ବ୍ରହ୍ମପୁର ଅଫିସ, ୭ା୩-ପ୍ରଥମ ଶ୍ରେଣୀ ବିଚାର ବିଭାଗୀୟ ମାଜିଷ୍ଟ୍ରେଟ (ଜେଏମଏଫସି) ଯୁଧିଷ୍ଠିର ଦଳେଇ ଶୁକ୍ରବାର ଏକ ଚେକ୍ ବାଉନ୍ସ ମାମଲାର ବିଚାର କରି ଅଭିଯୁକ୍ତ ବ୍ରହ୍ମପୁର ବିଶ୍ୱବିଦ୍ୟାଳୟର ତତ୍କାଳୀନ ସେକ୍ସନ ଅଫିସର ଶେଷଦେବ ସାହୁଙ୍କୁ ୨ ବର୍ଷ ଜେଲଦଣ୍ଡରେ ଦଣ୍ଡିତ କରିଛନ୍ତି । ଏଥିସହ ଆବେଦନକାରୀଙ୍କ ୧୦ ଲକ୍ଷ ଟଙ୍କା ଶେଷଦେବ ଫେରସ୍ତ କରିବେ ବୋଲି ରାୟରେ ଉଲ୍ଲେଖ କରିଛନ୍ତି । ଉକ୍ତ ଟଙ୍କା ଫେରସ୍ତ ନ କଲେ ଅଧିକ ୬ ମାସ ଜେଲଦଣ୍ଡ ଭୋଗିବେ ବୋଲି ରାୟ ପ୍ରକାଶ ପାଇଛି।
ଗୋଷାଣୀ ନୂଆଗାଁ ଅଞ୍ଚଳରେ ରହୁଥିବା ଶେଷଦେବଙ୍କର ବୈଦ୍ୟନାଥପୁର ଥାନା ଅନ୍ତର୍ଗତ ଅନନ୍ତନଗର ଦ୍ୱିତୀୟ ସାରଣୀରେ ରହୁଥିବା କୁନି ପଣ୍ଡାଙ୍କ ସହ ପାରିବାରିକ ସମ୍ପର୍କ ଥିଲା ା ଶେଷଦେବ ଏକ ଘର କିଣିବା ପାଇଁ କୁନିଙ୍କ ଠାରୁ ୧୦ ଲକ୍ଷ ଟଙ୍କା ଧାର ନେଇଥିଲେ ା ଚୁକ୍ତି ମୁତାବକ ଶେଷଦେବ ଉକ୍ତ ଟଙ୍କା ଫେରସ୍ତ କରିନଥିଲେ ା ଶେଷରେ ସେ ୩ ଲକ୍ଷ ଲେଖାଏ ଦୁଇଟି ଓ ଗୋଟିଏ ୪ ଲକ୍ଷ ଟଙ୍କାର ଚେକ କୁନିଙ୍କୁ ଦେଇଥିଲେ। ୨୦୧୭ ମାର୍ଚ୍ଚ ୧୫ରେ କୁନି ଉକ୍ତ ଚେକଗୁଡ଼ିକୁ କୋର୍ଟପେଟାସ୍ଥିତ ଆନ୍ଧ୍ର ବ୍ୟାଙ୍କରେ ଜମା କରିବା ବେଳେ ତାହା ବାଉନ୍ସ ହୋଇଯାଇଥିଲା ା ପରେ ସେ ଓକିଲ ନୋଟିସ ପଠାଇଥିଲେ ା ୨୦୧୭ ଜୁଲାଇ ୧୪ରେ କୋର୍ଟରେ ୨୭୪/୧୭ ଏକ ୱାନସିସି ମାମଲା ଦାୟର କରିଥିଲେ ା ଏହି ମାମଲାର ଶୁଣାଣି ବେଳେ ୨ ସାକ୍ଷୀଙ୍କ ବୟାନକୁ ଆଧାର କରି ଉପଯୁକ୍ତ ପ୍ରମାଣ ମିଳିଥିବାରୁ ଜେଏମଏଫସି ଉପରୋକ୍ତ ରାୟ ଶୁଣାଇଛନ୍ତି ା ଆବେଦନକାରୀଙ୍କ ପକ୍ଷରୁ ଫକୀର ମୋହନ ପଟ୍ଟନାୟକ ଓ ମୁଦାଲାଙ୍କ ପକ୍ଷରୁ ରାଜକିଶୋର ପଲାଇ ମାମଲା ପରିଚାଳନା କରିଥିଲେ ା
