ଜାତିସଂଘ,୨୭ା୬: ଚଳିତ ସପ୍ତାହରେ ଜାପାନର ଓସାକାଠାରେ ଜି-୨୦ ରାଷ୍ଟ୍ରଗୋଷ୍ଠୀର ସମ୍ମିଳନୀ ଅନୁଷ୍ଠିତ ହେବାକୁ ଯାଉଥିବାବେଳେ ଏହା ପୂର୍ବରୁ ବୁଧବାର ହଂକଂରେ ହଜାର ହଜାର ଲୋକ ୧୯ଟି ସଦସ୍ୟ ରାଷ୍ଟ୍ରର ବାଣିଜି୍ୟକ ଦୂତାବାସ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଛନ୍ତି। ସେମାନେ କଳା ପୋଷାକ ପିନ୍ଧି ମୁହଁରେ ପଟି ବାନ୍ଧି ନୀରବ ଶୋଭାଯାତ୍ରାରେ ବାହାରିଥିଲେ। ବିବାଦୀୟ ପ୍ରତ୍ୟର୍ପଣ ବିଲ୍କୁ ହଂକଂବାସୀ ବିରୋଧ କରିଆସୁଥିବାବେଳେ ଜି-୨୦ ସମ୍ମିଳନୀ ଅବସରରେ ଏଥିପାଇଁ ଚାଇନା ରାଷ୍ଟ୍ରପତିଙ୍କ ଉପରେ ଚାପ ପକାଇବାକୁ ସେମାନେ ବିଦେଶୀ ନେତାମାନଙ୍କୁ ଅନୁରୋଧ କରିଛନ୍ତି। ହଂକଂକୁ ଉଚ୍ଚମାନର ସ୍ବାୟତ୍ତତା ପ୍ରଦାନ, ମୁକ୍ତ ବାଣିଜ୍ୟ ପରିବେଶ, ନାଗରିକମାନଙ୍କ ବାଣିଜ୍ୟ ଅଧିକାରର ସୁରକ୍ଷା ଆଦି ପ୍ରସଙ୍ଗରେ ବିଶ୍ୱ ନେତାମାନେ ସମ୍ମିଳନୀରେ ଆଲୋଚନା କରିବା ଲାଗି ବିକ୍ଷୋଭକାରୀମାନେ ଦାବି କରି ବାଣିଜି୍ୟକ ଦୂତାବାସର ଅଧିକାରୀଙ୍କୁ ସ୍ମାରକପତ୍ର ପ୍ରଦାନ କରିଥିଲେ।
ହଂକଂରେ ପ୍ରତ୍ୟର୍ପଣ ବିଲ୍କୁ ବିରୋଧ କରି ଦୀର୍ଘଦିନ ହେଲା ବିକ୍ଷୋଭ ଜାରି ରହିଛି। ଜି-୨୦ ଏକ ଅନ୍ତର୍ଜାତୀୟ ଫୋରମ ହୋଇଥିବାରୁ ଏଥିରେ ବିକ୍ଷୋଭ ପ୍ରସଙ୍ଗ ଆଲୋଚନା ଲାଗି ଅନୁମତି ଦିଆଯିବ ନାହିଁ ବୋଲି ଚାଇନା ସହକାରୀ ବହିର୍ବ୍ୟାପାର ମନ୍ତ୍ରୀ ଝାଙ୍ଗ୍ ଜୁନ୍ ସୋମବାର କହିବା ପରେ ସାନି ଆନ୍ଦୋଳନ ମୁଣ୍ଡ ଟେକିଛି। ମନ୍ତ୍ରୀଙ୍କ ମନ୍ତବ୍ୟରୁ ହଂକଂ ପ୍ରସଙ୍ଗଠାରୁ ଚାଇନା ଦୂରେଇ ରହିବାକୁ ଚାହୁଁଥିବା ସ୍ପଷ୍ଟ ହୋଇଯାଇଛି। ଫଳରେ ହଂକଂବାସୀ ଏହାକୁ ଗୁରୁତର ସହ ନେଇ ବିଦେଶୀ ରାଷ୍ଟ୍ରଗୁଡ଼ିକର ସହଯୋଗ ଚାହିଁଛନ୍ତି। ହଂକଂର ବ୍ୟବସାୟିକ କେନ୍ଦ୍ରସ୍ଥଳ ଚାଟର ଗାର୍ଡେନରେ ହଜାର ହଜାର ଲୋକ ରୁଣ୍ଡ ହୋଇ ବିକ୍ଷୋଭ ପ୍ରଦର୍ଶନ କରିଥିଲେ। ହଂକଂକୁ ଚାଇନାର ଉପନିବେଶୀୟ ଶାସନରୁ ମୁକ୍ତ କରିବା ଲାଗି ସେମାନେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ଓ ଅନ୍ୟ ନେତାମାନଙ୍କୁ ଅନୁରୋଧ କରିଥିଲେ। ଆମେ ହଂକଂବାସୀ ମର୍ଯ୍ୟାଦାର ସହ ନିର୍ଭୟରେ ବସବାସ କରିବାକୁ ଚାହୁଁ। ଚାଇନାର ପ୍ରତ୍ୟର୍ପଣ ନୀତି ଚଳିବ ନାହିଁ ବୋଲି ସେମାନେ ସ୍ଲୋଗାନ ଦେଇଥିଲେ।
