ମୁମ୍ବାଇ,୨୮।୬(ପି.ଟି.)- ଚଳିତ ବିଶ୍ୱକପ୍ରେ ଆଗକୁ ଭାରତର ଦୁଇ ରିଷ୍ଟ ସ୍ପିନର କୁଲଦୀପ ଯାଦବ ଓ ୟୁଜବେନ୍ଦ୍ର ଚହଲ ଆହୁରି ଭଲ ପ୍ରଦର୍ଶନ କରି ପ୍ରଭାବୀ ସାବ୍ୟସ୍ତ ହେବେ ବୋଲି ପୂର୍ବତନ ଅଷ୍ଟ୍ରେଲିଆ ବ୍ୟାଟ୍ସମ୍ୟାନ ମାଇକେଲ ହସି କହିଛନ୍ତି। ଆଗକୁ ପିଚ୍ଗ୍ୁଡିକ ଆହୁରି ଶୁଖିଲା ହେବ। ଫଳରେ ଭାରତ ଫାଇଦାରେ ରହିବ ବୋଲି ସେ ପୂର୍ବାନୁମାନ କରିଛନ୍ତି। ୪ଟି ମ୍ୟାଚ୍ରୁ ଚହଲ ୮ଟି ଉଇକେଟ ହାସଲ କରିଛନ୍ତି। ଅନ୍ୟପଟେ କୁଲଦୀପ ସଂଘର୍ଷ କରୁଥିବାର ଦେଖାଯାଇଛି। ତେବେ ସେ ଏପର୍ଯ୍ୟନ୍ତ ୩ଟି ଉଇକେଟ ହାସଲ କରିଛନ୍ତି। ଟୁର୍ନାମେଣ୍ଟ ଆଗକୁ ବଢିବା ସହିତ ବହୁତ ପରିବର୍ତ୍ତନ ଦେଖିବାକୁ ମିଳିବ। ଭାରତୀୟ ଦଳ ଏକ ସନ୍ତୁଳିତ ଦଳ। ଟୁର୍ନମେଣ୍ଟ ପରବର୍ତ୍ତୀ ପର୍ଯ୍ୟାୟରେ ପିଚ୍ଗୁଡିକ ଅଧିକରୁ ଅଧିକ ବ୍ୟବହୃତ ହେବ ଓ ଶୁଖିଲା ମଧ୍ୟ ହେବ। ଯାହା ଫଳରେ ସ୍ପିନରମାନେ ଫାଇଦା ହାସଲ କରିପାରିବେ ବୋଲି ଏକ ସାକ୍ଷାତକାର ଦେବା ଅବସରରେ ସେ କହିଛନ୍ତି।
ଅନ୍ୟଦଳଗୁଡିକ ତୁଳନାରେ ଭାରତକୁ ଅପେକ୍ଷାକୃତ ଅଧିକ ଫାଇଦା ମିଳିବ। ଭାରତ ପାଖରେ ଦୁଇଜଣ ବିଶ୍ୱସ୍ତରୀୟ କ୍ୱାଲିଟି ରିଷ୍ଟ ସ୍ପିନର କୁଲଦୀପ ଓ ଚହଲ ରହିଛନ୍ତି। ଏହି ଦୁଇଜଣ ମ୍ୟାଚ୍ ଓ୍ବିନର ଭାବେ ପରିଚିତ। ଟୁର୍ନାମେଣ୍ଟରେ ଭାରତ ଭଲ ସ୍ଥିତିରେ ରହିଛି। ଭାରତ ସେମିଫାଇନାଲରେ ପହଞ୍ଚିବ ବୋଲି ଆଶା କରୁଛି। ଧୋନୀ କେତୋଟି ମନ୍ଥର ଇନିଂସ ଖେଳି ବେଶ୍ ସମାଲୋଚିତ ହୋଇଛନ୍ତି। ତେବେ ଭାରତୀୟ ଦଳ ପାଇଁ ତାଙ୍କର ଭୂମିକା ଗୁରୁତ୍ୱପୂର୍ଣ୍ଣ। ବ୍ୟାଟିଂ କରିବାକୁ ଆସି ହଠାତ୍ ସ୍ପିନରମାନଙ୍କୁ ଆକ୍ରମଣ କରିବା ଓ ଷ୍ଟ୍ରାଇକ ରୋଟେଟ୍ କରିବା ସେତେଟା ସହଜ ନୁହଁ। ସ୍ଲୋ ପିଚ୍ରେ ଷ୍ଟ୍ରାଇକ ରୋଟେଟ କରିବା ସହଜ ନୁହେଁ। ଅନ୍ୟ ବ୍ୟାଟ୍ସମ୍ୟାନ ବିଫଳ ହେଉଥିବା ବେଳେ କେବଳ ଧୋନୀଙ୍କୁ ଦାୟୀ କରିବା ଠିକ୍ ନୁହଁ। ଗତଥରର ଚାମ୍ପିୟନ ଅଷ୍ଟ୍ରେଲିଆ ଏଥର ମଧ୍ୟ ଟାଇଟଲ ଜିତିବାର ଯଥେଷ୍ଟ ସମ୍ଭାବନା ରହିଛି ବୋଲି ସେ ପୂର୍ବାନୁମାନ କରିଛନ୍ତି। ବିଶ୍ୱକପ୍ର ପ୍ରଥମ ଦଳ ଭାବେ ଅଷ୍ଟ୍ରେଲିଆ ସେମିଫାଇନାଲରେ ପ୍ରବେଶ କରିଛି। ଦଳ ଏବେ ବେଶ୍ ଭଲ ପ୍ରଦର୍ଶନ କରୁଛି। ଟପ୍ ଅର୍ଡରରେ ଅଧିନାୟକ ଆରୋନ ଫିଞ୍ଚ୍ ଓ ଡେଭିଡ ଓ୍ବାର୍ନର ଦମ୍ଦାର ପ୍ରଦର୍ଶନ କରିଛନ୍ତି। ଅଷ୍ଟ୍ରେଲିଆର ଚତୁର୍ଥ ଓ ପଞ୍ଚମ ବୋଲିଂ ବିକଳ୍ପକୁ ନେଇ ଚିନ୍ତିତ ଅଛି। ଏହି ଦାୟିତ୍ୱରେ ଥିବା ବୋଲରମାନେ ଅବଶ୍ୟ ଭଲ ପ୍ରଦର୍ଶନ କରୁଛନ୍ତି। ଜାସନ ବେହରେନଡୋର୍ଫ ଗତ ମ୍ୟାଚ୍ ଜବରଦସ୍ତ ପ୍ରଦର୍ଶନ କରି ବେଶ୍ ଭଲ ଭାବେ ନିଜର ଦାୟିତ୍ୱ ତୁଲାଇଛନ୍ତି। ନାଥନ ଲିୟନ ମଧ୍ୟ ଭଲ ପ୍ରଦର୍ଶନ କରିଛନ୍ତି। ବିଶ୍ୱକପ୍ ଇତିହାସରେ ଅଷ୍ଟ୍ରେଲିଆର ପ୍ରଦର୍ଶନ ଜବରଦସ୍ତ ରହିଛି। ବଡ଼ ବଡ଼ ମ୍ୟାଚ୍ରେ କିପରି ଜିତିବାକୁ ହୁଏ ତାହା ଅଷ୍ଟ୍ରେଲିଆକୁ ବେଶ୍ ଭଲ ଭାବେ ଜଣା ବୋଲି ୭୯ଟି ଟେଷ୍ଟ ଓ ୧୮୫ଟି ଦିନିକିଆ ମ୍ୟାଚ୍ ଖେଳିଥିବା ହସି କହିଛନ୍ତି। ଦୁଇ ଓପନରଙ୍କ ଉପରେ ଅଷ୍ଟ୍ରେଲିଆ ଅତ୍ୟଧିକ ନିର୍ଭରଶୀଳ ହେଉଛି ବୋଲି ପ୍ରଶ୍ନକୁ ସେ ଏଡାଇ ଯାଇଛନ୍ତି। ଭାରତ ସମେତ ଏକାଧିକ ଦଳ ଦୁଇ ତିନିଜଣଙ୍କ ଉପରେ ବେଶ୍ ନିର୍ଭରଶୀଳ ହେଉଛି। ଏଥିରେ ନୂଆ କଥା କିଛି ନାହିଁ। ନ୍ୟୁଜିଲାଣ୍ଡ କେନ୍ ଓ୍ବିଲିୟମସନ, ଭାରତ ବିରାଟ କୋହଲି ଓ ରୋହିତ ଶର୍ମାଙ୍କ ଉପରେ ନିର୍ଭର କରୁଛି। ତେଣୁ ଏଥିରେ ଆଶ୍ଚର୍ଯ୍ୟ ହେବାର କିଛି ନାହିଁ ବୋଲି ସେ ସ୍ପଷ୍ଟ କରିଛନ୍ତି। ଉସ୍ମାନ ଖ୍ବାଜା, ପୂର୍ବତନ ଅଧିନାୟକ ଷ୍ଟିଭେନ୍ ସ୍ମିଥ୍ ଭଲ ପ୍ରଦର୍ଶନ କରୁଛନ୍ତି। ଗ୍ଲେନ୍ ମ୍ୟାକ୍ସଓ୍ବେଲଙ୍କ ପାଖରେ ଏକ୍ସ- ଫ୍ୟାକ୍ଟର ରହିଛି। ତେବେ ମାର୍କସ ଷ୍ଟୋଇନିସ ଏପର୍ଯ୍ୟନ୍ତ ଦମ୍ ଦେଖାଇନାହାନ୍ତି। ଆଗକୁ ସେ ସଫଳ ହେବେ ଓ ଧୂଆଁଧାର ଇନିଂସ ଖେଳିବେ ବୋଲି ଆଶା କରୁଛି। ସବୁ କିଛି ଠିକ୍ଠାକ୍ ଚାଲେ ତେବେ ଏଥର ଅଷ୍ଟ୍ରେଲିଆ ପୁଣି ବାଜି ମାରିବ ବୋଲି ହସି ପୂର୍ବାନୁମାନ କରିଛନ୍ତି।
