ନୂଆଦିଲ୍ଲୀ,୧୬-୭: କେନ୍ଦ୍ର ସରକାର ଖୁବଶୀଘ୍ର ପିଏମ୍ କିଷାନ ଫସଲ ବୀମା ଯୋଜନାରେ ଏକାଧିକ ପରିବର୍ତ୍ତନ କରିବାକୁ ଯାଉଛନ୍ତି। ଏହି ଯୋଜନାରେ ସାମିଲ ହେବା ଏଣିକି ଚାଷୀଙ୍କ ଲାଗି ସ୍ବେଚ୍ଛାକୃତ ହେବ। ଏହି ଯୋଜନାରୁ ଉଚ୍ଚ ପ୍ରିମିୟମଯୁକ୍ତ ଫସଲଗୁଡ଼ିକୁ ବାଦ୍ ଦିଆଯିବ ବୋଲି ଜଣେ ବରିଷ୍ଠ ଅଧିକାରୀ ସୋମବାର କହିଛନ୍ତି। ତାଙ୍କର କହିବାନୁଯାୟୀ, ଜଳସେଚନ ଅଞ୍ଚଳ ଅନୁଯାୟୀ ଫସଲର ପ୍ରିମିୟମ ନିର୍ଦ୍ଧାରିତ ହେବ। ଜଳସେଚନ କ୍ଷେତ୍ରର ୫୦ ପ୍ରତିଶତରୁ ଅଧିକ ସ୍ଥାନରେ ଫସଲ ହେଉଥିଲେ ୨୫% ଏବଂ ୫୦%ରୁ କମ୍ ହେଲେ ପ୍ରିମିୟମ ସିଲିଂ ୩୦% ହେବ। ବର୍ତ୍ତମାନର ପ୍ରିମିୟମ ଦର ହିସାବରେ ଖରିଫ ଫସଲ ଉପରେ ୨%, ରବି ଫସଲ ଉପରେ ୧.୫%, ଔଦ୍ୟୋଗିକ ଏବଂ ବାଣିଜ୍ୟ ଫସଲ ଉପରେ ୫% ପ୍ରିମିୟମ ରାଶି ଚାଷୀ ଦେଉଛନ୍ତି। ପ୍ରତ୍ୟେକ ପ୍ରିମିୟମ ଉପରେ ଚାଷୀଙ୍କୁ ଫସଲ ବୁଣା ପୂର୍ବରୁ ଏବଂ ପରବର୍ତ୍ତୀ ଅବଧି ଲାଗି ବ୍ୟାପକ ବୀମା ଉପଲବ୍ଧ କରାଯାଉଛି। ୨୦୧୬ରୁ ଆରମ୍ଭ ହୋଇଥିବା ଏହି ଯୋଜନାରେ ସରକାରଙ୍କ ନିକଟକୁ ୨୦୧୭ ସେପ୍ଟେମ୍ବର ସୁଦ୍ଧା ୨ ହଜାର କୋଟି ଟଙ୍କାର ପ୍ରିମିୟମ ଆସିଛି। ଏହି ସମୟରେ ସରକାର ୮ ହଜାର କୋଟି ଟଙ୍କାର ବୀମା ଦାବି ପ୍ରଦାନ କରିଛନ୍ତି। ବର୍ତ୍ତମାନ ଫସଲ ବୀମାର ଲାଭ ଦେଶର ୩୦% ଫସଲ ଉତ୍ପାଦନ ହେଉଥିବା ଅଞ୍ଚଳରେ ମିଳୁଛି।
