ନ୍ୟୁୟର୍କ,୨୬।୯: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବୁଧବାର ଏଠାରେ ବ୍ଲୁମ୍ବର୍ଗ ଗ୍ଲୋବାଲ ଇନ୍ଭେଷ୍ଟର ଫୋରମ୍ରେ ଯୋଗ ଦେଇଛନ୍ତି। ଭାରତରେ ରାଜନୈତିକ ସ୍ଥିରତା ରହିଥିବା ବେଳେ ନିବେଶ ଲାଗି ଅନୁକୂଳ ବାତାବରଣ ରହିଛି। ତଥାପି ଏଥିରେ କୌଣସି ତ୍ରୁଟି ରହିଥିଲେ ସେ ତାହାକୁ ସେତୁ ଭାବେ ପୂରଣ କରିବେ ବୋଲି ଉଲ୍ଲେଖ କରି ମୋଦି ବିଶ୍ୱର ନିବେଶକଙ୍କୁ ଆହ୍ବାନ ଦେଇଛନ୍ତି। ଦେଶର ଅଭିବୃଦ୍ଧିରେ ସେ ୪ଟି ମୌଳିକ କାରଣକୁ ଉଲ୍ଲେଖ କରିଛନ୍ତି। ସେ କହିଛନ୍ତି ଯେ, ଗଣତନ୍ତ୍ର(ଡେମୋକ୍ରାସି), ଜନସଂଖ୍ୟାତତ୍ତ୍ୱ(ଡେମୋଗ୍ରାଫି), ଚାହିଦା(ଡିମାଣ୍ଡ) ଓ ଦୃଢ଼ତା (ଡିସାଇସିଭ୍ନେସ୍) ଯୋଗୁ ଭାରତ ଦ୍ରୁତଗତିରେ ଆଗକୁ ବଢ଼ୁଛି। ଭାରତରେ ନିବେଶ ଲାଗି ସୁବର୍ଣ୍ଣ ସୁଯୋଗ ରହିଛି ବୋଲି ସେ କହିଛନ୍ତି।
ପ୍ରଧାନମନ୍ତ୍ରୀ ମୋଦି କହିଛନ୍ତି ଯେ, ଏନ୍ଡିଏ ସରକାର ସମ୍ପତ୍ତି ସୃଷ୍ଟିକାରୀ ଓ ବ୍ୟବସାୟୀ ଗୋଷ୍ଠୀକୁ ସମ୍ମାନ କରୁଛି। ସରକାର କର୍ପୋରେଟ ଟିକସ ହ୍ରାସ କରିବା ଭଳି ଯୁଗାନ୍ତକାରୀ ନିଷ୍ପତ୍ତି ନେଇଛନ୍ତି। ସମସ୍ତ ବ୍ୟବସାୟିକ ନେତୃତ୍ୱ ଏହାକୁ ଐତିହାସିକ ମନେକରୁଛନ୍ତି। ନିବେଶ ବଢ଼ାଇବା ଲାଗି ସରକାର ଗୋଟିଏ ପରେ ଗୋଟିଏ ନିଷ୍ପତ୍ତି ନେଇ ଘୋଷଣା କରିଚାଲିଛନ୍ତି। ନୂଆ ସରକାର ଗଠନ ପରେ ବାଧା ଉତ୍ପନ୍ନ କରୁଥିବା ୫୦ରୁ ଅଧିକ ଆଇନକୁ ରଦ୍ଦ କରାଯାଇଛି। ନୂଆ ସରକାରକୁ ମାତ୍ର ୩-୪ ମାସ ହୋଇଛି। ତାଙ୍କ ମତରେ ବ୍ୟବସାୟିକ ପରିବେଶ ସୃଷ୍ଟି ଲାଗି ଏହା ଅୟମାରମ୍ଭ ମାତ୍ର। ଆହୁରି ଲମ୍ବା ସମୟ ପଡିଛି। ଭାରତ ସହିତ ପାର୍ଟନରଶିପ୍ କରିବା ଲାଗି ବିଶ୍ୱ ନିକଟରେ ଏହାହିଁ ସୁବର୍ଣ୍ଣ ସୁଯୋଗ। ସାରା ବିଶ୍ୱର ନିବେଶକଙ୍କୁ ଭାରତ ଆସିବାକୁ ଆହ୍ବାନ ଜଣାଇ ମୋଦି କହିଛନ୍ତି ଯେ, ଦେଶର ମଧ୍ୟବିତ୍ତ ଶ୍ରେଣୀଙ୍କ ଆକାଂକ୍ଷା ବଢ଼ିବାରେ ଲାଗିଛି ଓ ସେମାନଙ୍କର ଦୃଷ୍ଟିକୋଣ ବିଶ୍ୱ ସ୍ତରର ବୋଲି କୁହାଯାଇପାରେ। ଏଣୁ ନୂଆ ଟ୍ରେଣ୍ଡ ସହିତ ନିବେଶ କରିବାକୁ ଚାହୁଁଥିବା ନିବେଶକ ଭାରତ ଆସନ୍ତୁ। ଦେଶର ଯୁବବର୍ଗ ଆପ୍ ଅର୍ଥନୀତିର ସବୁଠାରୁ ବଡ଼ ବ୍ୟବହାରକାରୀ। ଆପ୍ ଷ୍ଟାର୍ଟଅପ୍ରେ ବଡ଼ ମାର୍କେଟ ସହିତ ନିବେଶ କରିବାକୁ ଚାହୁଁଥିଲେ ଭାରତ ଆସନ୍ତୁ ବୋଲି ସେ ନିବେଶକମାନଙ୍କୁ ଆହ୍ବାନ ଜଣାଇଛନ୍ତି। ଏଥିସହିତ ସେ ଭିତ୍ତିଭୂମି, ସହର ବିକାଶ ଓ ମେକ୍ ଇନ୍ ଇଣ୍ଡିଆରେ ନିବେଶ ପାଇଁ ବ୍ୟବସାୟିକ ଗୋଷ୍ଠୀଙ୍କୁ ନିମନ୍ତ୍ରଣ ଦେଇଛନ୍ତି। ସେ କହିଛନ୍ତି ଯେ, ଏନ୍ଡିଏ ସରକାର ଦେଶରେ ଭିତ୍ତିଭୂମି କ୍ଷେତ୍ରରେ ୧୦୦ ଲକ୍ଷ କୋଟି ଡଲାର ନିବେଶ କରିବାକୁ ଯାଉଛନ୍ତି।
