ଯୋଡା, ୨୯ା୫(ଡି.ଏନ୍.ଏ.)-କେନ୍ଦୁଝର ଜିଲା ଯୋଡ଼ା ବ୍ଲକ ବିଡିଓ ଛତୁଆ ବିଲ୍ ପାସ୍ କରିବା ଆଳରେ ମହିଳାଙ୍କୁ ଅସଦାଚରଣ କରିଥିବା ନେଇ ଶୁକ୍ରବାର ଯୋଡ଼ା ଥାନାରେ ଲିଖିତ ଅଭିଯୋଗ ହୋଇଛି। ଏହି ବ୍ଲକରେ ବିଭିନ୍ନ ଅଙ୍ଗନଓ୍ବାଡ଼ି କେନ୍ଦ୍ରକୁ ଛତୁଆ ଯୋଗାଣ କରୁଥିବା ଗାୟତ୍ରୀ ମିଶନ ଶକ୍ତି ମହାସଂଘର ୧୫ରୁ ଊର୍ଦ୍ଧ୍ୱ ମହିଳା ନ୍ୟାୟ ପାଇଁ ଥାନାର ଦ୍ୱାରସ୍ଥ ହୋଇଛନ୍ତି।
ଅଭିଯୋଗ ଅନୁଯାୟୀ, ଗାୟତ୍ରୀ ମିଶନ ଶକ୍ତି ଯୋଡ଼ା ବ୍ଲକର ଆଇସିଡିଏସ ଅଧୀନରେ ଥିବା ୨୮୧ଟି ଅଙ୍ଗନଓ୍ବାଡି କେନ୍ଦ୍ରକୁ ଦୀର୍ଘ ୮ ବର୍ଷ ହେବ ଛତୁଆ ଯୋଗାଣ କରୁଛି। ଯୋଡ଼ା ବିଡିଓ ଯେଉଁଦିନଠାରୁ ସିଡିପିଓ ଦାୟିତ୍ୱରେ ରହିଲେଣି ସେହିଦିନଠାରୁ ସେ ଗାୟତ୍ରୀ ମିଶନ ଶକ୍ତିର ସଭ୍ୟାମାନଙ୍କୁ ଛତୁଆ ବିଲ୍ ପାସ୍ କରିବା ଆଳରେ ଅନେକ ସମୟରେ ହଇରାଣ କରୁଛନ୍ତି। ସେମାନଙ୍କର ବିଲ୍କୁ ମିଶନ ଶକ୍ତିର ଆକାଉଣ୍ଟରେ ନ ପଠାଇ ଭୁଲ୍ ଆକାଉଣ୍ଟରେ ୫୦ ପ୍ରତିଶତ ଅର୍ଥ ପଠାଇଛନ୍ତିି। ଅନ୍ୟପକ୍ଷରେ ବିଲ୍ ପାସ୍ କରାଇ ଦେବା ଆଳରେ ଗାୟତ୍ରୀ ମିଶନ ଶକ୍ତିର ମହିଳାମାନଙ୍କୁ ସନ୍ଧ୍ୟାରେ ଏକୁଟିଆ ଆସିବା ପାଇଁ କହିବା ସହିତ ସେମାନଙ୍କୁ ଅସଦାଚରଣ କରିଥିବା ଅଭିଯୋଗରେ ଦର୍ଶାଯାଇଛି। ଗାୟତ୍ରୀ ମିଶନ ଶକ୍ତିର ସଭାପତି ହେମବତୀ ବାରିକ ଓ ସମ୍ପାଦିକା ପଙ୍କଜିନୀ ବାରିକଙ୍କ ସମେତ ୧୫ରୁ ଊର୍ଦ୍ଧ୍ୱ ସଭ୍ୟା ଏକତ୍ରିତ ହୋଇ ନ୍ୟାୟ ପାଇଁ ଯୋଡ଼ା ଥାନାର ଦ୍ୱାରସ୍ଥ ହୋଇଥିଲେ। ଏସମ୍ପର୍କରେ ବିଡିଓ ଯୋଗେଶ୍ୱର ନାଏକଙ୍କୁ ପଚାରିବାରୁ ତାଙ୍କ ବିରୋଧରେ ହୋଇଥିତ୍ବା ଅଭିଯୋଗ ସମ୍ପୂର୍ଣ୍ଣ ମିଥ୍ୟା ବୋଲି କହିଛନ୍ତି। ସମ୍ପୃକ୍ତ ମିଶନ ଶକ୍ତି ମହାସଂଘ ଦ୍ୱାରା ଛତୁଆ ବଣ୍ଟନରେ ଅନିୟମିତତା ହୋଇଥିତ୍ବା ନେଇ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲି। ତେଣୁ ସେମାନେ ମୋ ବିରୋଧରେ ଏଭଳି ଅଭିଯୋଗ କରିଛନ୍ତି ବୋଲି ବିଡିଓ ପ୍ରକାଶ କରିଛନ୍ତି। ଯୋଡା ଥାନାରେ ଉପସ୍ଥିତ ଥିବା ବଡବିଲ ଏସ୍ଡିପିଓ ସତ୍ୟ ବିକାଶ ଭୂୟାଁ ଏବଂ ଥାନା ଅଧିକାରୀ ରାଇସେନ୍ ମୁର୍ମୁଙ୍କୁ ପଚାରିବାରୁ ମହିଳାମାନଙ୍କ ସହ ଆଲୋଚନା ପରେ ସତ୍ୟାସତ୍ୟ ଜଣାପଡ଼ିବ ବୋଲି କହିଛନ୍ତି। ତେବେ ନ୍ୟାୟ ନ ମିଳିଲେ ଆନ୍ଦୋଳନ କରାଯିବ ବୋଲି ଗାୟତ୍ରୀ ମିଶନ ଶକ୍ତିର ସଭାପତି କହିଛନ୍ତି।
