କେନ୍ଦୁଝର, ୧୭ା୫ (ସ୍ବ.ପ୍ର.)-କରୋନା ଭୂତାଣୁ ସଂକ୍ରମଣ ରୋକିବା ଲାଗି ସମଗ୍ର ଦେଶରେ ଏବେ ଲକ୍ଡାଉନ୍ ଘୋଷଣା କରାଯାଇଛି। କାମଧନ୍ଦା ସବୁ ଠପ୍ ହୋଇଯିବାରୁ ଶ୍ରମିକ, କାରିଗର ଶ୍ରେଣୀର ଲୋକଙ୍କ ଜୀବିକା ଉପରେ ଏହାର ପ୍ରଭାବ ପଡିଛି। ଦିନକୁ ଦୁଇ ଓଳି ଖାଇବା ମଧ୍ୟ ସେମାନଙ୍କ ପାଇଁ କଷ୍ଟକର ହୋଇପଡିଲାଣି। ଏଭଳି ଦୁର୍ଦ୍ଦିନ ମଧ୍ୟରେ ରହିଛନ୍ତି କେନ୍ଦୁଝର ଜିଲା ଆନନ୍ଦପୁର ଉପଖଣ୍ଡ ଧକୋଠା ଗ୍ରାମର ପଥରଶିଳ୍ପୀଙ୍କ ପରିବାର। ମୁଣ୍ଡ ଝାଳ ତୁଣ୍ଡରେ ମାରି ନିହାଣ ମୁନରେ ନିର୍ଜୀବ ପଥରକୁ ଜୀବନ୍ତ ରୂପ ଦେଉଥିବା ଏହି ପରିବାର ଉପରେ ପଡିଛି କରୋନା ପାହାର। ମୂର୍ତ୍ତି ତିଆରି କରି ବିକିଲେ ସେମାନଙ୍କ ପରିବାର ଚଳେ। ମୂର୍ତ୍ତି ବିକ୍ରି ବନ୍ଦ ହୋଇଯାଇଥିବାରୁ ଶିଳ୍ପୀମାନଙ୍କ ପାଇଁ ପରିବାର ଚଳାଇବା କଷ୍ଟକର ହୋଇପଡିଛି ।
ବହୁବର୍ଷ ଧରି ଏହି ଗ୍ରାମର ଲୋକମାନେ ପଥର ଖନନ କରି ମୂର୍ତ୍ତି ଗଢି ତାହାକୁ ବିକି ଚଳି ଆସୁଛନ୍ତି। ୧୯୮୦ ମସିହାରେ ଏହି ପଥର କାମକୁ ମାନ୍ୟତା ମିଳିଥିଲା । ସେମାନେ ସୋସାଇଟି କରି ପଥର ମୂର୍ତ୍ତି ଗଢ଼ି ବିକ୍ରି କରି ଗୁଜୁରାଣ ମେଣ୍ଟାଉଥିଲେ। ପରବର୍ତ୍ତୀ ସମୟରେ ପଥର ଅଭାବରୁ ସେମାନଙ୍କ ଜୀବିକା କ୍ଷତିଗ୍ରସ୍ତ ହୋଇଥିଲା । ଖଣି ଲିଜ ସମସ୍ୟା ଓ ପଥର ଉପରେ କଟକଣା ଆଦି କାରଣରୁ ଏଭଳି ସମସ୍ୟା ଦେଖାଦେଇଥିଲେ ହେଁ ସେମାନେ ପୁରୁଣା ବୃତ୍ତିକୁ ଛାଡି ପାରି ନ ଥିଲେ। ପଥରରେ ବିଭିନ୍ନ ଦେବଦେବୀ, ମହାପୁରୁଷଙ୍କ ମୂର୍ତ୍ତି ତଥା ପ୍ରତିମୂର୍ତ୍ତି ଗଢ଼ିବା ସହ ମନ୍ଦିର କାରୁକାର୍ଯ୍ୟ, ତୋରଣ ଆଦି ଗଢିଥାନ୍ତି। ବାହାରକୁ ଯାଇ ଅନେକ ବଡ଼ ବଡ଼ ହୋଟେଲ, ବଙ୍ଗଳା ଆଦିରେ ସୌନ୍ଦର୍ଯ୍ୟପୂର୍ଣ୍ଣ ମୂର୍ତ୍ତି ଓ ସୌଖୀନ ସାମଗ୍ରୀ ନିର୍ମାଣ ମଧ୍ୟ କରିଥାନ୍ତି। ବହୁ ଶିଳ୍ପୀ ବାହାର ରାଜ୍ୟରେ ସେମାନଙ୍କ ପାରଦର୍ଶିତା ଦେଖାଇ ସ୍ବତନ୍ତ୍ର ପରିଚୟ ସୃଷ୍ଟି କରିପାରିଛନ୍ତି। ଜିଲାକୁ ଆସୁଥିବା ପର୍ଯ୍ୟଟକମାନେ ଉକ୍ତ ଗ୍ରାମକୁ ଯାଇ ବିଭିନ୍ନ ମୂର୍ତ୍ତିକୁ କିଣି ନେଇଥାନ୍ତି। ଲକ୍ଡାଉନ୍ ପାଇଁ ଗମନାଗମନ ଉପରେ ରୋକ ଲାଗିଥିବାରୁ ମୂର୍ତ୍ତି ବାହାରକୁ ନେଇ ବିକିବା ସମ୍ଭବ ହୋଇପାରୁନାହିଁ। ଫଳରେ ବହୁ କଷ୍ଟରେ ଚଳିବାକୁ ପଡୁଛି ବୋଲି କୁହନ୍ତି ଶିଳ୍ପୀ ଗଣେଶ୍ୱର ପଲେଇ। ମୂର୍ତ୍ତି ଗଢି ହାତ ବାନ୍ଧି ବସିଛୁ । କିଛି ସରକାରୀ ସହାୟତା ମିଳିଲେ ଉପକୃତ ହୋଇ ପାରନ୍ତୁ ବୋଲି କୁହନ୍ତି ଶିଳ୍ପୀ ସୁବାସ ଖିଲାର। ଏ ସମ୍ପର୍କରେ ଆନନ୍ଦପୁର ଉପଜିଲାପାଳ ରବୀନ୍ଦ୍ର ସାହୁ କହିଛନ୍ତି ଯେ, ସେମାନଙ୍କୁ ଆର୍ଥିକ ସହାୟତା ପାଇଁ କୌଣସି ସରକାରୀ ଘୋଷଣା ହୋଇନାହିଁ । ଆସିଲେ ସେମାନଙ୍କୁ ସହାୟତା ମିଳିବ ।