ନୂଆଦିଲ୍ଲୀ ୧୬ା୨: ୨୦୨୩ ନଭେମ୍ବରରେ ହେବାକୁ ଥିବା ଜି-୨୦ ଶିଖର ସମ୍ମିଳନୀରେ ଭାରତ ଅଧ୍ୟକ୍ଷତା କରିବ। ମଙ୍ଗଳବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ଅନୁଷ୍ଠିତ କ୍ୟାବିନେଟ ବୈଠକରେ ସ୍ବତନ୍ତ୍ର ସଚିବାଳୟ ଗଠନ କରାଯିବା ପ୍ରସ୍ତାବକୁ ମଞ୍ଜୁରୀ ମିଳିଛି। ଏହି ସଚିବାଳୟର ପରିଚାଳନା ଦାୟିତ୍ୱରେ ରହିବେ ସ୍ବରାଷ୍ଟ୍ର ଏବଂ ଅର୍ଥ ବିଭାଗ ସଚିବ। ଏହି ସଚିବାଳୟ ୨୦୨୪ ଫେବୃୟାରୀ ପର୍ଯ୍ୟନ୍ତ କାର୍ଯ୍ୟ କରିବ। ସଚିବାଳୟ ସଂଚାଳନ ଦାୟିତ୍ୱ ଆପେକ୍ସ କିମିଟି ନିକଟରେ ରହିବ। ଏହି କମିଟିର ଅଧ୍ୟକ୍ଷତା ପ୍ରଧାନମନ୍ତ୍ରୀ କରିବାକୁ ଥିବାବେଳେ ଏଥିରେ ଅର୍ଥମନ୍ତ୍ରୀ, ସ୍ବରାଷ୍ଟ୍ରମନ୍ତ୍ରୀ, ବହିର୍ବ୍ୟାପାର ମନ୍ତ୍ରୀ ପ୍ରମୁଖ ସାମିଲ ହେବେ । ବିଶ୍ୱ ଅର୍ଥନୀତି ଉପରେ ଜି-୨୦ର ବଡ଼ ଭୂମିକା ରହିଛି। ୧୯ଟି ଦେଶ ଏବଂ ୟୁରୋପିଆନ ୟୁନିୟନକୁ ନେଇ ଗଠନ ହୋଇଛି ଜି-୨୦। ବିଶ୍ୱ ଅର୍ଥନୀତିରେ ଦେଖାଯାଉଥିବା ସଙ୍କଟର ସମାଧାନ ପାଇଁ ୧୯୯୯ରେ ଜି-୨୦ ଗଠନ କରାଯାଇଥିଲା।
