେଲେ ଟାଇଁସର ଗ୍ରାମର ଟେକ୍ନିସିଆନ୍ ଟିକନ ଗଡନାୟକ(୨୫) ଓ ହେଲପର୍ ରିପନ ପ୍ରଧାନ(୨୨)। ଆଉ ଜଣେ ଆହତଙ୍କର ପରିଚୟ ମିଳିପାରିନାହିଁ।
ଆମ୍ବୁଲାନ୍ସ କର୍ମଚାରୀମାନେ ଜଣେ ରୋଗୀଙ୍କୁ ବୁର୍ଲା ବଡ ଡାକ୍ତରଖାନାରେ ଛାଡି ଦେବଗଡ଼ ଅଭିମୁଖେ ଆସୁଥିଲେ। ତିଲେଇବଣି-କୁଚିଣ୍ଡା ଜାତୀୟ ରାଜପଥର ପ୍ରଭାଶୁଣି ଗ୍ରାମ କରଡାପାଳଠାରେ ଏକ ମାଲବାହୀ ଟ୍ରକ୍ ଆମ୍ବୁଲାନ୍ସକୁ ସମ୍ମୁଖରୁ ଧକ୍କା ଦେଇଥିଲା। ଫଳରେ ଘଟଣାସ୍ଥଳରେ ସମସ୍ତେ ଛିଟିକି ପଡିଥିଲେ। ସ୍ଥାନୀୟ ଲୋକେ ସେମାନଙ୍କୁ ଉଦ୍ଧାର କରି କୁଚିଣ୍ଡା ଡାକ୍ତରଖାନାକୁ ନେଇଥିଲେ। ତେବେ ଡ୍ରାଇଭରଙ୍କ ବାଟରେ ମୃତ୍ୟୁ ଘଟିଥିଲା। କୁଚିଣ୍ଡାରେ ଜଣେ ଚିକିତ୍ସିତ ହୋଇଥିବାବେଳେ ଟେକ୍ନିସିଆନ୍ ଓ ହେଲପରଙ୍କୁ ବୁର୍ଲା ପଠାଯାଇଥିଲା। ସ୍ବାସ୍ଥ୍ୟବସ୍ଥା ଗମ୍ଭୀର ଥିବାରୁ ସେମାନଙ୍କୁ ପରେ କଟକ ମେଡିକାଲକୁ ସ୍ଥାନାନ୍ତରିତ କରାଯାଇଛି। ଦୁର୍ଘଟଣା ଘଟାଇ ଟ୍ରକ୍ ଡ୍ରାଇଭର ଫେରାର୍ ହୋଇଯାଇଛନ୍ତି। ସ୍ଥାନୀୟ ପୋଲିସ ଘଟଣାର ଅଧିକ ତଦନ୍ତ କରୁଛି।
