କେନ୍ଦୁଝର, ୭ା୭(ସ୍ବ.ପ୍ର.)-ବିଦ୍ୟାଳୟ ବାହାରେ କୌଣସି ପିଲା ରହିବେ ନାହିଁ ଏବଂ ସବୁ ପିଲା ବିଦ୍ୟାଳୟକୁ ଆସି ପାଠ ପଢିବା ଲାଗି ସରକାର ଯୋଜନା କରିଥିବା ବେଳେ ଏହାର ବାସ୍ତବ ଚିତ୍ର ସମ୍ପୂର୍ଣ୍ଣ ଭିନ୍ନ। ପ୍ରାଥମିକ ଶିକ୍ଷାନୁଷ୍ଠାନକୁ ଆବଶ୍ୟକ ଭିତ୍ତିଭୂମି ଯୋଗାଇ ଦେବା ଲାଗି ଘର ତିଆରି କରାଯାଉଥିଲେ ମଧ୍ୟ କାମ ଶେଷ ହୋଇ ପାରୁ ନାହିଁ ା ଫଳରେ ଛାତ୍ରୀଛାତ୍ର ପାଠପଢାରୁ କିଭଳି ବଞ୍ଚିତ ହେଉଛନ୍ତି, ତାହର ଏକ ନଜିର କେନ୍ଦୁଝର ଜିଲା ବାଂଶପାଳ ବ୍ଲକର ଦୁର୍ଗମ ତଳକାଇଁସାରୀ ପଞ୍ଚାୟତ ଭେଜିଡିହି ଓ ମେଦିନିପୁର ଗ୍ରାମରେ ଦେଖିବାକୁ ମିଳିଛି।
ଭୂୟାଁ ଜନଜାତିର ଲୋକେ ବସବାସ କରୁଥିବା ଏହି ଗ୍ରାମରେ ବିଦ୍ୟାଳୟ ନ ଥିବାରୁ ଆଗରୁ ପିଲାମାନେ ପାଠ ପଢିପାରୁ ନ ଥିଲେ। ଆବଶ୍ୟକତାକୁ ଦୃଷ୍ଟିରେ ରଖି ଭେଜିଡିହି ଓ ମେଦିନିପୁର ଗ୍ରାମର ପିଲାଙ୍କ ସକାଶେ ୨୦୧୪ରେ ଭେଜିଡିହିରେ ପ୍ରାଥମିକ ବିଦ୍ୟାଳୟ ପ୍ରତିଷ୍ଠା କରାଯାଇଥିଲା। ବର୍ତ୍ତମାନ ୧ ମରୁ ୫ମ ଶ୍ରେଣୀ ପର୍ଯ୍ୟନ୍ତ ୨୨ ଛାତ୍ରୀଛାତ୍ର ନାମ ଲେଖାଇ ପାଠ ପଢୁଛନ୍ତି। ୨ଜଣ ଶିକ୍ଷକ ନିଯୁକ୍ତ ହୋଇଛନ୍ତି। ବିଦ୍ୟାଳୟର ସ୍ଥାୟୀ ଘର ନ ଥିବାରୁ ପିଲାଙ୍କ ପାଠ ପଢାରେ ଅସୁବିଧା ହେଉଛି। କାମ ଚଳା ବ୍ୟବସ୍ଥା ସ୍ବରୂପ ସ୍ଥାନୀୟ ବନ ବିଭାଗର ଏକ କୋଠରିରେ ୫ଟି ଶ୍ରେଣୀର ପିଲାଙ୍କୁ ବସାଇ ପାଠ ପଢାଯାଉଛି। ସ୍ଥାୟୀ ଗୃହ ନିର୍ମାଣ ଲାଗି ୯ ଲକ୍ଷ ଟଙ୍କା ବ୍ୟୟ ଅଟକଳ କରାଯାଇ ୬ ଲକ୍ଷ ଟଙ୍କା ଦିଆଯାଇଥିଲା। ଘର ନିର୍ମାଣ କାର୍ଯ୍ୟ ଆରମ୍ଭ ହୋଇ ଛାତ ପର୍ଯ୍ୟନ୍ତ କାମ କରାଯାଇଛି। ଅବଶିଷ୍ଟ ଅର୍ଥ ମିଳି ନ ଥିବାରୁ ଦୁଇ ବର୍ଷ ହେଲା ସ୍କୁଲ ଗୃହ ଅଧାପନ୍ତରିଆ ହୋଇ ପଡିରହିଛି ା ଫଳରେ ଏହା କୌଣସି କାମରେ ଲାଗିପାରୁ ନାହିଁ । ନିର୍ମାଣାଧୀନ ଘର ଏବେ ଖରାବର୍ଷାରେ ନଷ୍ଟ ହେବାକୁ ବସିଲାଣି।
ପାହାଡ ତଳି ଇଲାକାରେ ଚାଲିଥିବା ଏହି ବିଦ୍ୟାଳୟ ଲାଗି ପାଚେରି ତିଆରି ହୋଇ ନାହିଁ। ପିଇବା ପାଣିର ବ୍ୟବସ୍ଥା ନାହିଁ ା ପିଲାଙ୍କ ଖେଳିବା ପାଇଁ ଉପକରଣ ଯୋଗାଇ ଦିଆଯାଇ ନାହିଁ। ଏଭଳି ପରିବେଶରେ କିଭଳି ପାଠପଢା ଯାଉଥିବ ତାହା ଅନୁମେୟ। ଶିକ୍ଷାନୁଷ୍ଠାନର ଦୁରବସ୍ଥା ଦେଖି ଅନେକ ଅଭିଭାବକ ସେମାନଙ୍କ ପିଲାଙ୍କୁ ସେଠାରେ ପାଠ ପଢାଇବାକୁ ଆଗ୍ରହ ପ୍ରକାଶ କରୁ ନ ଥିବା କହିଛନ୍ତି। ଶିକ୍ଷକମାନେ ପ୍ରତିଦିନ ବାହାରେ ବସି ଅଫିସ କାମ କରି ଫେରୁଛନ୍ତି। ବର୍ଷା ଦିନେ ବନ ବିଭାଗ କୋଠରିରେ ପାଠ ପଢିବା ସମ୍ଭବ ହେଉ ନ ଥିବାରୁ ଏ ସମ୍ପର୍କରେ ଶିକ୍ଷା ବିଭାଗକୁ ଜଣାଇ ଦିଆଯାଇଛି ା ସର୍ବଶିକ୍ଷା ଅଭିଯାନ ବର୍ତ୍ତମାନ ସମଗ୍ର ଶିକ୍ଷା ଯୋଜନାକୁ ପରିବର୍ତ୍ତିତ ହୋଇଥିବା କାରଣରୁ ଅର୍ଥ ମଞ୍ଜୁରୀରେ ବିଳମ୍ବ ଘଟିଥିବା ପ୍ରଧାନଶିକ୍ଷକ ସୁଦର୍ଶନ ଦଳେଇ କହିଛନ୍ତି। ଅଭିଭାବକ ଓ ଶିକ୍ଷକ ସଂଘ ବୈଠକରେ ବିଦ୍ୟାଳୟର ସ୍ଥାୟୀ ଗୃହ ନିର୍ମାଣ ବିଳମ୍ବ ହେବା ନେଇ ଉଦ୍ବେଗ ପ୍ରକାଶ କରାଯାଇ ଏ ସମ୍ପର୍କରେ ଶିକ୍ଷା ବିଭାଗକୁ ଅବଗତ କରାଯାଇଛି। ପ୍ରଶାସନ ଏ ଯାଏ କୌଣସି ପଦକ୍ଷେପ ନେଇ ନ ଥିବାରୁ ଅଭିଭାବକମାନେ ଅସନ୍ତୋଷ ପ୍ରକାଶ କରିଛନ୍ତି।