ନୂଆଦିଲ୍ଲୀ, ୨୦।୬- ଭାରତ ଓ ଚାଇନା ସୈନ୍ୟଙ୍କ ମଧ୍ୟରେ ନିକଟରେ ପୂର୍ବ ଲଦାଖର ଗାଲ୍ଓ୍ବାନ ଉପତ୍ୟକା ନିକଟରେ ଘଟିଥିବା ରକ୍ତାକ୍ତ ସଂଘର୍ଷ ପରେ ୨୦ ଭାରତୀୟ ଯବାନ ଶହୀଦ୍ ହୋଇଥିଲେ। ସେହିଭଳି ୪୦ରୁ ଊର୍ଦ୍ଧ୍ୱ ଚାଇନା ସୈନ୍ୟ ନିହତ ହୋଇଥିବା ରିପୋର୍ଟ ପ୍ରକାଶ ପାଇଥିଲା। ଏହି ଘଟଣା ପରେ ସାରା ଭାରତରେ ଚାଇନା ସାମଗ୍ରୀ ବର୍ଜନ କରିବାକୁ ଚାରିଆଡ଼ୁ ସ୍ବର ଉତ୍ତୋଳନ ହୋଇଛି। ଦୁଇ ଦେଶ ମଧ୍ୟରେ ସୀମା ବିବାଦ ଉତ୍ତେଜନାମୂଳକ ପରିସ୍ଥିତିରେ ରହିଥିବାବେଳେ ପୂର୍ବତନ ଭାରତୀୟ କ୍ରିକେଟର୍ ହରଭଜନ ସିଂ ଚାଇନା ସାମଗ୍ରୀ ବର୍ଜନ କରିବାକୁ ସମର୍ଥନ କରିଛନ୍ତି। ଭାରତରେ ଚାଇନା ସାମଗ୍ରୀ ବିକ୍ରି ଉପରେ ପ୍ରତିବନ୍ଧକ ଲଗାଇବା ନେଇ ସରକାରୀସ୍ତରରେ ବିଚାର ଚାଲିଥିବାବେଳେ ହରଭଜନଙ୍କ ଏଭଳି ନିଷ୍ପତ୍ତି ଯୋଗୁ ତାଙ୍କୁ ଚାରିଆଡ଼ୁ ପ୍ରଶଂସା କରାଯାଇଛି। ‘ସମସ୍ତ ଚାଇନା ସାମଗ୍ରୀ ବ୍ୟାନ କର’ ବୋଲି ୩୯ ବର୍ଷୀୟ ହରଭଜନ ନିଜ ଟୁଇଟର୍ ପୃଷ୍ଠାରେ ଉଲ୍ଲେଖ କରିଛନ୍ତି। ଦି କନ୍ଫେଡେରେଶନ ଅଫ୍ ଅଲ୍ଇଣ୍ଡିଆ ଟ୍ରେଡ୍ସ (ସିଏଆଇଟି) ମଧ୍ୟ ହରଭଜନଙ୍କୁ ପ୍ରଶଂସା କରିଛି। ଦେଶରେ ଚାଇନା ସାମଗ୍ରୀ ଉପରେ ପ୍ରତିବନ୍ଧକ ଲଗାଇବାକୁ ସମର୍ଥନ ଜଣାଇବାରେ ହରଭଜନ ପ୍ରଥମ ସେଲିବ୍ରିଟି ବୋଲି ସିଏଆଇଟି ସାଧାରଣ ସମ୍ପାଦକ ପ୍ରବୀଣ ଖଣ୍ଡଓ୍ବାଲେ କହିଛନ୍ତି। ଲଦାଖରେ ଭାରତୀୟ ଯବାନ ଶହୀଦ ହେବାପରେ ଏକ ସାକ୍ଷାତ୍କାରରେ ହରଭଜନ କହିଥିଲେ, ଭାରତୀୟ ସୈନ୍ୟଙ୍କୁ ଆକ୍ରମଣ କରୁଥିବା ଦେଶ ଭାରତୀୟ ଟଙ୍କାରେ ଚାଲିବା ଉଚିତ୍ ନୁହେଁ। ତେଣୁ ଚାଇନା ସାମଗ୍ରୀ ଉପରେ ପ୍ରତିବନ୍ଧକ ଲଗାଯାଉ।
