କୋଲକାତା,୭।୬: ପଶ୍ଚିମବଙ୍ଗରେ ତ୍ରୁଣ ମୂଳ କଂଗ୍ରେସ ଓ ଭାଜପା ମଧ୍ୟରେ ତୁତୁ ମେମେ ଲାଗି ରହିଛି। ଏବେ ଏହା ଏମିତି ସ୍ଥିତିରେ ପହଞ୍ଚିଛି ଯେ କିଛି ଦିନ ହେବ ଉଭୟ ଦଳ ପୋଷ୍ଟକାର୍ଡ ଓ୍ବାର ଆରମ୍ଭ କରି ସାରିଛନ୍ତି। ଏବେ ଦକ୍ଷିଣ କୋଲକାତାରେ ଥିବା କାଳିଘାଟ ପୋଷ୍ଟ ଅଫିସରେ ଭାଜପା ଦ୍ୱାରା ପଠାଯାଇଥିବା ହଜାର ହଜାର ସଂଖ୍ୟାରେ ‘ଜୟ ଶ୍ରୀରାମ’ ଲେଖାଥିବା ପୋଷ୍ଟ କାର୍ଡ ପହଞ୍ଚୁଛି। ଯାହା ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଠିକଣାରେ ଆସୁଛି। ଏବେ ପୋଷ୍ଟ ଅଫିସର କର୍ମଚାରୀଙ୍କ ପାଇଁ ଏହି ପୋଷ୍ଟକାର୍ଡ ମୁଣ୍ଡ ବ୍ୟଥାର କାରଣ ପାଲଟିଛି। ପୋଷ୍ଟ ମାଷ୍ଟରଙ୍କ କହିବା କଥା ହେଲା ମମତା ବାନାର୍ଜୀ ଯେବେଠାରୁ ମୁଖ୍ୟମନ୍ତ୍ରୀ ହେଲେଣି ସେବେଠାରୁ ପ୍ରାୟ ପ୍ରତିଦିନ ଏଠାକୁ ୩୦ରୁ ୪୦ ପୋଷ୍ଟକାର୍ଡ ଓ ରେଜିଷ୍ଟର ଲେଟର ଆସିଥାଏ। ସେଥିପାଇଁ ଜଣେ ଡାକ କର୍ମଚାରୀଙ୍କୁ ସ୍ବତନ୍ତ୍ର ଭାବେ ମମତାଙ୍କ ଘରେ ଚିଠି ଗୁଡିକ ପହଞ୍ଚାଇବା ଦାୟିତ୍ୱ ଦିଆଯାଇଛି। ଆଉ ସେହି କର୍ମଚାରୀ ଜଣକ ସେଠାରେ ଜଣେ ନିର୍ଦ୍ଦିଷ୍ଟ ବ୍ୟକ୍ତିଙ୍କୁ ସେ ସବୁ ପତ୍ର ହସ୍ତାନ୍ତର କରିଥାଆନ୍ତି। ହେଲେ ଏବେ ମମତାଙ୍କ ଠିକଣାରେ ଏତେ ପରିମାଣରେ ‘ଜୟ ଶ୍ରୀରାମ’ ଲେଖାଥିବା ପୋଷ୍ଟକାର୍ଡ ଆସୁଛି ଯେ ଡାକଘରକୁ ଆସୁଥିବା ସମସ୍ତ ଚିଠିଠାରୁ ଏହା ଦଶଗୁଣା ଅଧିକ। ତେଣୁ ଏହା ଆମ ପାଇଁ ସମସ୍ୟା ସୃଷ୍ଟି କରୁଛି ବୋଲି ପୋଷ୍ଟ ମାଷ୍ଟର କହିଛନ୍ତି।
