ଧର୍ମଶାଳା,୨୦।୮(ଡି.ଏନ୍.ଏ.)- ଧର୍ମଶାଳା ଥାନା ଅଧୀନ ଜାରକା ଜଗନ୍ନାଥ ବିହାର ଅଞ୍ଚଳର ଏକ ଭଡ଼ାଘରେ ଚାଲିଥିବା ସେକ୍ସ ର଼୍ୟାକେଟକୁ ପୋଲିସ ରବିବାର ରାତିରେ ଠାବ କରିଛି। ଏହି ଘଟଣାରେ ଜଣେ ରାଣୀମହୁମାଛି, ୨ ଦଲାଲ ସହ ୩ ଗ୍ରାହକଙ୍କୁ ଗିରଫ କରି ସୋମବାର କୋର୍ଟଚାଲାଣ କରିଛି। ଏଥିସହିତ ଘଟଣାସ୍ଥଳରୁ ପୋଲିସ ଏକ କାର, ସ୍କୁଟି, ବାଇକ ଓ ୭ ମୋବାଇଲ୍ ଫୋନକୁ ଜବତ କରିଛି। ସେହିପରି ର଼୍ୟାକେଟରେ କାମ କରୁଥିବା ଜଣେ ଯୁବତୀଙ୍କୁ ଉଦ୍ଧାର କରାଯାଇ ଶର୍ଟ ଷ୍ଟେ ହୋମ୍କୁ ପଠାଇ ଦିଆଯାଇଛି। ଏହି ଘଟଣା ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି।
ସୂଚନାଯୋଗ୍ୟ, କିଛିଦିନ ହେବା ଏଠାରେ ସେକ୍ସ ର଼୍ୟାକେଟ ଚାଲୁଥିବା ନେଇ ପୋଲିସ ନିକଟରେ ଅଭିଯୋଗ ହୋଇଥିଲା। ଏହାକୁ ନେଇ ପୋଲିସ ରବିବାର ରାତିରେ ଚଢ଼ାଉ କରିଥିଲା। ଏହି ସମୟରେ ୨ଦଲାଲ ବଡ଼ଚଣା ଥାନା ମଙ୍ଗରାଜପୁର ଗ୍ରାମର ରବୀନ୍ଦ୍ର ସାହୁ (୩୦), ଖୋସାଲିପୁର ଗ୍ରାମର ସୋମ୍ୟଶ୍ରୀ ଜେନା(୨୨)ଙ୍କୁ ଗିରଫ କରାଯାଇଥିଲା। ଏହାପରେ ଗ୍ରାହକ ବାଲିଚନ୍ଦ୍ରପୁର ଥାନା ଭାକୁଡ ଗ୍ରାମର ମହେନ୍ଦ୍ର ମଲିକ (୨୫), ଧର୍ମଶଳା ଥାନା ଆରୁହା ଗ୍ରାମର ଲିପୁ ମଲିକ (୨୯) ଓ ବୈରୀ ଥାନା ଅମରାବତୀ ଗ୍ରାମର ବଳରାମ ସେଠୀ(୨୬)ଙ୍କୁ ପୋଲିସ ଗିରଫ କରିଥିଲା। ସେହିପରି ଦେହ ବ୍ୟବସାୟ ପାଇଁ ଆସିଥିବା ଜଣେ ଯୁବତୀଙ୍କୁ ପୋଲିସ ଉଦ୍ଧାର କରିଥିଲା। ଏମାନଙ୍କ ବୟାନକ୍ରମେ ପୋଲିସ ଜେନାପୁର ଥାନା ବିଛାଖଣ୍ଡି ଅଞ୍ଚଳର ରାଣୀମହୁମାଛିଙ୍କୁ ଗିରଫ କରିଥିଲା। ସେକ୍ସ୍ ର଼୍ୟାକେଟ ଚାଲିଥିବା ଘରୁ ପୋଲିସ ବିପୁଳ ପରିମାଣର ଆପତ୍ତିଜନକ ସାମଗ୍ରୀ ଜବତ କରିଥିବା ଥାନା ଅଧିକାରୀ ସରୋଜ ସାହୁ ସୂଚନା ଦେଇଛନ୍ତି।
