ନୂଆଦିଲ୍ଲୀ, ୨୯ା୫ (ପି.ଟି.)-ଇଣ୍ଟରନ୍ୟାଶନାଲ କ୍ରିକେଟ କାଉନ୍ସିଲ (ଆଇସିସି) ବୋର୍ଡର ଏକ ଗୁରୁତ୍ୱପୂର୍ଣ୍ଣ ବୈଠକ ଗୁରୁବାର ଅନୁଷ୍ଠିତ ହୋଇଯାଇଛି। ଏହା ଟେଲି କନଫରେନ୍ସିଂ ଜରିଆରେ ହୋଇଥିଲା। ଏଥିରେ ଅଷ୍ଟ୍ରେଲିଆରେ ହେବାକୁ ଥିବା ଟି୨୦ ବିଶ୍ୱକପ୍ ସମ୍ପର୍କରେ କୌଣସି ନିଷ୍ପତ୍ତି ନିଆଯାଇ ପାରିନାହିଁ। ଜୁନ୍ ୧୦ରେ ହେବାକୁଥିବା ପରବର୍ତ୍ତୀ ବୈଠକରେ ଯାହା କିଛି ସ୍ଥିର କରାଯିବ ବୋଲି ଆଇସିସି କହିଛି। ଅଷ୍ଟ୍ରେଲିଆରେ ଟି୨୦ ବିଶ୍ୱକପ୍ ଅକ୍ଟୋବର ୧୮ରୁ ନଭେମ୍ବର ୧୫ ପର୍ଯ୍ୟନ୍ତ ହେବାର କାର୍ଯ୍ୟକ୍ରମ ରହିଛି। କିନ୍ତୁ କୋଭିଡ୍-୧୯ ମହାମାରୀ ଯୋଗୁ ଏହାକୁ ସ୍ଥଗିତ ରଖାଯିବା ନେଇ କଳ୍ପନା ଜଳ୍ପନା ପ୍ରକାଶ ପାଇଛି। ଆଇସିସିର ଏହି ମେଗା ଇଭେଣ୍ଟ ଯଦି ସ୍ଥଗିତ ରୁହେ ତେବେ ଏହି ସମୟରେ ବର୍ତ୍ତମାନ ସସ୍ପେଣ୍ଡ ରହିଥିବା ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ଆୟୋଜନ ଲାଗି ସମ୍ଭାବନା ଦେଖା ଦେବ। ଅନ୍ୟପକ୍ଷରେ କୋଭିଡ୍-୧୯ ଯୋଗୁ ଦେଖାଦେଇଥିବା ସ୍ବାସ୍ଥ୍ୟଗତ ସମସ୍ୟାକୁ ଦୃଷ୍ଟିରେ ରଖି ଟି୨୦ ବିଶ୍ୱକପ୍ ନେଇ ବିକଳ୍ପ ପନ୍ଥା ଉପରେ ନିବେଶକାରୀମାନଙ୍କ ସହିତ ଆଲୋଚନା ଜାରି ରଖିବା ଲାଗି ବୋର୍ଡ ଆଇସିସି ମ୍ୟାନେଜମେଣ୍ଟକୁ ଅନୁରୋଧ କରିଛି। ଆଇସିସିର ବହୁ ଆଭ୍ୟନ୍ତରୀଣ ଓ ଗୋପନୀୟ ବିଷୟ ଗଣମାଧ୍ୟମରେ ଲିକ୍ ହେଉଥିବାରୁ ସେ ନେଇ ବିଦାୟୀ ଚେୟାରମ୍ୟାନ ଶଶାଙ୍କ ମନୋହରଙ୍କ ସମେତ ବୋର୍ଡର ଅନ୍ୟ ସଦସ୍ୟମାନେ ଉଦ୍ବେଗ ପ୍ରକାଶ କରିଥିଲେ। ଏହା କିପରି ହେଉଛି ତାହାର ତଦନ୍ତ ପାଇଁ ଆଇସିସିର ଏଥିକ୍ସ ଅଫିସରଙ୍କୁ କୁହାଯାଇଛି। ବୈଠକରେ ଟି୨୦ ବିଶ୍ୱକପ୍କୁ ନିର୍ଦ୍ଧାରିତ କାର୍ଯ୍ୟସୂଚୀ ଅନୁସାରେ ଅବା ୨୦୨୧କୁ ଘୁଞ୍ଚାଇ ଦେବା କିମ୍ବା ୨୦୨୨ରେ କରିବା ଆଦି ପ୍ରସ୍ତାବ ଉପରେ ଆଲୋଚନା ହୋଇଥିଲେ ମଧ୍ୟ ସର୍ବସମ୍ମତି ନିଷ୍ପତ୍ତି ହୋଇପାରି ନ ଥିଲା।
