ନୂଆଦିଲ୍ଲୀ,୧୯।୬: ଏୟାର ଇଣ୍ଡିଆରେ ପାଇଲଟ ଓ କ୍ର୍ୟୁ ମେମ୍ବରଙ୍କ ଭିତରେ ହୋଇଥିବା ଝଗଡାର ଏକ ମାମଲା ସାମ୍ନାକୁ ଆସିଛି। ଏହାପରେ ବିମାନ ଏଆଇ-୭୭୨ର ପାଇଲଟ ଓ କେବିନ କ୍ର୍ୟୁ ମେମ୍ବରଙ୍କୁ ଏୟାର ଇଣ୍ଡିଆ କାର୍ଯ୍ୟରୁ ବାହାର କରିଦେଇଥିବା ଜଣାପଡ଼ିଛି। ସୂଚନାଯୋଗ୍ୟ, ସୋମବାର ବେଙ୍ଗାଲୁର ଏୟାରପୋର୍ଟରେ ବିମାନ ଉଡାଣ ଭରିବା ସମୟରେ ପାଇଲଟ ଓ କ୍ର୍ୟୁ ମେମ୍ବର ମଧ୍ୟରେ ଝଗଡା ହୋଇଥିଲା। ପାଇଲଟ କ୍ର୍ୟୁ ମେମ୍ବରଙ୍କୁ ତାଙ୍କର ଟିଫିନ ସଫା କରିବାକୁ କହିଥିଲେ। ଏହାକୁ ନେଇ ୨ଜଣଙ୍କ ଭିତରେ ବଚସା ହୋଇଥିଲା। ଦେଖୁ ଦେଖୁ ଏହି ଯୁକ୍ତିତର୍କ ହାତାହାତିକୁ ବଦଳିଯାଇଥିଲା। ବିମାନରେ ଥିବା ଅନ୍ୟ କର୍ମଚାରୀ ଏହି ଘଟଣା ବାବଦରେ କମ୍ପାନୀ କର୍ତ୍ତୃପକ୍ଷଙ୍କୁ ଜଣାଇଥିଲେ। କମ୍ପାନୀ ପକ୍ଷରୁ ୨ଜଣଙ୍କୁ ତୁରନ୍ତ ବିମାନରୁ ଓହ୍ଲାଇବା ପାଇଁ ନିର୍ଦ୍ଦେଶ ଦିଆଯାଇଥିଲା। ଏଥିଯୋଗୁ ବିମାନଟି ପ୍ରାୟ ୨ଘଣ୍ଟା ବିଳମ୍ବରେ ଉଡାଣ ଭରିଥିଲା। ତେବେ ଏନେଇ ପଚରାଉଚରା କରିବା ପାଇଁ ଗୁରୁବାର ଦିଲ୍ଲୀ ମୁଖ୍ୟାଳୟକୁ ୨ଜଣଙ୍କୁ ଡକାଯାଇଛି। ଏଥିସହ ସେମାନେ ଏବେ ସାମୟିକ ଭାବେ କାର୍ଯ୍ୟରୁ ନିଲମ୍ବିତ ଥିବା ଜଣାପଡ଼ିଛି।
