କୋରୁକୋଣ୍ଡା,୧୪।୧(ଡି.ଏନ୍.ଏ.)-ଗ୍ରାମରେ ବିଦ୍ୟୁତ୍ ସଂଯୋଗ ଥାଇ ମଧ୍ୟ ଗ୍ରାମବାସୀ ସନ୍ଧ୍ୟା ହେଲେ ସବୁଦିନ ହଇରାଣ ହେଉଛନ୍ତି। ଡିବି, ଲଣ୍ଠନ ଲଗାଇ ଚଳୁଛନ୍ତି। ବିଭାଗୀୟ ଅଧିକାରୀଙ୍କ ନିକଟରେ ଅଭିଯୋଗ କଲେ ମଧ୍ୟ କାୈଣସି ସୁଫଳ ମିଳୁନାହିଁ। ଏପରି ଦେଖିବାକୁ ମିଳିଛି ମାଲକାନଗିରି ଜିଲା କୋରୁକୋଣ୍ଡା ପଞ୍ଚାୟତର ବୁଦୁଗୁଡା ଗ୍ରାମରେ। ଏହି ଗ୍ରାମକୁ ୭ ବର୍ଷ ତଳେ ବିଦ୍ୟୁତ୍ ସଂଯୋଗ ହୋଇଥିଲା। ବିଦ୍ୟୁତ୍ ସଂଯୋଗ ପରେ ଗ୍ରାମବାସୀ ନିଜ ଘରେ ବ୍ୟବହାର ପାଇଁ ଟିଭି, ଫ୍ରିଜ ଆଦି କିଣିଥିଲେ। ଏବେ ୬ମାସ ହେବ ଏସବୁ ବିଦ୍ୟୁତ୍ ଉପକରଣ ଅକାମୀ ହୋଇପଡିଛି। ପ୍ରତି ଘରେ ସଞ୍ଜ ହେଲେ ଲାଗୁଛି ଡିବି, ଲଣ୍ଠନ। ଟିଭି ଥାଇ ଖବର ଜାଣିବା ପାଇଁ ଲାଗୁଚି ରେଡିଓ। ୬ମାସ ହେବ ଗ୍ରାମରେ ବିଦ୍ୟୁତ୍ ସରବରାହ ବନ୍ଦ ରହିଛି। ବିଦ୍ୟୁତ୍ ନ ଥିବା ହେତୁ ପିଲାମାନେ ପାଠ ପଢିବା ପାଇଁ ମଧ୍ୟ ସମସ୍ୟାର ସମ୍ମୁଖୀନ ହେଉଛନ୍ତି ବୋଲି ଗ୍ରାମବାସୀ ଅଭିଯୋଗ କରିଛନ୍ତି। ଅନ୍ଧାର ଯୋଗୁ ରାତିରେ ସାପ, ଭାଲୁ ଆଦି ଜନ୍ତୁଙ୍କ ଭୟ ରହିଛି। ଏନେଇ ଗ୍ରାମବାସୀ ବାରମ୍ବାର ସାଉଥ୍ କୋ ଏସଡିଓ ଏବଂ କନିଷ୍ଠ ଯନ୍ତ୍ରୀଙ୍କୁ ଜଣାଇଥିଲେ ମଧ୍ୟ କୌଣସି ସୁଫଳ ମିଳିନାହିଁ। ଏନେଇ ଏସଡିଓ ପ୍ରମୋଦ କୁମାର ନାୟକଙ୍କୁ ପଚାରିବାରୁ ସେ କହିଲେ ଯେ, ବୁଦୁଗୁଡା ଗ୍ରାମବାସୀ ଦୀର୍ଘଦିନ ଧରି ବିଦ୍ୟୁତ୍ ବିଲ୍ ପୈଠ କରି ନ ଥିବାରୁ ବିଦ୍ୟୁତ୍ କାଟ କରାଯାଇଛି। ଅନ୍ୟପକ୍ଷରେ ଏହାକୁ ଗ୍ରାମବାସୀ ଅସ୍ବୀକାର କରିଛନ୍ତି। ସେମାନେ କହିଛନ୍ତି ସାଉଥକୋ କର୍ତ୍ତୃପକ୍ଷ ସେମାନଙ୍କୁ ଅଳ୍ପ କିଛି ଟଙ୍କା ପୈଠ କଲେ ବିଦ୍ୟୁତ୍ ମିଳିିବ ବୋଲି କହିଥିଲେ। ଆମେ ଗ୍ରାମବାସୀ ଟଙ୍କା ପୈଠ କରିଥିଲେ ମଧ୍ୟ ସାଉଥକୋ ଏଯାଏ ବିଦ୍ୟୁତ୍ ସଂଯୋଗ ଦେଉନାହିଁ।
