ହିନ୍ଦୋଳ,୧୯ା୧୦(ଡି.ଏନ.ଏ): ଗଣପର୍ବ ଲକ୍ଷ୍ମୀପୂଜାକୁ ନେଇ ଉତ୍ସବ ମୁଖର ହୋଇଉଠିଛି ସାରା ଢେଙ୍କାନାଳ ଜିଲା। ପୂରପଲ୍ଲୀଠାରୁ ଆରମ୍ଭ କରି ସାରା ସହରରେ ମନ୍ତ୍ରଧ୍ୱନୀରେ ପ୍ରକମ୍ପିତ ହେଉଛି ମା’ଙ୍କ ମଣ୍ଡପ। ଅନୁକୂଳ ପାଗ ସାଙ୍ଗକୁ ସାରେ ଦର୍ଶକଙ୍କ ଭିଡ଼କୁ ନେଇ ସବୁଠି ସୃଷ୍ଟି ହୋଇଛି ଉତ୍ସବର ମାହୋଲ। ମଣ୍ଡପରେ ନୀତିକାନ୍ତି ଅନୁଯାୟୀ ମା’ଙ୍କ ପୂଜାର୍ଚ୍ଚନା ଚାଲିଥିବାବେଳେ ନାମ ସଂକୀର୍ତ୍ତନ, ସାଂସ୍କୃତିକ କାର୍ଯ୍ୟକ୍ରମ, ମିନାବଜାର, ବନ୍ଧୁବାନ୍ଧବଙ୍କ ଭିଡ଼ରେ କମ୍ପୁଛି ଗ୍ରାମ୍ୟ ପରିବେଶ।
ହିନ୍ଦୋଳ ସଦର ମହକୁମାରେ ଗତ ୧୩ ତାରିଖଠାରୁ ଆରମ୍ଭ ହୋଇଛି ମା’ଲକ୍ଷ୍ମୀଙ୍କ ପୂଜା। ଆଲୋକମାଳାରେ ସାରା ମହକୁମା ଝଲସି ଉଠୁଥିବାବେଳେ ସାରେ ମା’ଙ୍କ ଦର୍ଶନ ପାଇଁ ଶ୍ରଦ୍ଧାଳୁଙ୍କ ଭିଡ଼ ବଢିବାରେ ଲାଗିଛି। ପ୍ରତି ବଜାରରେ ବିଭିନ୍ନ ମନୋହରୀ ଜିନିଷ ସମେତ ଚାର୍ଟ, ଗୁପ୍ଚୁପ୍, ଆଇସକ୍ରିମ, ମଥୁରା କେକ୍, ଦୋଳି ଆଦି ପଡିଥିବାରୁ ଶହ ଶହ ଦର୍ଶକଙ୍କ ଭିଡ଼ ପରିଲକ୍ଷିତ ହେଉଛି। ମହକୁମାରେ ମୋଟ ୧୪ଗୋଟି ପୂଜା ମଣ୍ଡପ ବସଷ୍ଟାଣ୍ଡ ବଜାର, ଲକ୍ଷ୍ମୀବଜାର, ମେଡିକାଲ ଛକ ବଣିକ ସଂଘ, କଳ୍ପନା ବଜାର, ମୀରା ବଜାର, ଗୁଣ୍ଡିଚାମଣ୍ଡପ କାରୀଗର ସାହି, ନୂତନପଟଣା କ,ଖ,ଗ, ବନମାଳୀପୁର, ପୀତାବଳି ମା’ଲକ୍ଷ୍ମୀପୂଜା କମିଟି, ରାଧାନାଥପୁର, ଗୋପାଳପୁର, ଚମ୍ପତିସାହି ପୂଜା କମିଟି ପକ୍ଷରୁ ଧୁମ୍ଧାମ୍ରେ ପୂଜା ପାଳିତ ହୋଇଛି। ଆସନ୍ତା ୨୨ରେ ଭସାଣି ଉତ୍ସବ ଅନୁଷ୍ଠିତ ହେବ। ଏଥିପାଇଁ ସ୍ଥାନୀୟ ପ୍ରଶାସନ ଏବଂ ପୋଲିସ ପ୍ରଶାସନ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା କରାଯାଇଛି।
