ସରଣ୍ଡା,୨୯ା୪(ଡି.ଏନ୍.ଏ.): କରୋନା ସଂକ୍ରମଣ ନେଇ ଦେଶରେ ଲକ୍ଡାଉନ୍ ଘୋଷଣା କରାଯାଇଛି। ଫଳରେ ବିଭିନ୍ନ ସ୍ଥାନରେ ଶ୍ରମିକମାନେ ଫସି ରହିଛନ୍ତି। ରାଜ୍ୟ ସରକାର ଶ୍ରମିକଙ୍କ ଫେରିବା ନେଇ ବ୍ୟବସ୍ଥା କରିଥିବା ବେଳେ ବରଗଡ଼ ଜିଲା ଅତାବିରା ବ୍ଲକ ଅନ୍ତର୍ଗତ ସରଣ୍ଡାସ୍ଥିତ କଟାପାଳିକୁ ଆନ୍ଧ୍ରପ୍ରଦେଶରୁ ଧାନକଟା ମେଶିନ ଧରି ମଙ୍ଗଳବାର ୬ଜଣ ଶ୍ରମିକ ଫେରିଥିଲେ। ଏହା ଦେଖି ଗ୍ରାମବାସୀ ଆତଙ୍କିତ ହେବା ସହ ଗାଁରେ ପୂରାଇ ଦେଇ ନ ଥିଲେ। ଫଳରେ ମଙ୍ଗଳବାରଠାରୁ ବୁଧବାର ସକାଳ ପର୍ଯ୍ୟନ୍ତ ଏହି ଶ୍ରମିକମାନେ ରାସ୍ତାପାର୍ଶ୍ୱରେ ରହିଥିଲେ। ଏନେଇ ସରଣ୍ଡା, ଚକୁଳି, ତାଳପତ୍ରଟିକ୍ରାର ଗ୍ରାମବାସୀ ଆଲୋଚନା କରି ସରପଞ୍ଚ ସୁଲତା ପ୍ରଧାନଙ୍କୁ ଖବର ଦେଇଥିଲେ। ସରପଞ୍ଚଙ୍କ ପ୍ରତିନିଧି ଭାବେ କୈଳାସ ପ୍ରଧାନ ପହଞ୍ଚି ସେମାନଙ୍କ ରହିବା ବ୍ୟବସ୍ଥା କରିଥିଲେ। ଯୁଦ୍ଧାକାଳୀନ ଭିତ୍ତିରେ ତାଳପତ୍ରଟିକ୍ରା କଲ୍ୟାଣ ମଣ୍ଡପକୁ ଅସ୍ଥାୟୀ ହୋମ୍ କ୍ୱାରାଣ୍ଟାଇନ୍ ସେଣ୍ଟରେ ପରିଣତ କରାଯାଇ ବୁଧବାର ସକାଳେ ଏହି ଶ୍ରମିକମାନଙ୍କୁ ରଖାଯାଇଛି। ତେବେ ଏମାନଙ୍କ ସଂସ୍ପର୍ଶରେ ସରଣ୍ଡା ଗ୍ରାମର ଦୁଇ ଜଣ ଯୁବକ ଆସିଥିବା ବେଳେ ସେମାନଙ୍କୁ ବି କ୍ୱାରାଣ୍ଟାଇନ୍ରେ ରଖିବାକୁ ଗ୍ରାମବାସୀ ଅତାବିରା ତହସିଲଦାର ଓ ବିଡିଓଙ୍କ ଠାରେ ଗୁହାରି କରିଛନ୍ତି। ଏନେଇ ତହସିଲଦାର ହୃଦାନନ୍ଦ ଅଡାଙ୍କୁ ଯୋଗାଯୋଗ କରିଥିଲେ ମଧ୍ୟ ସେ ଫୋନ୍ ରିସିଭ୍ କରି ନ ଥିଲେ। ଅତାବିରା ବିଡିଓ ପ୍ରଣବ ଚାନ୍ଦ କହିଛନ୍ତି, ଶ୍ରମିକମାନଙ୍କ ପାଇଁ କିପରି ସାହାଯ୍ୟ କରିହେବ ସେନେଇ ସରପଞ୍ଚଙ୍କ ସହ କଥା ହୋଇ ବ୍ୟବସ୍ଥା କରାଯିବ ଏବଂ ଶ୍ରମିକଙ୍କ ସଂସ୍ପର୍ଶ୍ୱରେ ଆସିଥିବା ଯୁବକଙ୍କୁ ଟ୍ରେସ କରାଯାଇ ହୋମ୍ କ୍ୱାରାଣ୍ଟାଇନ୍ରେ ରହିବାକୁ ପରାମର୍ଶ ଦିଆଯିବ।
