ନୂଆଦିଲ୍ଲୀ, ୧୬ା୫: ମହାମାରୀ କରୋନା ଭୂତାଣୁ ବିଶ୍ୱର ୨୧୩ ଦେଶକୁ ନାକେଦମ୍ କରି ରଖିଥିବା ବେଳେ ଭାରତର ସ୍ଥିତି କ୍ରମଶଃ ଜଟିଳ ହେବାରେ ଲାଗିଛି। ସର୍ବାଧିକ ଭୂତାଣୁ ଆକ୍ରାନ୍ତ ଦେଶ ତାଲିକାର ଏକାଦଶ ସ୍ଥାନକୁ ଭାରତ ଉନ୍ନୀତ ହୋଇଥିବା ବେଳେ ଚାଇନାକୁ ପଛରେ ପକାଇଛି। କରୋନା ଭୂତାଣୁର ଉତ୍ପତ୍ତିସ୍ଥଳ କୁହାଯାଉଥିବା ଚାଇନାରେ ଆକ୍ରାନ୍ତଙ୍କ ସଂଖ୍ୟା ୮୨, ୯୩୩ ଥିବାବେଳେ ଭାରତ ଏହି ସଂଖ୍ୟା ଅତିକ୍ରମ କରିଛି। ଭାରତରେ ସଂକ୍ରମିତଙ୍କ ସଂଖ୍ୟା ବଢ଼ି ଏବେ ୮୩,୫୮୪ରେ ପହଞ୍ଚିଛି। ଏଥିସହିତ ଦେଶରେ ୨,୬୭୨ ବ୍ୟକ୍ତି ଭୂତାଣୁ ପ୍ରକୋପରେ ପ୍ରାଣ ହରାଇଲେଣି। ଚାଇନା ସ୍ଥିତିରେ ସୁଧାର ଆସିଥିବା ବେଳେ ଶୁକ୍ରବାର ମାତ୍ର ୪ ନୂଆ ମାମଲା ସାମ୍ନାକୁ ଆସିଛି। କିନ୍ତୁ ଭାରତରେ ଗତ ୨୪ ଘଣ୍ଟା ମଧ୍ୟରେ ୧,୫୩୬ ନୂଆ ମାମଲା ନଜରକୁ ଆସିଛି। ଯଦିଓ ଚାଇନାରେ ମୃତ୍ୟୁସଂଖ୍ୟା ୪,୬୩୩କୁ ବଢ଼ିଛି, ତେବେ ଏବକାର ସ୍ଥିତି ନିୟନ୍ତ୍ରଣକୁ ଆସିପାରିଛି। ଅନ୍ୟପକ୍ଷରେ ଭାରତରେ ଏବେ ହୁ ହୁ ହୋଇ ଆକ୍ରାନ୍ତଙ୍କ ସଂଖ୍ୟା ବଢ଼ିବାରେ ଲାଗିଛି। ଏବେ ସୁଦ୍ଧା ୫୧, ୯୭୧ ଆକ୍ଟଭ୍ ମାମଲା ରହିଛି। ୨୮,୯୩୭ ଆକ୍ରାନ୍ତ ସୁସ୍ଥହୋଇ ଘରକୁ ଫେରିଥିଲେ ହେଁ ମହାରାଷ୍ଟ୍ର, ତାମିଲନାଡ଼ୁ, ଗୁଜରାଟ, ଦିଲ୍ଲୀ ଭଳି କେତେକ ରାଜ୍ୟରେ ଦେଖାଦେଇଥିବା ଉଗ୍ର ସଂକ୍ରମଣ ପରିସ୍ଥିତିକୁ ଗୋଳମାଳିଆ କରିପକାଇଛି।
କେବଳ ମହାରାଷ୍ଟ୍ରରେ ଆକ୍ରାନ୍ତଙ୍କ ସଂଖ୍ୟା ଏବେ ୨୭,୫୨୪ରୁ ଅଧିକ ରହିଛି। ଏହି ରାଜ୍ୟରେ ସର୍ବାଧିକ ସଂକ୍ରମିତ ଥିବାବେଳେ ପ୍ରାଣ ହରାଇଲେଣି ୧,୦୧୯ ବ୍ୟକ୍ତି। ଦ୍ୱିତୀୟ ସ୍ଥାନରେ ରହିଛି ତାମିଲନାଡ଼ୁ। ଏଠାରେ କରୋନା ରୋଗୀସଂଖ୍ୟା ୧୦,୧୦୮କୁ ବୃଦ୍ଧିପାଇଛି। ଗତ ୨୪ ଘଣ୍ଟା ମଧ୍ୟରେ ଏଠାରେ ୪୩୪ ନୂଆ ମାମଲା ଦେଖିବାକୁ ମିଳିଛି। ୬୬ ଜଣ ରାଜ୍ୟରେ ଭୂତାଣୁ ଯୋଗୁ ପ୍ରାଣ ହରାଇଥିବା ଜଣାପଡ଼ିଛି। ଗୁଜରାଟ ଓ ଦିଲ୍ଲୀ ସ୍ଥିତି ମଧ୍ୟ ଜଟିଳ ରହିଛି। ଗୁଜରାଟରେ ୯,୫୯୨ ଜଣ ସଂକ୍ରମିତ ହୋଇଥିବା ବେଳେ ରାଜଧାନୀ ଦିଲ୍ଲୀରେ ଏହି ସଂଖ୍ୟା ୮,୮୯୫କୁ ବୃଦ୍ଧିପାଇଛି। ଦୁଇରାଜ୍ୟରେ ଯଥାକ୍ରମେ ୫୮୬ ଓ ୧୨୩ ବ୍ୟକ୍ତି ପ୍ରାଣ ହରାଇଛନ୍ତି। ମଧ୍ୟପ୍ରଦେଶରେ ୨୩୯ ଜଣ ପ୍ରାଣ ହରାଇଥିବା ବେଳେ ସଂକ୍ରମିତଙ୍କ ସଂଖ୍ୟା ବଢ଼ି ୪,୫୯୫ରେ ପହଞ୍ଚିଛି। ସେହିଭଳି ରାଜସ୍ଥାନରେ ୪,୬୮୮, ଉତ୍ତରପ୍ରଦେଶରେ ୩,୯୦୨, ପଶ୍ଚିମବଙ୍ଗରେ ୨,୪୬୧, ଆନ୍ଧ୍ରପଦେଶରେ ୨,୩୦୭ ସଂକ୍ରମିତ ଥିବା ପ୍ରକାଶ। ଏହିସବୁ ରାଜ୍ୟରେ ପ୍ରାଣ ହରାଇଥିବା ବ୍ୟକ୍ତିଙ୍କ ସଂଖ୍ୟା ଯଥାକ୍ରମେ ୧୨୫, ୮୮, ୨୨୫ ଓ ୪୮ ରହିଛି। ତେଲଙ୍ଗାନାରେ ୩୪, ପଞ୍ଜାବରେ ୩୨, କର୍ନାଟକରେ ୩୬ ଜଣ ପ୍ରାଣ ହରାଇଛନ୍ତି। ପରିସ୍ଥିତି ଦିନକୁ ଦିନ ବିଗିଡ଼ିବାରେ ଲାଗିଛି। ଭାରତ ଭଳି ଜନସଂଖ୍ୟା ଘନତ୍ୱ ଦେଶରେ ଏଭଳି ସଂକ୍ରମଣ ଆଗକୁ ଜଟିଳ ପରିସ୍ଥିତି ସୃଷ୍ଟିକରିବ ବୋଲି ଆଶଙ୍କା ପ୍ରକାଶ ପାଇଛି। ଲକ୍ଡାଉନ ସତ୍ତ୍ୱେ ପ୍ରବାସୀଙ୍କ ଆଗମନ ଚିନ୍ତା ବଢ଼ାଇଦେଇଛି। ଯେତେ ସଚେତନ କଲେ ମଧ୍ୟ କରୋନା ସ୍ଥିତିରେ ସୁଧାର ଆସିପାରୁନି। ଯଦିଓ ଆମେରିକା ଓ ୟୁରୋପ ଭଳି ସ୍ଥିତି ଦେଶରେ ସୃଷ୍ଟିହୋଇନି, ତଥାପି ଉଗ୍ର ସଂକ୍ରମଣ ଯୋଗୁ ଗୋଷ୍ଠୀ ପ୍ରଭାବିତ ହେବା ଆଶଙ୍କା ଦେଖାଦେଇଛି। ଏଥିଲାଗି ସାମାଜିକ ଦୂରତ୍ୱ ରକ୍ଷା ସହ ମାସ୍କ ପିନ୍ଧିବା ଲାଗି ସରକାର ପରାମର୍ଶ ଦେଇଛନ୍ତି।
