ବାରିପଦା ଅଫିସ,୧୯ା୫- ପିଆରଏମ୍ ମେଡିକାଲରେ ଶିଶୁ ବଦଳ ଘଟଣାକୁ ସପ୍ତାହେ ବିତି ଯାଇଥିବା ବେଳେ ଏ ଦିଗରେ ମେଡ଼ିକାଲ କର୍ତ୍ତୃପକ୍ଷ କିମ୍ବା ଜିଲାପ୍ରଶାସନ ପକ୍ଷରୁ କୌଣସି ପଦକ୍ଷେପ ଗ୍ରହଣ କରାଯାଇନି। ଫଳରେ ନ୍ୟାୟ ଦାବିରେ ସୋମବାର ଶିଶୁଙ୍କ ଅଭିଭାବକଙ୍କ ସମେତ ଶତାଧିକ ମହିଳା ବାରିପଦାସ୍ଥିତ ମୟୂରଭଞ୍ଜ ଜିଲାପାଳଙ୍କ କାର୍ଯ୍ୟାଳୟକୁ ଧସେଇ ପଶି ସେଠାରେ ହୋହଲ୍ଲା କରିଥିଲେ। ସହକାରୀ ଜିଲାପାଳ ବୁଝାଶୁଝା କରିଥିଲେ ମଧ୍ୟ ସେମାନେ ଜିଦ୍ରେ ଅଟଳ ରହିଥିଲେ। କେତେକ ମହିଳା ଜିଲାପାଳଙ୍କ କାର୍ଯ୍ୟାଳୟ କବାଟର କାଚକୁ ଗୋଇଠା ମାରି ଭାଙ୍ଗି ଦେଇଥିଲେ। ଖବର ପାଇ ଏସ୍ପି ପରମାର ସ୍ମିଥ ପୁରୁଷୋତ୍ତମ ଦାସ ୨ ପ୍ଲାଟୁନ ଫୋର୍ସ ସହ ଘଟଣାସ୍ଥଳରେ ପହଞ୍ଚି ମହିଳାମାନଙ୍କୁ ଦୁଇଟି ବସ୍ରେ ଉଠାଇ ନେଇଥିଲେ। ପରେ ଏହି ଘଟଣାରେ ପୋଲିସ ୮ ଜଣଙ୍କୁ ଗିରଫ କରିଛି। ଗିରଫ ଅଭିଯୁକ୍ତମାନେ ହେଲେ ମଞ୍ଜୁଲତା ସିଂ, ଝିଲି ସିଂ, ବୁଧୁନି ସିଂ, ଶତ୍ରୁଘନ ସିଂ, ଲଛମନ ସିଂ,କହ୍ନେଇ ସିଂ,ଘାସିଆ ସିଂ ଓ କୁନା ସିଂ।
ଉଲ୍ଲେଖଯୋଗ୍ୟ ଯେ, ବାରିପଦା ସଦର ଥାନା ଅନ୍ତର୍ଗତ ଜାମବଣି ଗ୍ରାମର କାର୍ତ୍ତିକ ସିଂଙ୍କ ସ୍ତ୍ରୀ ରଇବାରୀ ଗତ ୨୬ ତାରିଖ ସକାଳେ ପିଆରଏମ୍ ମେଡ଼ିକାଲ୍ରେ ଏକ ଶିଶୁପୁତ୍ର୍ର ଜନ୍ମ ଦେଇଥିଲେ। ଶିଶୁଟି ନ କାନ୍ଦିବାରୁ ମେଡ଼ିକାଲ କର୍ତ୍ତୃପକ୍ଷ ତାକୁ ଏସ୍ଏନସିୟୁରେ ଭର୍ତ୍ତି କରାଇଥିଲେ। ଚିକିତ୍ସା ପରେ ଶିଶୁ ପୁତ୍ରଟି ଭଲ ହେବାରୁ ମେଡ଼ିକାଲ୍ କର୍ତ୍ତୃପକ୍ଷ ଶିଶୁ ଓ ମାଆକୁ ୫ ତାରିଖରେ ଡିସଚାର୍ଜ କରିଥିଲେ। ୧୧ ତାରିଖରେ ମେଡିକାଲକୁ ଡକାଇ ଶିଶୁ ପୁତ୍ରକୁ ବଦଳି କରି ଅନ୍ୟ କାହା ମୃତ ଶିଶୁ ପୁତ୍ର ପ୍ରଦାନ କରାଯାଇଥିବା ଅଭିଯୋଗ ହୋଇଥିଲା।
